Euro arrin nivelin më të ulët nga gushti 2009: Sa do vazhdojë të bjerë?

March 12, 2018 14:04

Euro arrin nivelin më të ulët nga gushti 2009: Sa do vazhdojë të bjerë?

 

Euro ka vijuar të nënçmohet më tej në tregun vendas duke shënuar rishtas rekord të ulët të këmbimit përkundrejt lekut vendas.

Sipas kursit zyrtar të Bankës së Shqipërisë, një euro këmbehej sot me 131.83 lekë, rreth 0.07 lekë më pak se fundi javës së kaluar.

Euro po luhatet në nivelet më të ulëta të nëntë viteve të fundit.

Aktorët kryesorë të tregut tregojnë se monedha e përbashkët ka tendencë që të humbasë pikë përkundrejt lekut me afrimin e datës së pagesave nga biznesi.

Ata argumentojnë se më afrimin e datës 14, e cila është edhe afati i fundit i pagesës së Tatimit mbi Vlerën e Shtuar, euro dobësohet duke qenë se bizneset po thyejnë valutën për të mbyllur detyrimet.

Sipas ekspertëve euro do të jetë e dobët deri me datë 20, afati i fundit për pagimin e sigurimeve.

Ndërkohë që ekspertët shtojnë se deklaratat e Bankës së Shqipërisë për deeuroizimin e ekonomisë është një tjetër faktor që ka çuar euron në nivelet më të ulëta që prej gushtit të 2009-s.

Për shkak të deklaratave të Bankës së Shqipërisë, bankat e nivelit të dytë kanë nisur të marrin masa për uljen e depozitave dhe kredive në valutë të huaj.

Historikisht, në 3 muajt e parë të vitit monedha e përbashkët kapte nivelet më të larta të këmbimit me lekun në tregun vendas, kryesisht për shkak të transferimit të fitimit të kompanive me kapital të huaj në vendet mëmë.

Ndryshe nga herët e kaluar, fitimet kanë qenë më të ulëta, ndërsa oferta në valutë në treg ka qenë tepër e lartë, aq sa ndikimi ka qenë i papërfillshëm.

Ekspertët presin që me afrimin e efekteve sezonale, ardhja e turistëve të huaj dhe fluksi i emigrantëve, euro do të nënçmohet edhe më tej, pavarësisht ecurisë në tregjet ndërkombëtarë.

Megjithatë, monedha e përbashkët europiane ka ruajtur qëndrueshmërinë e saj në tregjet europiane. Sipas Financial Times euro këmbehej me 1.231 dollarë, 0.02 më pak se niveli më i lartë i tre viteve të fundit.

Një dollar është këmbyer sot me 107.02 lekë, rreth 0.16 lekë më pak se të premten sipas kursit zyrtar të Bankës së Shqipërisë.

Dollari po luhatet në nivelet më të ulëta që nga 2008-a duke reflektuar edhe nivelin e dobët të monedhës së gjelbër në tregjet ndërkombëtare. /Monitor

a.s/dita

March 12, 2018 14:04
Komento

2 Komente

  1. Vito nga Napoli qe solli kermij dhe buaj March 12, 15:42

    Bankat tani blejne euro pa bere shume zhurme.

    Reply to this comment
  2. sulo Permeti March 13, 00:33

    Gjyqaret dhe prokurore,po blejne me shpejtesi,nga 2-3 apartamente ne tirane,kuptohet ne euro,me emra miqsh,sepse pallatet ne ndertim ,nuk jane ende te hipotekuar,pra ne deklarimet e pasurise ,nuk perfshihen-keshtu deklaron nje agjent imobilar ne tirane.

    Reply to this comment
Shiko komentet

Komento

Your e-mail address will not be published.
Required fields are marked*