BSH reagon për “bankën e Linda Ramës”: Ja si është e vërteta

Nga Arkiva

• Turi i bashkëqeverisjes, Veliaj në Pezë: Do rindërtojmë aksin Tiranë-Plepa 4 15.May
• Luljeta Minxhozi zgjidhet zv/guvernatore e parë e BSH 3 09.Jan
• Dhe në e kurseftë Edi Rama, nuk kanë për ta kursyer shqiptarët 25 19.Jul

Banka e Shqipërisë ka reaguar pas përmendjes së përsëritur  të ABI Bank në konfliktin politik të Tiranës.

Akuzat dhe kundërakuzat u shtuan pas publikimit të disa shkrimeve në gazetën Dita mbi konfliktin e interesit të bashkëshortes së kryeministrit, anëtare e Këshillit Drejtues të kësaj Banke.

Vendimi ku paraqitet dorëheqja e zonjës Rama dhe zotit Lukaj nga Këshilli Drejtues daton në 9 janar, dy ditë pas botimit të artikullit të fundit në Dita në 7 janar të këtij viti. Sidoqoftë Banka thotë se pavarësisht kësaj, dorëheqja është dhënë më herët, në dhjetor, sipas saj.

Largimi i njëhershëm i znj.Rama dhe z.Lukaj (po njëherazi u futën në Këshillin Drejtues) u shoqërua me një lëvizje monetare të Bankës që ngjalli ilaritet në disa portale, konkretisht bëhet fjalë për pakësimin e kapitalit me 50 miliard lekë.

Kjo lëvizje monetare ndodhi dy ditë pas largimit të Ramës dhe Lukajt nga Këshilli Drejtues.

Vetë banka nëpërmjet drejtorit të saj Andi Balta akuzoi  se po hidhej baltë mbi Bankën dhe se biznesi bankar po ecte shumë mirë.

Kjo i shtyu ata që lidhën largimin e znj.Rama dhe z.Lukaj me uljen e kapitalit të Bankës nga rreth 8 miliard në rreth 3 miliard, të ngrenin pyetjen “pse banka duhej të zvogëlonte humbjet kur deklaron se punët shkojnë mirë”.

Drejtori Andi Balta thotë se ndaj bankës së tij po hidhet padrejtësisht baltë

ABI Bank sidoqoftë konfirmoi largimin nga Këshilli Drejtues të Ramës dhe Lukajt, por lidhur me lëvizjen e 50 miliard lekëve deklaroi se bëhej fjalë për një veprim të thjeshtë bankar, që njihet me termin “netim” pa lidhje me dorëheqjen e dy anëtarëve të Këshillit Drejtues.

“Kapitali i ABI Bank nuk është zvogëluar asnjëherë në asnjë moment. Perkundrazi vecse është rritur si pasojë e fitimeve (edhe ky informacion i rritjes është i plote dhe publik në Qendren Kombëtare të Regjistrimit). Informacioni i raportuar në menyrë dashakeqëse në disa media lidhet jo me zvogëlimin por vetem me netimin e kapitalit fillestar të paguar me humbjet e akumuluara përpara blerjes së bankës Credit Agricole Albania nga ABI Bank. Pra kapitali fillestar i bankës përpara blerjes nga ABI u netua me humbjet e periudhës po përpara blerjes nga ABI. Ky netim tërësisht teknik i kapitalit fillestar të paguar nuk ka të bëjë fare me ABI Bank” – deklaroi drejtori Balta.

Disa ditë pas kësaj, në Parlament u hodhën akuza të forta mes kryeministrit Rama dhe paraardhësit të tij Berisha, kur ky i fundit i përmendi gruan dhe ABI Bank-un. Opozita nuk ka ngurruar ta quajë Abi Bank “bankën e Linda Ramës”, gjë që ka sjellë edhe reagimin e pazakontë të kryeministrit, i cili deklaroi në Parlament se “gruas së tij i hanë atë që nuk thuhet”.

Për herë të parë ka reaguar tashmë edhe Banka e Shqipërisë. Në deklaratën e saj, BSH thotë se “çmon të nevojshme të përcjellë një sqarim të plotë, lidhur me këto deklarata mbi Bankën Amerikane të Investimeve”.

“Banka e Shqipërisë, në përputhje me kërkesat ligjore dhe rregullative, ka vlerësuar integritetin dhe reputacionin e aksionerëve të rinj si edhe të aksionerëve të tërthortë të Bankës” – thotë deklarata e BSH dhe rendit disa dokumenta ndërmjet të cilave edhe “vërtetimet e regjistruesit të shoqërive në Ishujt Kajman, për dy aksionarët e tërthortë, New Century Holdings XI, L.P. dhe NCH Balkan Fund, L.P., ku vërtetohej që dy shoqëritë janë të përjashtuara nga taksat,  dhe se janë në gjendje të mirë dhe vijojnë aktivitetin”.

BSH thotë se politika ka patur një rol shumë pozitiv në vite në sistemin bankar

“Njëherazi, sqarojmë se kuadri ligjor dhe rregullativ mbi bankat në Republikën e Shqipërisë nuk parashikon ndalime apo kufizime lidhur me vendin e regjistrimit apo të ushtrimit të aktivitetit të aksionarëve të tërthortë të subjekteve, të cilët ushtrojnë veprimtari bankare në Republikën e Shqipërisë.

Pavarësisht sa më sipër, Banka e Shqipërisë në përputhje me  parashikimet ligjore, por dhe me standardet ndërkombëtare (përfshirë standardet e FATF) në raste të kompanive të regjistruara në vend off-shore ka kryer vlerësimet e saj dhe ka identifikuar aksionarët deri në përfituesit e fundit” – shkruhet në deklaratën e BSH.

Institucioni i drejtuar nga Sejko thotë gjithashtu në deklaratë se “sipas të dhënave të vitit raportues 2017 për ABI Bank, rezulton se ky institucion ka marrë një vlerësim të integruar në përputhje me mesataren e vlerësimit të sistemit bankar”.

BSH shkruan gjithashtu se “siguron publikun se integriteti dhe reputacioni i aktivitetit financiar të sistemit bankar në Shqipëri, vijon të mbetet një arritje mjaft e çmuar, ku edhe politika ka pasur rolin e saj shumë pozitiv ndër vite” dhe se “Banka e Shqipërisë mbetet e hapur për çdo informacion që i shërben transparences”.

k.a. / dita