Rusia zhgënjehet nga kutia e zezë e avionit të rrëzuar nga Turqia

Kutia e zezë e avionit luftarak rus që u rrëzua nga Turqia muajin e shkuar nuk ka dhënë rezultate shpresëdhënëse për autoritetet në Moskë.

Ekspertët ushtarakë rusë, të cilët filluan të premten analizimin e kutisë së zezë, deklaruan se “ishte pamundur të përfitoheshin të dhëna ekzakte”. Shkak është dëmtimi i fortë i kutisë.

Nënkomandanti i Departamentit të Forcave të Armatosura të Rusisë për Sigurinë e Fluturimeve, Gjenerallejtënant Sergey Baytenov, bëri me dije se do të kërkojnë ndihmën e institucioneve shkencore të kësaj fushe për të deshifruar të dhënat e kutisë së zezë dhe se punimet mund të vijojnë për një kohë të gjatë.

Në një komunikatë të mëparshme, Kremlini pretendonte se kutia e zezë do të vërtetonte tezën ruse, se avioni luftarak i rrëzuar nga gjuajtësit turq tip F-16 nuk kishte bërë shkelje të hapësirës ajrore.

Rusia kishte ftuar specialistë ushtarakë nga 14 vende të botës për analizimin e të dhënave të kutisë së zezë, që u gjend më datë 8 dhjetor, ndërsa përgjigje pozitive kishte marrë vetëm nga Kina, Britania e Madhe dhe Shtetet e Bashkuara të Amerikës. /Dita/