Ëndrra që më shqetësojnë (Pyetje-Përgjigje me Dr.Harxhin)

April 13, 2019 14:06

Ëndrra që më shqetësojnë (Pyetje-Përgjigje me Dr.Harxhin)

PYETJE: Doktor, vazhdimisht shikoj ëndrra të çuditshme. Ato fillojnë duke flirtuar me një zotëri të moshuar, pastaj ato evoluojnë shpejt drejt një pasioni seksual të nxehtë. Zotëria i moshuar nuk është gjithmonë po i njëjti person ( ai mund të jetë një person që e kam parë në rrugë, një person që nuk e kam parë kurrë më parë, ose e kam parë dhe  nuk e mbaj mënd, ose një person që e njoh personalisht mirë) Gjëja më e papëlqyer është se ai çdo herë, pa përjashtim, shndërrohet në babain tim. Jam shumë e shqetësuar. Për këtë kam lexuar dhe e di që quhet “kompleksi i Elektrës”. Në ëndërr, nga pikëpamja seksuale, unë jam tërësisht brenda ngjarjes. Gjithmonë zgjohem kur ëndrra bëhet e nxehtë, pasi kam arritur klimaksin. Ndjehem tmerrësisht e turpëruar. Unë kam marrëdhënie shumë të mira me Babanë, pavarësisht, dëshirës time, që ai përveç shkollimit dhe karrierës, t’u kushtonte më shumë vëmendje edhe aspekteve të tjera të jetës time. Unë  e admiroj babanë dhe i besoj atij shumë. Kur mendoj për të, kam dëshirën të kujtoj të gjitha kualitetet e tij të mira. Por, sapo kujtoj ëndrrat e mia, gjithçka shndërrohet, vërtet, në pështirosje. A ka diçka që nuk shkon me mua, pra, a ka diçka që është gabimi im? Në se ka, cili është gabimi? Unë jam e lumtur me marrëdhëniet që kam me djalin që dashuroj, me të cilin thuajse bashkëjetoj. Kam plot miq e shokë që kujdesen për mua. Në fakultet rezultatet i kam  të mira. Nuk kuptoj pse më ndodhin këto ëndrra krejt papritur?. Të lutem më ndihmo! Më orientoni u lutem, se ku mund të kërkoj më shumë, (nuk kam probleme lidhur me gjuhet)? A ka diçka të dokumentuar për këto lloj gjërash? Çfarë është më konkretisht kompleksi i Elektrës? A ka e gjitha kjo ndonjë kuptim tjetër?
Duhet t’u them se me djalin tim, jemi miq shumë të mirë. Unë e dua atë për vdekje, ndonëse, shpërthimi seksual, ndonjëherë, nuk është ashtu siç ka qenë me të dashurit e mi të mëparshëm. Nuk di në se kjo ndodh nga që ne jemi bashkë për dy vjet. Mos vallë jam ftohur unë? Po ato të shkreta ëndrra pse janë kaq të nxehta? Kohët e fundit kam ndjerë gjithnjë e më shumë një lloj apatie seksuale.  Më vjen keq dhe të kërkoj falje për gjithë këto pyetje, por nuk di ku të drejtohem tjetër. Faleminderit.  Ëndërrimtarja

 

 

PËRGJIGJE:

E dashur Ëndërrimtare,

Janë të shumta teoritë që janë përpjekur të interpretojnë ëndrrat. Më të mirënjohurat janë ato të Sigmund Frojdit dhe Karl Jung. Të dy, propozojnë rregulla strikte dhe universale për të zbuluar kuptimin e simboleve dhe ngjarjeve në ëndrrat e një personi. Kompleksi i Elektrës është një nga teoritë e mirënjohura të Frojdit. Ajo ka të bëjë me dashurinë e një vajze për babain e saj dhe dëshira që ajo ka për të vrarë nënën. Karl Jungu shkroi për imazhet dhe arketipat. Në këto rreshta, fare shkurt, do të përpiqem të sjell pikëpamjen më të re për shpjegimin e ëndrrave. Për më shumë informacion do të rekomandoja të lexonit  “ The Interpretation of Dreams” të Frojdit dhe veprat e Jung ”Dreams” dhe  “Memories, Dreams, Reflections

Shumë ekspertë modernë të ëndrrave besojnë, se interpretimi i kujdesshëm i ëndrrave mund të bëhet vetëm nga ai ose ajo që i shikon ëndrrat. Ann Faraday thotë: “udhërrëfyesit më të sigurtë për kuptimin e ëndrrave janë ndijimet dhe gjykimet e vetë personit që shikon ëndrrën, i cili, thellë brenda vetes, e di kuptimin e ëndrrës”. Ëndrrat përfshijnë mendimet dhe ndijimet më të thella e më të brendshme, lidhur me frikërat, shqetësimet, konfliktet dhe probleme të tjera, me të cilat personi nuk vendos të merret kur është i zgjuar.

Ju duhet të dini, se ëndrrat që shihni e mbartin një mesazh. Davaritja e mjegullës dhe qartësia  mendore që vjen pas interpretimit të tyre, do t’u çlirojnë nga shqetësimi emocional. Kjo gjë, me siguri, do ta pasurojë jetën tuaj

Ëndrra përfshin një simbolizëm që ndonjëherë është  konfuz, dramatik dhe me humor, siç ndodh në rastin tuaj. Interpretimi i ëndrrave do të ishte i lehtë, në qoftë se do ta kuptonim ëndrrën si një kopjim të drejtpërdrejtë. Për të gjetur tek ëndrra një mesazh, Ann Faraday, sugjeron të merrni në konsideratë të gjitha hipotezat që ju mendoni se kanë të bëjnë me kuptimin e imazheve dhe situatave në ëndërr. Këtë duhet ta bëni deri sa të gjeni hipotezën më të besueshme, që u duket se është më e drejta. Gjetja e kësaj të vërtete, u jep ndjesinë që ngjan me atë që provoni kur papritur kujtoni diçka që thuhet se ka qenë në “majë të gjuhës tuaj”. Mbani mënd, ëndrra është një mesazh personal që ia jepni vetes kur jeni duke fjetur, sepse mëndja e juaj e zgjuar nuk e dëshiron ose nuk është e aftë ta pranojë atë mesazh. Por, gjithsesi, mesazhi që vjen në ëndërr është pjesë e procesit tuaj mendor, ashtu siç është çdo mendim dhe kujtesë tjetër e juaja.

Fakti i apatisë seksuale që karakterizon marrëdhëniet me dashnorin tuaj, më nxit të mendoj se ëndrrat që ju shihni janë përpjekje që t’u  ndihmojnë, pra, të merreni më seriozisht me jetën tuaj seksuale. Kur ju shkruani “apatike”, unë mendoj pasive. Dhe ëndrrat që shikoni u thonë të bëheni aktive për gjithçka që u shqetëson në marrëdhëniet tuaja. Mbani parasysh, se karakteret në ëndërr nuk përfaqësojnë gjithmonë ata që janë në jetën e vërtetë. Disa shkencëtarë thonë se çdo person në ëndrrat e tij, në të vërtetë, është vetia e tij. Ata sugjerojnë që ju ta rivizualizoni  ëndrrën në kokën tuaj dhe ta vendosni veten në rolin e të gjithë protagonistëve kryesorë të ëndrrës, herë të njërit herë të tjetrit.

Ju duhet ta analizoni ëndrrën me veten tuaj!. Ju mund të bisedoni me shumë njerëz, të trajnuar dhe të pa trajnuar, në përpjekje për të marrë prej tyre kuptimin e ëndrrës tuaj, por kjo nuk do ketë sukses. Të jeni e sigurtë, se përgjigjen më të drejtë për kuptimin e ëndrrës tuaj do ta jepni vetëm ju. Mund të duhet pak punë deri sa të arrini ta kuptoni dhe të veproni në këtë drejtim, por, tashmë, i kemi të gjitha të dhënat për ta bërë këtë.

Për më shumë informacion lidhur me punimet e autores Ann Faraday, ju mund të lexoni “Dream Power” e botuar nga Berkeley Medallion.

Paç fat e shëndet dhe ëndrra sa më të bukura.

Doktori

New York, Mars 8, 2013 (Çdo të diel në DITA)

April 13, 2019 14:06
Komento

Ende pa komente

Ende pa komente!

Je i mirëpritur. Bëhu i pari që komenton këtë artikull. Kujdes etikën.

Komento
Shiko komentet

Komento

Your e-mail address will not be published.
Required fields are marked*