Helmimi në mitingun e PD-së, reagon QSUT-ja: 76 qytetarë të paraqitur, 5 prej tyre mbahen në vëzhgim

Nga Arkiva

• Pashka ortodokse, besimtarët luten për paqe e mirësi 9 28.Apr
• Kryemadhi: Romana Vlahutin iku me xhepa të fryrë nga Shqipëria 10 07.Feb
• Dita botërore e zemrës, Beqja: Kontroll kombëtar grupmoshave të rrezikuara 1 29.Sep

Pas helmimit të qytetarëve pjesëmarrës në protestën e opozitës ka reaguar dhe QSUT.

Në njoftimin e saj thuhet se janë paraqitur në spital 76 persona, 5 prej të cilëve mbahen akoma nën vëzhgimin e mjekëve.

Një nga personat që është lënduar ka qenë dhe kreu i partisë Demokratike Lulzim Basha.

Ai është paraqitur me urgjencë drejt spitalit francez në orët e para të mëngjesit të sotëm.

Njoftim për shtyp

Qendra Spitalore Universitare “Nënë Tereza” Tiranë, njofton se në Urgjencën e Spitalit Francez nga orët e para të mëngjesit të ditës së dielë deri në orën 11.00, janë paraqitur 76 qytetarë të cilët paraqisnin ankesat në vijim: skuqje të fytyrës dhe syve, lotim, kruarje të syve dhe rrufë.

Të gjithë qytetarët referojnë se gjatë mbrëmjes së djeshme kanë marrë pjesë në aktivitetin e Partisë Demokratike.

Drejtoria e QSUT në bashkëpunim të ngushtë me Ministrinë e Shëndetësisë dhe stafin mjekësor të Shërbimeve të QSUT, morën menjëherë masat për trajtimin e këtyre pacientëve.

Aktualisht, 5 pacientë po mbahen në observim në pavionin e Okulistikës nga një ekip multidisiplinar mjekësh specialistë. Gjendja e tyre shëndetësore paraqitet e mirë, pa komplikacione të rëndësishme.

Drejtoria e QSUT ka vënë në dispozicion të Institutit të Mjeksisë Ligjore të gjithë dokumentacionin e kërkuar për të sqaruar shkaqet e këtyre simptomave.