Forumi në Paris, Rama: Çfarë na bashkon me Serbinë

September 2, 2017 11:32

Forumi në Paris, Rama: Çfarë na bashkon me Serbinë

Nga ‘Global Positive Forum’ që u mbajt dje në Paris, kryeministri Edi Rama foli për marrëdhëniet me Serbinë. Teksa theksoi se një ndër prioritetet e qeverisë së tij është anëtarësimi në BE, Rama nënvizoi faktin se ka më shumë gjera që bashkojnë Shqipërinë me Serbinë.

“Më lejoni t’ju them se sot, Shqipëria e Serbia kanë shumë më tepër gjëra që na bashkojnë se gjëra që na ndajnë, edhe pse kjo dukej e pamundur deri vetëm pak kohë më parë, në momentin kur unë u bëra Kryeministër, përpara pak vitesh. Një prej gjërave që kemi të përbashkët është besimi në vlerat e BE-së dhe dëshira për të qenë pjesë e saj.

Edhe një herë, siç e kam thënë me admirim dhe përulje, nuk besoj se njerëzimi ka njohur ndonjëherë në historinë e tij një program ekonomik e politik më ambicioz se BE-ja. Procesi për të arritur deri këtu ka qenë i trazuar, ka tejkaluar kriza të mëdha, ka njohur shumë ulje e ngritje, si Brexit në këtë moment. Në këtë çast jemi në një pikë të ulët, por projekti europian nuk është ndërprerë dhe nuk do të ndërpritet ndonjëherë, besoj unë.

Ne e duam Europën, ne duam t’i përkasim Europës dhe ne duam që të vazhdojmë të kontribuojmë për rritjen e këtij suksesi të pabesueshëm që përfaqëson BE-ja dhe duke thënë këtë, nuk flas vetëm për shqiptarët, por për të gjithë vendet e Ballkanit Perëndimor”, theksoi Rama.