EPIGRAME DHE VARGJE TË TJERA…

Arben Duka April 1, 2016 10:40

EPIGRAME DHE VARGJE TË TJERA…

1. Kjo botë

Kjo botë bërë copë e çikë,
si brekët e një vrome,
kjo botë e vjetër bie erë,
llagëmi dhe kufome.

Kjo botë e shkretë,
ka të vërtetë,
mizerjen dhe shëmtimin,
dhe fallco-fallco,
vetëm fallco,
aromën dhe shkëlqimin.

26.01.1999

 

2. Rrugë e të pabesit

Rrugë e të pabesit,
është si terri,
asnjë dritë,
nuk mundet ta ndriçojë,
ndaj ai,
s’e shikon dot kurrë,
atë që nesër,
shpejt do ta rrëzojë…

1999

 

3. Pa titull

Sa shumë-o njerëz,
në shekuj u sfilitëm,
të gjenim një njeri,
që t’i besonim,
ndaj Jezu Krishtin,
që për ne dha jetën,
dhe të mos ishte,
vetë do ta krijonim…

20.02.1999

 

4. Pa dashuri…

Dhe macja-dhe qeni i shkretë,
kan’ nevojë për pak dashuri,
pa këtë ndjenjë në jetë,
si mund të rrosh-o njeri?!

11.02.1999

 

5. Polemika

Për polemikë-more vëllezër,
me domosdo duhen dy njerëz,
ndaj polemikë s’bëj dot me ty,
s’plotësohet dot numri dy.

01.05.1998

 

6. Pa titull

Ikën për Shqipërinë,
ditët e bukura,
njerëzit lindin dhe vdesin,
si flutura…

Ikën për Shqipërinë,
ditët e mira,
njerëzit lindin njerëz,
dhe rrisin egërsira.

03.12.1998

 

7. Bota do ish më e mirë…

Bota do të ish më me dritë,
për këtë unë bëhem garant,
po të kish më pak hipokritë,
dhe natyrisht më pak injorantë.

11.02.1999

 

8. Njeriu-shkretëtirë…

Zemra jote akull-lagështirë,
s’ka zjarr që ta shkrijë,
sytë e tu terr e errësirë,
s’ka dritë që t’i ndrijë!

Buza jote si qivur i ngrirë,
as qesh e as flet,
s’je njeri-po një shkretëtirë,
s’je për këtë jetë!

Se nga ty njeriu-shkretëtirë,
asgjë s’mund të presësh,
mund të bësh veç një punë të mirë,
sa më parë të vdesësh!

11.02.1999

Arben Duka April 1, 2016 10:40
Komento

1 Koment

  1. dita April 1, 13:45

    i lexoj me dashuri vjershat tende megjithese me hoqe si shok fb u

    Reply to this comment
Shiko komentet

Komento

Your e-mail address will not be published.
Required fields are marked*