Ahmetaj takim me biznesin e vogël në Shkodër: Deklarimi, jo taksë e re, mundësi për të kredituar TVSH

April 15, 2018 13:10

Ahmetaj takim me biznesin e vogël në Shkodër: Deklarimi, jo taksë e re, mundësi për të kredituar TVSH

 

Ministri i Financave dhe Ekonomisë Arben Ahmetaj bashkëbisedoi me biznese të vegjël në Shkoder, në kuadër të informimit dhe komunikimit për uljen e pragut të TVSH.

Ahmetaj tha se qytetarët dhe bizneset do të mund ta kuptojnë shumë shpejt në kohë që qeveria ka bërë gjënë e duhur, së bashku dhe në favor të sipërmarrjes së vogël dhe këto procedura janë një normalitet ekonomik e  tatimor dhe nuk bëhet fjalë për një taksë të re.

“Sot jemi rreth dy javë pasi detyrimi për deklarim ka hyrë në fuqi dhe fakti që nuk ka asnjë ndryshim në çmime, është në referencë të plotë të besimit të asaj që kemi thënë muaj e muaj, që nuk do të ketë ndryshim dhe rritje çmimesh. Përtej kësaj, deklarimi nuk është taksë, por është procedurë”, tha ministri.

Ahmetaj sqaroi se TVSH është një taksë e vendosur në vitin ’96 në masën 20% dhe nuk ka ndryshuar asnjëherë.

Janë 9975 biznese në të gjithë Shqipërinë që do të hyjnë në skemën e deklarimit, ndërsa në Shkodër janë 447 të tilla, për të cilat do të aplikohet një deklaratë e thjeshtuar një herë në tre muaj, pa kosto të shtuar për biznesin, madje do të ketë mundësi për kreditim.

“Kemi diskutuar a do të ketë kosto? Ka filluar diskutimi deri tek “do marrim kontabilist dhe do të paguajmë”, e të tjera, e të tjera. Zero kosto! Madje po ju them që në bazë të proçedurës që është aq e thjeshtëzuar, do të jetë thjesht plotësim i katër kutive. Më thoni një sipërmarrje të vogël, sado e thjeshtë të jetë, që nuk e di se çfarë ka në inventar?

Ditën e parë, ky inventar, pra skanimi i këtij inventari e ndihmon të deklarojë dhe madje të dalë me TVSH të kreditueshme dhe më vonë, edhe të pagueshme, sepse do të ketë mundësi që të deklarojë dhe shpenzime të bëra për drita, për ujë, për qera, apo edhe për punëtorët” – sqaroi Ministri

Ahmetaj tha se qëllimi i këtij ndryshimi nuk është mbledhja e të ardhurave nga biznesi i vogël, por fokusi i qeverisë mbetet biznesi i madh.

“Në të gjithë totalin e TVSH-së që mbledhim ne, 99.2% vjen nga biznesi i madh, 99.2%. Vetëm një pjesë shumë e vogël (0.08%) vjen nga biznesi i vogël 5 deri në 8 milionë lekë xhiro. Si mendoni ju, që ne bëjmë një procedurë për të fokusuar ato burime jo të mëdha e jo të shumta që kemi, tek biznese që nuk kanë çfarë të japin për shkak të logjikës dhe natyrës së transaksionit, apo do fokusohemi tek biznesi i madh, i cili jep 99.2% të totalit të TVSH-së.

Këtë jua solla për të rrëzuar atë argument emocional, apo paditurie, apo të qëllimshëm që sjell opozita në protestat e veta numërvogla. Fokusi jonë është biznesi i madh dhe do të vazhdojë të jetë biznesi i madh”.

Ahmetaj komentoi edhe protestat e organizuara nga opozita.

“Personalisht e ndoqa atë ditë, demek të mbylljes së qepenave, dhe falenderoj të gjithë qytetarët, përfaqësues të sipërmarrjes së vogël që refuzuan ta politizojnë merakun e tyre dhe vazhduan punën. I falenderoj në emër edhe të gjithë trupës së tatim-taksave, sepse e kanë kuptuar drejt që edhe aty ku ka merak, meraku nuk zgjidhet me bolori politike, paditurie, apo të qëllimshme, por zgjidhet në diskutim me qeverinë”.

Ministri theksoi se qeveria mbetet e angazhuar për lehtësimin e sipërmarrjes dhe se shumë shpejt do të prezantohen dy lehtësi të reja fiskale.

“Unë do ta theksoj edhe një herë që nuk do të ketë gjoba për biznesin e vogël, për deklarim të gabuar, nuk ka kosto administrative, nuk ka rritje çmimesh, dhe ne do të vazhdojmë t’i mbajmë taksat e ulura dhe 0 për biznesin e vogël.

Me iniciativë të Kryeministrit, vetëm javës që vjen bëhen dhe dy vlerësime të rëndësishme fiskale, një për industrinë elektroenergjitike për fotovoltaiket, ku TVSH për makineritë dhe pajisjet bëhet 0, dhe një tjetër për shoqëritë e bashkëpunimit bujqësor, ku nëpërmjet instrumentit fiskal dhe proçedurial do të trajtohet një ndërmarrje bujqësore si një fermer, pa ngarkesë TVSH-je” – tha Ministri.

Në mbyllje Ahmetaj tha se java e ardhshme është një moment shumë i rëndësishëm për vendin dhe aspiratën europiane të çdo qytetari e sipërmarrje shqiptare.

“Dua t’i referohem datës 17 prill, një ditë e rëndësishme për aspiratën e çdo qytetari, i punësuar, në sipërmarrje, në administratë, në shkollë, student, i ri, e re, i vjetër, gjithë shqiptaret, në krahun e majtë, në krahun e djathtë, është një ëndërr ndër vite për t’u bërë pjesë e Europës. Pjesë e Europës bëhesh duke qenë qytetar dinjitoz, duke paguar taksat, duke qenë i përgjegjshëm dhe është detyra jonë, detyra e qeverisë që të lehtësojë çdo ditë e më shumë proçedurat, të lehtësojë çdo ditë e më shumë barrën fiskale dhe të bëjë të mundur nëpërmjet politikave të veta që shoqëria, ekonomia dhe sipërmarrja të krijojnë gjithmonë e më shumë vende pune”.

a.s/dita

April 15, 2018 13:10
Komento

1 Koment

  1. nxenesi April 15, 18:06

    bravo profesor!!
    Sido qe te vije historia ti do te mund te jetosh me mbrapa ,kur te rrezoheni nga pushteti e kam fjalen me kursimet e tua nga keto dite mjaft fitimprurese ne pushtet!!
    Lajmi i mire per mua si qytetar eshte qe njerezit kane filluar te rrokin dimensionet e verteta te mashtrimit te quajtur RILINDJE.
    Ne emer te denimit te bemave te Saliut ju e thelluat varferine edhe me shume bete qe te emigrojne se paku edhe 250 mije te tjere keto vite dhe me ne fund po ndertoni tre inceneratore per te djegur plehrat e Evropes.
    Megjithate njerezit e ndjejne qe ju u sherbeni te pasurve qe nga ana e tyre ju japin ndonje zarf pasi nuk
    ka sherbim falas,per elektoratin kujtoheni para zgjedhjeve dhe hop mbas zgjedhjeve ju le kujtesa papritmas.
    Nuk po flasim pastaj per shperndarje dhuratash qe beni vazhdimisht me ato koncesionet apo per ato hidrocentralet qe do i anullonit sa te merrnit pushtetin.
    Qellimi juaj ishte qe zarfat qe venin tek RULI ose hajdutet e tjere te PD te vinin tek juve dhe kete e realizuat me te vertete.
    Shpresoj qe ndergjegjja qytetare te rritet me shume keto vite qe mos tju lene fare ti vini ne pune inceneratoret qe te na helmoni perfundimisht neve dhe brezat qe do vine!!
    Lajmi i mire per juve eshte se Kina nga janari 2018 nuk pranon me plehra nga Evropa dhe me kete juve ju ka rene bingoja.
    Por per kete duhet te shpikni teori te reja dhe mashtrime gjithjne e me te sofistikuara.
    E di çfare profesor?
    Po te jepje anglisht nuk do ishe i pasur po do ishe i respektuar!!
    Respekti nuk blehet me para!!

    Reply to this comment
Shiko komentet

Komento

Your e-mail address will not be published.
Required fields are marked*