Hidhet shorti i Botërorit 2018, ndeshja hapëse Rusi-Arabi Saudite

December 1, 2017 17:04

Hidhet shorti i Botërorit 2018, ndeshja hapëse Rusi-Arabi Saudite

Ka nisur në pallatin presidencial të Kremlinit, në Moskë, ceremonia zyrtare e hedhjes së shortit të Kupës së Botës, që do të zhvillohet verën e ardhshme në Rusi.

 Në fillim të ceremonisë, nga një fjalë përshëndetëse kanë mbajtur presidenti rus Vladimir Putin, si dhe kreu i FIFA-s, Gianni Infantino.

“Rusia ka një pasion të jashtëzakonshëm për futbollin dhe ka shumë futbollistë të shquar të spikatur gjatë brezave të shkuar, ishin fjalët e para të Putinit.

“Trofeu më i lakmuar do të fitohet nga ekipi që do të tregojë më shumë vendosmëri. Do të doja t’iu uroja suksese të gjitha ekipeve pjesëmarrëse, ndërkohë që u bëj thirrje të gjithë tifozëve besnikë të vijnë në Rusi dhe të shijojnë finalet e Botërorit të vitit 2018”, tha ndër të tjera Putin.

Pas tij ishte Gianni Infantino që iu uroi mirëseardhjen të gjithëve, nga figurat më të shquara të futbollit si Pelè e Maradona, e deri te përfaqësuesit e kombëtareve pjesëmarrëse.

“Faleminderit popullit rus që ka punuar kaq shumë dhe kaq fortë në 7 vitet e fundit për të na çuar një hap më pranë turneut final. Faleminderit 11 qyteteve mikpritëse që kanë bërë një punë të jashtëzakonshme. Skena tashmë iu përket legjendave të futbollit, e teksa jemi ngjitur në këtë podium, duam t’i ftojmë këta artistë të festojnë për futbollin anembanë botës. Shijim të këndshëm shortit dhe fillim të mbarë kompeticionit më të lakmuar të futbollit, verën e ardhshme këtu në Rusi”, tha presidenti Infantino.

Menjëherë më pas zbriti Miroslav Klose, golashënuesi më i mirë i të gjitha kohërave në kampionatet botërore, i cili dorëzoi trofeun origjinal të Kupës së Botës, për të cilin do të vihen në garë 32 kombëtare deri në ngritjen e saj në korrik të 2018-s.

“Ky trofe ka një domethënie të magjishme. Shumë futbollistë të mëdhenj e kanë mbajtur këtë trofe në duart e tyre. Besoj se ishte një moment magjik edhe për mua që e mbajta për kaq kohë në duar”, u shpreh Miroslav Klose, kampion bote në fuqi me Gjermaninë.

Goglat e shortit përcaktuan që ndeshja hapëse e Botërorit të zhvillohet mes Rusisë dhe Arabisë Saudite, ndërkohë që rezervuan një “grup ferri” për Spanjën dhe Portugalinë, dy kombëtaret iberike që do të luajnë të parën përballje të grupit të tyre B.

Në grupin A, ku bëjnë pjesë organizatorët e këtij turneu do të jenë edhe Egjipti dhe Uruguaji.

Gjermania kampione bote në fuqi do të duhet të masë forcat me rivalë të konsideruar të lehtë në letër, pasi në grupi F do të ketë si kundërshtarë Meksikën, Suedinë që eliminoi Italinë dhe Korenë e Jugut.

Argjentina e Lionel Messit, finaliste e Botërorit të kaluar të Brazilit, do të ketë 4 kundërshtarë me tipare teknike të ndryshme, teksa do të përballet me Islandën, “hirushen” e Europës, sikurse edhe me Kroacinë dhe Nigerinë, me këtë të fundit që i mposhti me një përmbysje të bujshme nga 2-0 në 2-4 në miqësoren e zhvilluar pak javë më parë.

Grup i lehtë në letër edhe për “gjelat” e Francës, që shohin si kundërshtarin më të vështirë vetëm Danimarkën, ndërsa në grupin C do të kenë edhe Perunë e Australinë.

Panamaja, debutuesja e këtij Botërori, është radhitur në grupin e fundit G, aty ku do të sfidojë Belgjikën dhe Anglinë nga Europa, si dhe Senegalin nga Afrika.

Brazili do të ketë përballje të vështira, pasi përveç Kosta Rikës, do t’i duhet të triumfojë edhe përballë Zvicrës dhe Serbisë për të siguruar kualifikimin nga faza e grupeve.

Grupi A – Rusia, Arabia Saudite, Egjipti, Uruguaji.
Grupi B – Portugalia, Spanja, Maroku, Irani.
Grupi C – Franca, Australia, Peruja, Danimarka.
Grupi D – Argjentina, Islanda, Kroacia, Nigeria.
Grupi E – Brazili, Zvicra, Kosta Rika, Serbia.
Grupi F – Gjermania, Meksika, Suedia, Koreja e Jugut.
Grupi G – Belgjika, Panamaja, Tunizia, Anglia.
Grupi H – Polonia, Senegali, Kolumbia, Japonia.

December 1, 2017 17:04
Komento

Ende pa komente

Ende pa komente!

Je i mirëpritur. Bëhu i pari që komenton këtë artikull. Kujdes etikën.

Komento
Shiko komentet

Komento

Your e-mail address will not be published.
Required fields are marked*