Ambasadorja greke: Nuk e përjashtojmë njohjen e pavarësisë së Kosovës

Greqia nuk e përjashton mundësinë që ta njohë Kosovën si shteti i pavarur dhe sovran. Kështu ka deklaruar shefja e zyrës ndërlidhëse të Greqisë në Prishtinë, Konstantina Athanassiadou.

“Unë nuk hezitoj të them që ne ofrojmë ndihmë teknike për çdo gjë që nevojitet. Fjalët që përdoren ne marrëveshje e në kompromise, ne mund të ndihmojmë. Ne nuk negociojmë në mesin e këtyre pesë vendeve që nuk e kanë njohur Pavarësinë e Kosovës, por mund të ndihmojmë në gjetjen e kompromiseve”, theksoi diplomatja greke, Konstantina Athanassiadou, që është në rolin e ambasadores së Greqisë në Kosovë.

Diplomatja greke tha se që nga prilli, në mision e diplomatik e kanë edhe sistemin e plotë të vizave, që sipas saj, kjo që tregon edhe një qëndrim të Greqisë ndaj Kosovës.

“Kosova ka një perspektivë të qartë euroatlantike, ne e përkrahim perspektivën evropiane të saj. Kosova është vend fqinjë i yni janë të mirëseardhur turistët”, tha Athanassiadou.