Homazhet për Ibrahim Bashën, krerët e shtetit: Dora e pabesë do të ndëshkohet

June 25, 2015 15:20

Homazhet për Ibrahim Bashën, krerët e shtetit: Dora e pabesë do të ndëshkohet

Kryeministri Edi Rama ka bërë vlerësimet maksimale në homazhet në nder të efektivit të vrarë një ditë më parë në Lazarat.

“Ibrahimi sot do të varroset si dëshmor në kohë paqeje. Jemi sot këtu që ta nderojmë atë, edhe pse nderimi ynë nuk mund t’i kthejë atij të ardhmen që ia morën. Jeta e tij ndaloi për shkak të detyrës, ndaj ne jemi këtu për ata që sakrifikojnë jetën e tyre për një vend më të sigurt”, ka thënë Rama.

Ai është shprehur se, të gjithë njerëzit e mbledhur sot në këto homazhe ndodhen përpara një heroi, “provë e gjallë e një vlere të paçmuar, që duhet të na kujtojë se paqja nuk është dhuratë e zotit, por përkushtim dhe sakrificë i njerëzve që nuk i njohim”.

“Ndaj përulem me ndjenjën më të thellë të respektit përpara prindërve dhe familjes së Ibrahim Bashës”, ka thënë Rama.

Tahiri: Sfidat na bëjnë më të fortë

Goditja e ligjit për këdo që ka guxuar apo guxoi të vërë dorë mbi shtetin dhe Policinë e Shtetit. Kështu u shpreh ministri i Brendshëm Saimir Tahiri, në homazhet e zhvilluara për efektivin e RENEA-s, Ibrahim Basha.

“Sfidat na bëjnë më të fortë, vështirësitë na e bëjnë rrugën më të qartë”, tha Tahiri.

“Thonë se heronjtë njihen kur flenë nën dhe, po ti ishe hero dhe për së gjalli me shokët e tu, të vendit tënd dhe të huaj. E gjithë Shqipëria u shtang se dora e krimit dhe terrorit të mori jetën, këtu në vendin tënd, ku luftë nuk ka, po ku për më shumë se dy dekada ka pabesi të pashoqë që kanë mbjellë plagë të neveritshme në trupin e vendit tonë, siç është dhe fshati ku ca kriminelë të morën jetën ty. Luftove për të bërë të lirë e të sigurtë vende të tjera e popuj të tjerë, po jetën tënde e dhe për popullin tënd, këtu në vendin tonë”, vijoi ministri.

Tahiri u shpreh më tej: “Dora e pabesë që u ngrit mbi ty ka mbi dy dekada që rritet për t’i bërë karshillëk Shqipërisë, për të sfiduar shtetin, ligjin, drejtësinë. Ajo dorë mori jetën tënde, në atë fshat plot me njerëz të ndershëm, po ku kanë mbetur ende disa kriminale të përdorur. Në atë fshat që vjet e çliruam nga droga e krimi po që nuk kemi mbaruar ende. Ti dhe shokët e tu dini diçka që nuk e thoni kurrë, dini diçka që publiku nuk e di shpesh, krimit i mjafton të ketë sukses një herë në 100 apo 1000 raste, ndërsa policisë i duhet të ketë sukses çdo herë. E djeshmja ishte dita jote e pafat, Ibrahim. Na kanë vrarë të gjithëve nga pak, ajo dorë ka goditur shtetin”, tha Tahiri.

Lu: Në emër të SHBA, mirënjohje Ibrahim Bashës

Ambasadori i SHBA, Donald Lu, duke folur në homazhet në nder të efektivit Ibrahim Basha, ka vlerësuar maksimalisht kontributin e tij në misionet paqeruajtëse.

“Ne nderojmë kontributin e nëntetar Ibrahim Bashës në Irak e Afganistan. Ai ka marrë medalje për shërbimin e ofruar në këto misione të rrezikshme”, ka thënë Lu.

Në emër të NATO-s dhe Shteteve të Bashkuara, ai i ka shprehur ngushëllimet familjes së tij dhe shqiptarëve.

Meta: Shteti të reagojë me forcën e drejtësisë

Kreu i Kuvendit, Ilir Meta, në fjalën e tij është shprehur se, Ibrahim Basha e kreu me nder detyrën e tij, ndaj meriton nderim dhe mirënjohje të përhershme.

“Ti dhe kolegët e tu na keni bërë krenarë me kontributin tuaj. Fatkeqësisht, terrorizmi goditi në mënyrë të pabesë. Eshtë detyra jonë, e shtetit dhe shoqerisë, të vendosim drejtësi”, ka thënë Meta.

Ai ka shtuar se, “kjo sakrificë sublime duhet të shërbejë për të krijuar një shoqëri të drejtë dhe një drejtësi të fortë”.

June 25, 2015 15:20
Komento

1 Koment

  1. protesilahu June 25, 16:51

    Kur flet edhe meta per drejtesi e per nje shoqeri te drejte,mos mbette hajdut e kriminel pa u dekoruar me medalje mirnjohjeje kombetare.-Kush do t’ja u ruaje keshtjellat dhe pasurine kolosale qe kane bere keta jake bardhet keto 25 vjet ?- Ne popullit te thjeshte na vjen keq per nje njeri qe iken pa faj,por jo per te mbrojtur kasten ne pushtet dhe te ardhmen e tyre.Keta kriminele pas pak ditesh do shkojne me pushime neper plazhet me te bukura te botes ,me familjet apo dashnoret e tyre dhe do t’a harrojne pergjithmone te vrarin,te cilit sot po i bejne omazhe me maska ne surat.-Politikanet,gjyqtaret,prokuroret,doktoret,ministrat,drejtoret,tenderistat,keta jane kriminelet e vertete,keta nuk i ze plumbi,nuk i vret opinioni,nuk skuqen per asgje,keta te vrasin naten e te qajne diten,s’ic po bejne sot mbi kufomen e te ndjerit Basha….

    Reply to this comment
Shiko komentet

Komento

Your e-mail address will not be published.
Required fields are marked*