EKSKLUZIVE / Kumbari i vjetër kalon stafetën, komplotistët ende besojnë se ai s’di gjë…

April 29, 2018 22:13

EKSKLUZIVE / Kumbari i vjetër kalon stafetën, komplotistët ende besojnë se ai s’di gjë…

Edhe pasi kumbari i vjetër u përshëndosh publikisht me të zgjedhurin e tij në samitin e Pesë Familjeve, dhe të gjithë përfaqësuesit e oborrit u rreshtuan t’i puthnin dorën shefit të ri, çuditërisht vazhdon të ketë ish-kapo të keqkuptuar, që shtiren sikur apo që vërtet nuk kanë marrë vesh asgjë, bëjnë të ditur burime të Gojëve të Liga.

Ngjarjet janë zhvilluar në të ashtuquajturin Plenumi i Vazhdimësisë të Partisë Patriarkike, ku Gjyshi i Madh Sabile Risha vendosi të marrë pjesë për ta puthur personalisht në të dyja faqet dhe në gushë, pëllumbin e tij Lulrrafsha Mosuvrafsha.

Lojrat e vogla që Gjyshi i Madh ka bërë herë pas here, duke u shtirur sikur kritikon Rrafshën, duke nxjerrë ndonjë video të vogël kompromentuese komunikimi mes deputeteve pjeshka dhe deputetëve kërmij (nën logon e re, Demokrati Dixhital), apo duke thirrur për bashkim të çdo të pakënaquri pa dallim xhepi, metrash katrorë të shtëpive dhe llogarish bankare në Qipro, i ka gënjyer të pakënaqurit.

“E pe si e kritikoi dje? Ja, Kumbari nuk e do Rrafshën por s’ka ç’bën se e zuri halli”, thoshte njëri.

“Gjyshi i Madh nuk ka faj, ai nuk di gjë. Zullumet i ka bërë ky buratini me kokë të vet,” thoshte një tjetër.

“Ta ndihmojmë Gjyshin e Madh se ky mistreci ja ka me të futme,” shtonte një i tretë, që në kohë të ndryshme ua kishte futur secilit prej komplotistëve të tjerë me rradhë.

Çuditërisht, edhe ditën e madhe të samitit të Partisë Patriarkike, që disidentët e quajtën Plenumi i Zi, ata ishin të bindur se Kumbari plak nuk dinte gjë.

Nuk e besuan as kur ai e puthi demonstrativisht djaloshin me brilantinë, si për treguar se ja kishte kaluar stafetën.

Nuk morën vesh gjë as kur familjet Gjenoveze, Gambino, Lukeze, Bonano e Kolombo i puthën dorën Lulrrafshës, duke menduar se ata e bënë këtë për ta uruar Rrafshën për suksesin e vizitës gjermane.

Për ironi të fatit, pasi i dorëzoi detyrën e lartë evlatit të preferuar, Gjyshi i Madh kritikoi ashpër fishkëllimat që dëgjoi në sallë kundër një folësi butaforik që kurrë s’ka ditur se çfarë ndodhte rrotull tij.

“Jo, ky është turp, njerëzit duhen dëgjuar,” tha Kumbari plak dhe u largua në shenjë proteste duke i shkelur syrin Rrafshës.

“Ja, e patë? Gjyshi i Madh nuk e do atë maskara”, thanë komplotistët të gëzuar.

Sipas burimeve të besueshme për Gojët e Liga, ata edhe tani vazhdojnë të besojnë se Kumbari nuk di gjë…

Shënim: Gojët e Liga është rubrikë satirike pro-demokratike anti-patriarkike   

April 29, 2018 22:13
Komento

Ende pa komente

Ende pa komente!

Je i mirëpritur. Bëhu i pari që komenton këtë artikull. Kujdes etikën.

Komento
Shiko komentet

Komento

Your e-mail address will not be published.
Required fields are marked*