Këmbët e gjarprit të Veton Surroit

Nga Dilaver Goxhaj August 14, 2014 17:40

Këmbët e gjarprit të Veton Surroit

Rreth librit të fundit i Veton Surroit, “Këmbët e gjarprit”, i botuar në pragun e zgjedhjeve të 8 Qershorit 2014, në Kosovë, ka tërhequr së shumti vëmendjen e mediave kosovare, si dhe ka pas reagime nga më të ndryshmet, deri edhe një ceremoni televizive të djegies së disa kopjeve të atij libri, duke i krijuar mundësinë autorit të thoshte se këta njerëz nesër me siguri do të veshin këmishat e zeza. Të gjitha këto ngjarje, por edhe shkrimet kundër librit, i kanë bërë librit një publicitet shumë të madh, duke tërhequr vëmendjen e gjithë opinionit publik, ndaj dhe ka patur një seri botimesh brenda një muaji. Kështu ndodhi edhe me mua, prandaj iu luta një mikut tim në Prishtinë të mund të ma siguronte një kopje të tij.

Dilaver Goxhaj

Dilaver Goxhaj

Qysh sa libri të bie në dorë, të tërheq vëmendjen  nëntitulli që autori i ka vënë librit: “Shënime heretike”! Dhe, kur vetëm pasi ke përfunduar pjesën e IV të tij, e kupton se pse autori i ka vendosur këtë nëntitull librit, i cili mund të quhet një roman politik dokumentar. Them dokumentar, pasi personazhet e tij janë realë si dhe mbështetet në ngjarje reale, sikundër është Konferenca e Rambujesë, ku edhe autori ka qenë pjesë e atij samiti. Autori e quan vepër heretike, për faktin se është i bindur, ose ka dëshirë të thirret i tillë prej lexuesit, ngaqë me vetëdije del në kundërshtim me historinë e vërtetë e të trajtuar për UÇK-në deri sot, veçanërisht kundër disa drejtuesve të saj. Si i tillë, autori i shkel, si pikëpamjet gojore, (që ai i quan folklorike) dhe ato çfarë janë shkruar deri tash për UÇK-në, por duke dalë në kundërshtim edhe me normat panegjerike të vendosura deri tani mbi historinë e UÇK-së, e cila është një çështje mjaft e ndjeshme për shumicën absolute të opinionit popullor shqiptar brenda e jashtë Kosove. Si i tillë, Veton Surroi del jashtë kësaj praktike për këtë histori të deritashme, të cilën e quan një dogmë. Për këtë qëllim ai e vetëquan veprën e tij herezi, ngaqë është pozicionuar me vetëdije kundër kësaj historie të njohur e të saktë për UÇK-në.

Por, e meta kryesore e autorit në këtë libër heretik historik dokumentar dhe politik qëndron në faktin se ai edhe pse mundohet të bëjë histori, në fakt bën politikë dhe jo histori, duke shfrytëzuar me mjeshtëri artistike shumë fakte që i ka përjetuar vetë ose ka qenë protagonist i tyre; dhe, së dyti, ai i përzien qëllimisht dy periudhat historike, krejt të ndryshme me njëra-tjetrën: Periudhën e Luftës Çlirimtare në Kosovë, (që shumë autorë kosovarë kanë dëshirë ta quajnë “Lufta e UÇK-së” dhe jo Lufta Çlirimtare e Popullit Shqiptar në Kosovë), duke e mpleksur atë edhe me periudhën e pasluftës, për të cilën mendoj se  bën një analizë politiko-ekonomike të përafërt me realitetin, prandaj dhe në këtë të dytën dakordohet edhe Albin Kurti. Vetoni, qëllimisht e bën këtë mpleksie periudhash, me qëllim që të sfumojë sa të jetë e mundur periudhën e asaj lufte çlirimtare.

Unë nuk kam ndërmend të merrem me të dy periudhat që mpleks autori në këtë libër, as me protagonistët realë historikë që ai i vë në spikamë dhe që jetojnë ende dhe që janë tepër aktivë në politikë, pasi ajo është e drejtë e vetë atyre si dhe e biografëve dhe e kalemxhinjve të tyre të mirëpaguar; por do të merrem me atë pjesë, në të cilën Veton Surroi trajton UÇK-në, ku edhe unë kam qenë për një periudhë goxha të mirë pjesëtar i formacioneve të saj në terrenin e Kosovës. Si i tillë e kam të drejtë dhe detyrë të replikoj, pasi kam qenë edhe kuadër i lartë ushtarak i asaj Ushtrie Çlirimtare.

Qysh në fillim dua të them se autori ka gjetur një stil dhe gjuhë të tillë në trajtimin e librit, që është për ta patur lakmi. Kjo është edhe një nga arsyet kryesore pse libri “Këmbët e gjarprit” ka pasur disa botime. Dhe ai nuk e ka zgjedhur rastësisht këtë lloj trajtese artistike, me qëllimin e vetëm që të bëhet i besueshëm për gjithçka ai shkruan dhe të mbahet mend gjatë në kujtesën e lexuesve dhe, pa dyshim, për të nxjerrë sa më shumë përfitim material dhe moral për veten e vet. Dhe këtyre qëllimeve mendoj se ia ka arritur jo pak.

Përsa i përket UÇK-së ai mundohet ta eliminojë krejtësisht ekzistencën e saj, jo vetëm si emër, por ta bëjë mundësisht të urrejtshme për brezat e lindur pas asaj lufte, si dhe ta shumëzojë me zero gjithë aktivitetin luftarak të saj, duke mos shprehur as edhe një fjalë të vetme për mijëra dëshmorë të saj, që dhanë jetën për lirinë e popullit ku vetë autori është pjesë e tij. Dhe këtë e ka bërë në mënyrë graduale e mjeshtërore.  Kija inatin, por jepi hakun. Mirëpo, me këtë mohim të kontributit madhor të UÇK-së, Surroi e vendos veten përkrah Rugovës, edhe pse gjatë gjithë kohës së tij si publicist ai e ka anatemuar Rugovën. Por, mesa duket, duke shkruar me urrejtje patologjike për Hashim Thaçin dhe vëllezërit siamezë të tij, ndërgjegja e Vetonit është bërë gjithnjë e më shumë negativiste dhe, për inerci, UÇK-në e personalizon tek Hashim Thaçi, Jakup Krasniqi e Azem Syla. Si rrjedhojë, urrejtja ndaj këtyre personave e bën të pakujdesshëm dhe negativist, duke e çuar në mohimin total ekzistencën dhe kontributin madhor të UÇK-së.

Shtrohet pyetja: Për herë të parë del Veton Surroi me këtë tezë të mohimit të UÇK-së, ndaj dhe pati aq reagime të ashpra nga intelelektualë dhe disa ish luftëtarë të UÇK-së? Faktet tregojnë se jo. Veton Surroi këto mohime të vlerave të UÇK-së i ka bërë publike edhe në letrën e hapur dërguar simbolit të rezistencës, Adem Demaçit, në fillim të vjeshtës së parë të vitit 2002, botuar në gazetën e tij “Koha ditore”. Por çuditërisht, përveç drejtuesit të Radio Kosova e Lirë, të gjithë të tjerët në Kosovë heshtën atëherë, duke u justifikuar si puna e priftit: larg b….. sime. Unë ndoshta nuk do të them më shumë se sa ka trajtuar për luftën e popullit shqiptar në Kosovë dhe për UÇK-në baca Adem, në përgjigjen që i dha atëherë Veton Surroit, por është rasti ta citoj bacën, kur i thotë: “Një ego e tillë si ti ka kapacitet të mjaftueshëm që të bëjë njëqind maskarallëqe, që t’i bëjë njëqind sherre Kosovës, vetëm e vetëm që të nxjerrë fitime për veten e vet dhe, i cili, me çdo kusht po mundohet të zbukurojë imazhin e vet të rremë para qytetarëve të Kosovës dhe të botës”. Dhe, çuditërisht, me librin “Këmbët e gjarprit” u vërtetua përcaktimi i zotit Demaçi!

Duke qenë se Vetoni ka shkruar për UÇK-në qysh në vitin 2002, nuk ka të drejtë që të kritikojë në këtë libër Jakup Krasniqin e t’i thotë se ngutet të shkruajë pas shtatë vjetësh për historinë, (f.23), ngaqë botoi “Kthesa e madhe” në vitin 2006, duke e këshilluar që të priste të paktën 20 vjet. Kjo jo vetëm që tregon një lajthitje të tij, por bie në grackën e asaj që ai akuzon Hashim Thaçin: “Do të thotë, do ta posedojë historinë. Do të thotë, do ta konsiderojë historinë pronë,” (f.25). Me këtë, Vetoni kërkon të na thotë se, vetëm Vetoni ka të drejtë të shkruajë historinë e periudhës së asaj lufte, ngaqë ka qenë i përkëdhelur nga diplomatët perëndimorë si dhe firmëtari i parë entuziast në Rambuje për eliminimin e UÇK-së, për të cilën edhe mburret në letrën dërguar Adem Demaçit. Prandaj dhe na thotë: “Ai që shkruan më shpejt, e posaçërisht ai që shkruan nga pozitat e së vërtetës zyrtare, do që ta ketë historinë për vete. Do të thotë, do që të posedojë historinë. Do të thotë, ta konsiderojë historinë pronë.” (f.25)

Por, të befason fakti se si nuk pati në vjeshtën e vitit 2002 dhe as sot asnjë lloj reagimi nga protagonistët e UÇK-së, që Vetoni i ka vënë në piskamë! Këtu qëndron edhe enigma e “suksesit” të Vetonit, tek ai mosreagim, të cilët e lanë Demaçin të vetëm në përballjen me Surroin, pavarësisht se Demaçi në replika të tilla është sa për njëqind sosh. Vetoni, duke marrë zemër nga ai mosreagimi i atëherë i ish drejtuesve të lartë politikë e ushtarakë të UÇK-së, e thellon urrejtjen kundër Adem Demaçit, duke e barazuar me veten e tij: “Demaçi nuk ishte UÇK-ja; ishte si gjithë ne të tjerët”, f.47), si dhe na hedh tullumbacen tjetër, duke e krahasuar UÇK-në me katalizatorin në reaksionet kimike: “UÇK-ja ka qenë ajo përbërje “substancash” që ka ndryshuar shpejtësinë e reaksionit kimik, pra ka ndikuar në shpejtësinë e çlirimit, ndonëse nuk ka sjellë ndonjë energji a marrë pjesë në të”, f. 89). Ne, dëshmitarët okularë, midis tyre dhe unë, si një prej drejtuesve dhe luftëtarëve aktivë në terren, në luftë me ushtrinë dhe policinë serbe, si oficeri kryesor në mbajtjen e bashkëveprimit midis UÇK-së dhe aviacionit të NATO-s, e hedh poshtë me fakte këtë  minimizim të kontributit të UÇK-së për çlirimin e Kosovës.

Së pari dua t’i them Veton Surroit se është vetë presidenti i SHBA-aq, Bill Klinton, i cili më 23 Maj 1999 i tha kombit amerikan: “Ushtria Çlirimtare e Kosovës po shtohet dita ditës, ajo ka filluar të ndërmarrë ofensiva kundër forcave serbe..”, ndërsa Komandanti i NATO-s, Uesli Klark pohon, duke thënë: “UÇK-ja, shpesh i detyronte forcat serbe të dilnin në terren të hapur, ku kishim mundësi t’i sulmonim ato”( “Të bësh luftë moderne”, Prishtinë, 2003, f. 372). Ndërsa Ministri i Mbrojtjes së SHBA, z. Cohen, po në 16 Prill 1999 thoshte: “Millosheviçi mund të mendojë se e ka eleminuar UÇK-në, por gabon”, (Eilen Yan: “High Risk of Casualties”, Newsday, 16 Prill 1999). Po të mos qe UÇK-ja me luftën e saj “NATO-ja, sipas të gjitha gjasave, nuk do të kishte mundur të mbijetonte në formën ekzistuese”, shton po në atë vazhdim Uesli Klark, (po aty, f.18). Vetëm këto citime besoj se e rrëzojnë konstatimin e shtrembër qëllimor të Vetonit për UÇK-në, duke e krahasuar me katalizatorin që ndihmon, por që nuk merr pjesë në reaksion. Dhe, shpërblimi i pasluftës për UÇK-në është kjo që gëzohesh ty, zoti Veton, dhe ata që e tradhëtuan atë pas lufte: Në arrest!

Por që ta bëni edhe më të bindshëm etiketimin tuaj për UÇK-në si katalizator për çlirimin e Kosovës më pas shpreheni: “Çlirimin e Kosovës e kanë bërë forcat e NATO-s. Ushtria serbe është tërhequr nga Kosova në sajë të bombardimit të NATO-s dhe hyrjes së këmbsorisë së KFOR-it, e jo për shkak të veprimeve të UÇK-së”, (f.79). Më çudit fakti se në këtë pikë puqeni me Kadarenë, i cili, në kohën që Rugova i dha titullin “Honoris cauzus” në Prishtinë, e drodhi, shprehu të njëjtin mendim si dhe ju tashti: “Kosovën nuk e çliroi UÇK-ja, por Evropa Perëndimore”.

Që ta kuptosh edhe më mirë që jini gabuar rëndë në këtë konstatim, zoti Veton, po të jap një pjesë të përgjigjes që i kam dhënë atëherë Kadaresë, për këtë lloj deklarate të ngjashme me tuajën, në librin tim “UÇK-ja dhe Kadare-ja”, pasi jam i bindur se nuk e ke lexuar, ngaqë ju lexoni vetëm Vetonin dhe asnjë autor tjetër: “Zoti Kadare, të thuash: Kosovën e çliroi Europa Perëndimore dhe askush tjetër, është ekstremizëm i mbështetur në parimet e servilizmit pacifist. Të thuash: Kosovën e çliroi UÇK – ja dhe askush tjetër, është ekstremizëm i mbështetur në mosmirënjohjen njerëzore dhe kapadaillëk. Çdo ekstrem, është i papranueshëm dhe i dëmshëm. Prandaj, le të kemi kurajon e të themi të vërtetën: Kosovën e çliroi bashkëveprimi luftarak midis UÇK-së dhe NATO-s, të  paraprirë nga SHBA-të.

Ju, zoti Kadare, e dini më së miri se NATO-ja veproi vetëm përmes ajrit, me aviacionin e saj luftarak. Mirëpo  nuk besoj ta dini se aviacioni luftarak i frontit, (ai që godet forcat dhe mjetet luftarake të kundërshtarit në fushën e luftimit, betejës), nuk mund të realizojë në kohë asnjë lloj goditje të saktë kundër objektivave tokësorë taktikë të armikut, pa iu dhënë shenjë tregimi nga toka ose nga aviacioni – helikopter i tij, që qëndron në afërsi të vijës së frontit, por që rrezikon të asgjësohet nga momenti në moment. “Zotërimi i ajrit është i parëndësishëm, në rast se forcat ajrore nuk kanë një shenjëtregim të saktë”, thuhet pothuajse në të gjitha doktrinat ushtarake të sotme. Dhe ky është një parim ushtarak, zoti Kadare,cqë juve iu falet të mos e dini. Këtu, mendoj unë, është një nga burimet e pozicionimit tuaj mohues ndaj UÇK-së, duke i hequr asaj të drejtën e të qenit çlirimtare.

Detyrën e shenjëtregimit për aviacionin e NATO-s, e kryenim ne, UÇK-ja, zoti Kadare, duke iu dhënë atyre koordinatat për objektivat ushtarakë tokësorë serbë të lëvizshëm e të palëvizshëm, me saktësi të lartë dhe, madje, jo një herë, por disa herë gjatë gjithë ditës e gjithë natës, pa pushim, në çdo dy-tre orë, falë ndërlidhjes moderne me të cilën na kish pajisur Gjermania. Për këtë veprimtari të dendur, kemi edhe dokumente, pavarësisht se ato, Shtabi i Përgjithshëm i TMK-së nuk i ka dorëzuar në asnjë arkivë të Kosovës apo të Shqipërisë dhe, në kundërshtim me rregullat e ruajtjes së dokumenteve luftarake, janë marrë disa herë nga ushtarët e KFOR-it, gjoja për verifikim, sa që tani,  vetëm një zot e di se ç’është bërë e ç’po bëhet me to. Do të ishte mirë për historinë e popullit tonë, që ato dokumente të shumëfishoheshin duke i botuar, për qëllime të tilla përdorimi, ndërsa origjinalet të dorëzoheshin në Arkivin e Kosovës qysh në korrik të vitit 1999, porsa mbërritëm në Prishtinë dhe të mos mbaheshin dosido nëpër sirtarë, aq sa sot  janë dhënë edhe shenja se po vihet dorë në to…

Ndoshta u zgjata pak, zoti Kadare, por ua përmenda këto mori faktesh dhe argumente për t’u treguar juve dhe gjithë atyre që nuk e njohin UÇK-në dhe luftën e saj, jo vetëm se çfarë lufte të suksesshme bëri UÇK-ja, por edhe për t’u thënë se ajo gjysma e popullit shqiptar të Kosovës, gati një milionë që nuk e la Kosovën nga që pati besim te UÇK–ja dhe e ndau fatin me të, nuk u zhgënjye nga ushtria e vet, pasi ajo e mbrojti popullin e saj denjësisht dhe e justifikoi besimin dhe ndihmën e popullit edhe pse ishte shumë herë më inferiore në numër dhe armatim ndaj kundërshtarit me të cilin luftoi. Gjithashtu po u dëshmoj për të bindur juve dhe të tjerët se UÇK–ja ishte njëri prej faktorëve kryesorë që ia bëri Serbisë të pamundur qëndrimin në Kosovë.

Por, shumë më mirë e më saktë se unë, vetë ju, zoti Kadare, i nxirrni në pah  vlerat e UÇK-së, sidomos  tek libri “Shqiptarët në kërkim të një fati të ri”,  f. 32: “Ishte UÇK-ja ajo që i ra kambanës së alarmit për të zgjuar gjithë planetin. Ishte ajo që u vra e u copëtua për t’i bërë të qartë botës se ç’po ndodhte në Kosovë. Ishte ajo që duke shërbyer si pararojë e NATO-s, arriti të tërhiqte makinën e rëndë ushtarake të saj në vendin e harruar që quhej Kosovë…”. “Për çlirimin e Kosovës, vazhdoni në f. 54, midis popullit shqiptar dhe Aleancës Atlantike u sajua ai bashkim i çuditshëm, ku shpenzimin më të vjetër të luftës, gjakun, e vuri populli i paktë shqiptar, kurse armët, NATO-ja e fuqishme.”,(shih “UÇK dhe Kadare”, Prishtinë, 2004, f.144-145). Mirëpo, të befason fakti që këtij mohimi të kontributit të UÇK-së në çlirimin e Kosovës, që po e thekson Veton Surroi tash në librin e tij “Këmbët e gjarprit”, i ka paraprirë me kohë zoti Xhavit Haliti, duke e përsëritur tre herë rresht, brenda 14 vjetëve: fillimisht në Korrikun e viti 1998, kur është takuar në Tiranë me Vetonin dhe Blerim Shalën; për herë të dytë në Tetorin e vitit 1999, kur dha intervistën e parë tek “Zëri” i Blerim Shalës si dhe në Korrikun e vitit 2013, duke thënë: “Ne nuk mund ta fitojmë luftën. Orientimi ynë është që përmes rezistencës të krijojmë rrethana që pakti i NATO-s të vijë në Kosovë…”. Prandaj, edhe unë, si kushdo që i ka ndjekur këto zhvillime, i bëj pyetje vetes: pse nuk pati reagime si në rastin kundër Surroit, kur Xhavit Haliti e ka thënë këtë mohim të UÇK-së tre herë rresht e me zë edhe më të lartë se Veton Surroi? Prandaj, ata ish luftëtarë të UÇK-së, që u indinjuan nga libri i Vetonit dhe dogjën demonstrativisht disa kopje të tij, nuk duhet të kenë dy lloj kandarësh (peshoresh) për të njëjtën dukuri (fenomen). Po ashtu, pse nuk reaguan as këta të indinjuarit e fundit as edhe ata që mundohet t’i fyej Veton Surroi, kur Jakup Krasniqi, në vitin 2006 shkruajti në librin “Kthesa e madhe”: “Lufta Guerile e tipit “sulm e tërheqje nga vendi i ngjarjes”, u tregua e dëmshme, sepse armiku po hakmerrej mbi popullsinë civile… Veprimi kësisoj ishte i detyrueshëm sepse Ushtria Çlirimtare e Kosovës do të përballej tash e tutje jo vetëm me luftën, por edhe me ruajtjen dhe evakuimin e UÇK-së.” Si do të çlirohej Kosova, duke u mbrojtur për vete apo duke e sulmuar ushtrinë serbe?

Që Veton Surroi fillimisht ka pas besim tek UÇK-ja, këtë e thekson disa herë në libër, por, mesa duket, me t’u takuar në Tiranë me Xhavit Halitin, në Korrikun e vitit 1998, i iku ai besim, prandaj dhe nuk ka pranuar që të bashkohej me Demaçin, edhe pse ky e ftoi tërë sinqeritet kur pranoi detyrën e Përfaqësuesit Politik të UÇK-së një muaj më pas. Por ajo çka është fare e papranueshme, çka thotë Vetoni, është ajo kur thotë: UÇK-ja nuk ishte as ushtri, as çlirimtare, as tërësishtë kosovare, por thjeshtë një instrument për të marrë pushtetin e Rugovës, (f.84).  Gjithë ky farë intelektuali që ka në dispozicion jo vetëm gazeta, shtypshkronjë por edhe stacione televizivë, thua të mos e dijë që pushteti merret: ose me votë, ose me puç ushtarak, ose me luftë, sikundër është lufta çlirimtare! Duke qenë vetëm instrument, as ushtri, as e gjitha prej kosovarësh, si mundej ta merrte pushtetin? Apo druan të thotë se UÇK-ja na paska qenë një turmë banditësh, edhe pse e pranon që është libër heretik?!

Këtë etiketim Vetoni nuk guxon ta thotë troç, por e lë të kuptohet, duke u shprehur: “Por ja që jam i gatshëm të marr përsipër edhe konseguencat e herezisë dhe të them se nuk ka ekzistuar ndonjëherë Ushtria Çlirimtare e Kosovës”, (f.76).  Nëse do të ishte kështu, si mund të shpjegohet, zoti Veton, që në Kosovë Serbia pati sjellë 95.000 forca ushtarako-policore, baraz me sasinë e forcave që sollën si Italia fashiste ashtu edhe Gjermania naziste në Shqipëri gjatë Luftës së Dytë Botërore, ndërkohë që sipërfaqja e Kosovës është 2,33 herë më e vogël se ajo e Shqipërisë dhe terreni i Kosovës është gati i rrafshtë në raport me terrenin malor e tepër malor të Shqipërisë? Përse i solli Serbia gati 100 mijë ushtarë, zoti Veton, për paradë ushtarake apo për të luftuar kundër UÇK-së? Dhe mos harro që këto forca i pat sjellë shumë më herët se të flitej për Konferencën e Rambujesë. Nëse në Kosovë nuk do të kish Ushtri Çlirimtare, pse atëherë u ftua kjo UÇK-ja mosekzistuese nga ndërkombëtarët në Rambuje? Nëse nuk do të ekzistonte UÇK-ja, si u ndodhi që kryetari i delegacionit në Rambuje u zgjodh drejtori politik i asaj ushtrie mosekzistuese? Nëse nuk do të ekzistonte UÇK-ja, pse zonja Ollbrajt propozoi që mandatori i Qeverisë së Përkohëshme e Kosovës të delte nga kjo ushtria mosekzistuese? Nëse nuk do të kish UÇK, pse Rugova pranoi që Qeverinë e Përkoheshme ta udhëhiqte kryeministri i dalë nga ushtria mosekzistuese? A e kupton zoti Veton se ke vrarë veten me këto shprehje të bukura por gjithë helm e nonsens?

Dhe kjo pyetje e ka përgjigjen: Vetoni ka gjasa të ketë mbritur në këtë përfundim qysh në Korrikun e vitit 1998, sepse është një djalë i rritur me pekule, nëpër kryeqytetet e Evropës, ku e dërgonte babanë e tij Titua si ambasador të Jugosllavisë, gjë që njeh vetëm frikën. Duke qenë i rritur me pekule, Vetoni nuk e njeh as vuajtjen dhe as urinë dhe, duke mos njohur vuajtjet e sacrificat, Vetoni nuk di  se vuajtjet dhe uria shkaktojnë urrejtje, ecila, sikundër thotë Balzaku: “Urrejtja është ilaç për fuqi, të bën të rrosh, të ngjall ndjenjën e hakmarrjes”.

E veçanta qëndron se, Veton Surroi është një ndër titistët më të thekur, ndaj dhe e heq veten qytetar të botës (kozmopolit), ndaj e kritikon mënyrën e fitores së lirisë nëpërmjet luftës guerile, ngaqë lufta e armatosur i duket jashtë mode. Dhe për këtë unë i jap të drejtë Vetonit dhe e kuptoj pse i bën sulm të pakuptimtë LPK-së ilegale. Kjo, për të vetmen arsye se Vetoni ka mendësi krejt të ndryshme për lëvizjet ilegale në Kosovë, në raport me ne që guxuam e rrëmbyem armët si dhe nga populli që na mbështeti; sepse formimi i Vetonit është bërë jo vetëm në shkollat serbe dhe në mes të serbëve, por edhe në shkolla europiane, i financuar nga shteti serb si biri i një ambasadori të Jugosllavisë. Dhe për këtë nuk ka pse t’i vemë faj. Madje edhe pse ti Veton e mohon kategorikisht kontributin e UÇK-së, duke e ulur në rolin e katalizatorit, përsëri vlen të vlerësohesh si njeri mirënjohës ndaj Serbisë, sepse ai shtet të mësoi e të edukoi me shpenzimet si bir ambasadori; ai shtet të mundësoi të mësoje disa gjuhë të huaja të të gjithë shteteve ku shkonte yt atë si ambasador; ai shtet të formoi me shpezat falas të tij si intelektual; ai shtet të mundësoi të hyje në politikë dhe të pasuroi me shuma përrallore; ai shtet të mundësoi të çelje gazetën e “pavarur” “Koha ditore” si dhe të ngrije shtypshkronjë dhe, mbi të gjitha, duke të krijuar të tilla mundësi, ai shtet të formoi si kozmopolit duke të zhveshur nga ndjenjat kombëtare. Ndaj dhe nuk të akuzoj se pse je kaq mirënjohës ndaj atij shteti, pasi mirënjohja është virtyt, gjë që të stigmatizuarit e tu janë tepër imunë ndaj atij virtyti, ndaj dhe çdo ditë e më shumë ata shpërblehen me indiferentizmin e popullit shqiptar në Kosovë si dhe me urrejtjen e tij, sikundër po shihet në pjesëmarrjen e ulët në votime dhe në ngjarjet e ditëve të fundit. Duke qenë mirënjohës, kjo të vendos ty si një intelektual mbi ata. Diplomatët ndërkombëtarë, duke parë tek ty se, kishin të bënin me një kozmopolit dhe njeri mirënjohës ndaj atyre që i mundësojnë ecjen përpara, të pëlqyen duke të patur krah të djathtë në negociatat për eliminimin e UÇK-së, ndaj edhe të vunë në kryesinë e delegacionit kosovar në Rambuje. Dhe, mirënjohja që tregove ndaj tyre, bëri që ata të të shpërblenin, me mundësinë qe ata kishin, duke të bërë faktor politik menjëherë pas luftës në Kosovë, pasi asgjë nuk realizohet në Kosovë (por edhe në Shqipëri) pa një ndihmë të të huajve, sado i zoti të jesh: “Kandili, qoftë edhe prej floriri, nuk ndriçon po nuk pati vaj”, thotë Mari Kyri.

Të gjitha këto kanë ndikuar që në formimin tuaj si intelektual, zoti Veton, të kini njohuri të cunguara për lëvizjet ilegale dhe luftrat çlirimtare, prandaj e quani LPK-në “organizatë e heshtjes”. Dhe kjo ndodh ngaqë nuk e dini se çdo lëvizje guerile i ka fillesat e saj tek klandestiniteti (konspiracioni) i thellë. Në të kundërt, çdo lëvizje çlirimtare do të eliminohej qysh në embrion. Ngaqë kini këto lloj bindje për lëvizjet ilegale, prandaj dhe e urreni edhe Adem Demaçin; madje tërboheni kur dëgjoni apo lexoni se populli atij i thërret: “simboli i rezistencës”, ndërkohë që ndaj jush, masa e gjerë popullore nuk shprehu ndonjë lloj afeksioni e që u vërtetua në fushatën tuaj elektorale. Kjo u ka bërë e u bën xheloz, e cila është pasion i mendjes së verbuar dhe i shpirtit të vockël, e cila i ngjan një tufani shkatërrues, duke i bërë shërbimet më të forta egërsisë me rezultate negative.

Vetoni dhe soji i tij mendojnë kështu, pasi i ka trembur jo vetëm politika pacifiste absolute, por dhe i ka mashtruar teknologjia moderne ushtarake, e cila sot është shumë e përparuar. Mirëpo, po të kemi parasysh terrenin, që ishte i yni, llojin e luftës që bënim ne, si dhe gatishmërinë tonë për të pranuar edhe koston më të lartë të humbjeve, vetëflijimin tonë, nuk do të mjaftonte teknika dhe armatimi i Serbisë për ta mposhtur luftën tonë. Vetoni nuk e di se faktori kryesor në luftrat çlirimtare është njeriu, është morali tij dhe jo arma. Jo më kot Napoleon Bonaparti pat thënë: “Në luftë, gjendja morale përbën tre të katërtat e betejës. Pjesa që mbetet varet nga fuqitë fizike”.

Mendoj se hë për hë nuk është e nevojshme të zgjatem më tej në këtë drejtim, pasi edhe këto çka thashë nuk kanë për ta detyruar Veton Surroin të ndryshoi mendim, pasi i tillë është brumosur. Ndaj dhe jo më kot Adem Demaçi i tha para 12 vjetësh: “Ti, duke u nisur nga egoja yt, nuk je i gatshëm të paguash kurrfarë çmimi për lirinë e popullit tënd. Ti nuk je në gjendje të japësh as gishtin për lirinë e popullit tënd”.

Nga Dilaver Goxhaj August 14, 2014 17:40
Komento

24 Komente

  1. Cobani nga Kurveleshi August 14, 17:26

    I nderuar Shpetim Golemi! Ketej nga malet e Kurveleshit po te drejtohem me pseudonimin e luftes. Lufta dhe sakrificat e nje populli nuk shkojne dem, sado te lehin zagaret e tipit … Shurroi. UCK dhe lufta e popullit kosavar jane pjese e pandashme dhe e ndritur e historise se kombit shqiptar per liri e pavaresi. UCK-ja ka zene vendin e merituar ne Panteonin e lavdise kombetare dhe Shurroi do harrohet si shurra ne zall.

    Reply to this comment
  2. Mal Osdrimi August 14, 18:25

    Veton Rexhai Surroi. Rexhai spiun i UDB, beseprere. Vetoni, ne rini snob dhe konfuz, tash grindavec dhe hakmarres.

    Reply to this comment
  3. albion xhane August 14, 18:48

    Gjithsesi, mua me shqeteson fakti qe ka shume shqiptare me fuqi mediatike apo politike qe ngrihen dhe sulmojne gjerat me te shtrenjta te popullit dhe kombit tone. ta bejne vetem per urrejtje politike per udheheqes te caktuar si Surroi kunder Thacit apo jane ne sherbim te interesave antishqiptare. Eshte shume e demshme per ne qe ti kthehemi dhe ti rikthehemi gjerave qe nuk duhen diskutuar fare. Kjo coroditje na pengon qe te zgjidhim problemet e perditshme dhe ne duhet te zgjidhim problemet e perditshme sepse jemi vendi ne fund te Europes.

    Reply to this comment
  4. AP August 14, 18:56

    NATO u fut me dyfek në Kosovë për interesa gjeostrategjike. Para kësaj amerikanët e quanin UÇK- në organizatë terroriste.Qe fat i madh për ne që, në këtë moment historik , u puqën interesat tona me ato amerikane! Koburja kosovare në këtë luftë qe simbolike, kokderrin Milosheviç nuk kishte shtet në Evropë ta mundte. Këtë mund ta bënte , siç edhe e bëri , vetëm NATO.
    Unë nuk di ç’ka shkruar Surroi!

    Reply to this comment
  5. andi August 14, 19:20

    Veton Suroi nje kelysh UDB je i ndyre per Popullin e vet, nje kriminel qe UCK eshte dasht ti jepte Plumbin kokes qe ne fillim bashke me Serbin me kriminel. Megjithate qe ka pare me shume nga te gjithe Udbashat e kelyshet e Udbes nuk munde te fitoje simpati e poena ne popull as me para e propagande.

    Reply to this comment
  6. Deli August 14, 20:08

    Vetem me kesi Shpetima, Thaca,Demaca, Qosja, Kamisha, Tigra, Sandokana etj arritem te katandisim Kosoven ne kete pike. Si nuk ka turp ky gomor te tallet me ne dhe boten.
    Kosoven dihet kush e shliroi dhe dihet perse, sikurse dihet pse nuk lejon te zhbehet e tere kjo.
    Ik ore i mjere lere Surroi atje ku eshte, me te gjitha te metat qe ai ka eshte dhe do mbetet mbi ju te gjithe.

    Reply to this comment
    • gashi August 15, 09:56

      I dashur Dilo! Po të deshifrosh shkronjën e parë dhe të fundit të “GASH” do ta marrësh vesh se kush jam. Gjithsesi kjo nuk ka rëndësi. E rëndësishme është që në disa kushte të caktuara, siç është edhe analiza e shkëlqyer e jotja lidhur me atë ç`ka shkruan Surroi në atë paçavuren e tij, nxjerr në dritë të diellit dhe u tregon gjithë atyre që kanë pesë para mend, të cilat i mungojnë krejt këtij “delit”, se lufta që bënë djemtë më të mirë të Kosovës, duke rrezikuar dhe dhënë jetën për çlirimin e saj, bën pjesë në varganin e madh të gjithë luftrave që ka bërë populli shqiptar për çlirim dhe që u kurorëzua me fitoren mbi gjakatarin më të eger të shqiptarëve, Millosheviçin. Pa mohuar në asnjë çast rolin vendimtar të NATO-s në çlirimin e Kosovës, ashtu si edhe rolin vendimtar të aleatëve antifashistë në Luftën e Dytë Botërore, orvatja për të mohuar luftën e UÇK-së ngjan si dy pika uji me orvatjet e pinjollëve të ish-bashkëpunëtorëve kuislingë të nazifashizmit për të mohuar Luftën Nacionalçlirimtare të popullit shqiptar kundër fashizmit. Ashtu si Surroi ka qene i përkëdheluri i Titos edhe pinjollët e këtushëm “hanin çokollata” kur pjesa dërrmuese e shqiptarëve nuk kishin as bukën e misrit, gjatë pushtimit fashist. Duke pranuar se nuk ka miell pa krunde, unë kam bindjen se “Vetonët”, si në atë anë dhe në këtë anë të kufirit politik, me zhgarravina kësisoj do ta nxjerrin, ashtu si edhe kanë nxjerrë deri sot, lakuriq përpara njerëzve të ndershëm të kombit se çfarë lloj “krundesh” janë. Votat që populli shqiptar u ka dhë “Surrojve”, si andej edhe këtej kufirit, e kanë treguar më së miri këtë. Dua të shtoj gjithashtu se, nëse dikush ka ndonjë pakënaqësi për individë të vëçantë, të cilët e kanë udhëhequr luftën, e ka gabim që “bashkë me ujërat hedh poshtë edhe foshnjën e sapolindur”. Dilo t`u lumtë pena.

      Reply to this comment
      • im June 21, 10:27

        Jo duke mos anashkalu rolin e Natos, ZOTIT, Natos, SH.B.A-sèe e faktorit ndèrkombtar por falè kètyre Kosova u qliru nga thikat e diktatorit Millosheviq dhe shèrbtorve tè tijè vrastarè, por a asht sot kjo Kosovè ashtu si e ekemi èndèrru?

        Reply to this comment
  7. gimi August 14, 20:57

    Ky Deli duket qe na qenka nje deli djae titisti dhe antishqiptari se ndryshe nuk do te ishte kunder UCK, ose do te jete ndonje shqipfoles, me kombesi tjeter, dhe natyrisht qe i dhembin syte kur lexon shkrime te tilla ne mbrojtje te dinjitetit tone kombetar. Mesa duket ky Deli, por edhe ai tjetri, “AP”, duhet te marrin pagese nga Prishtina, por qe paret vine nga Beogradi. Shqiperia prandaj e ka pesuar tere jeten se me shume u ka besuar pakicave kombetare se sa shqiptareve. I drejtohem autorit te ketij shkrimi, duke i thene: TE LUMTE DORA DHE MENDJA DHE PERULEMI PARA VEPRES SUAJ DHE SHOKEVE TE TU QE GUXUAT E SHKUAT NE LUFTE DHE MOS I DEGJONI KETA “TRIMA” ANTISHQIPTARE.

    Reply to this comment
  8. Pëllumb zaimi August 14, 21:09

    I kini dhënë një përgjigje te mirë këtij falsifikatori të realitetit Dilo? Libri i tij i zi e ka marë përgjigjen edhe në Kosovë? Mua me duket se “këmbët e gjarprit ” janë vetë këmbët e vetonit i cili duket qartë se noton në ujrat e një plani udba-sh apo të pushtetit okult sërb për të fshirë nga historia luftën clirimtare te popullit shqiptar të Kosovës? Ku e ka hallin vetoni qe do ta fshijë rezistencën e armatosur? Mendoj se qellimi i gjarprit veton është të thotë se “meqënëse nuk pati rezistencë dhe luftë nuk ka ekzistuar as urrejtja shqiptare për pushtuesin sërb,se nuk ka pasur fare pushtues (!?) dhe për rrjedhojë, Kosova nuk duhet të jetë shtet më vehte por një krahinë nën Sërbi”!??? Ky mendoj se është qëllimi i vërtetë dhe që i dekonspiron këmbët e gjarprit si këmbët e vetonit ??? E kaluara e vetonit dhe e tashmja e tij vërtetojnë se pas publicistit dhe politikanit surroi kemi një njeri jo dosido por një njeri të përgatitur e te instruktuar për planet e fshehta serbe te cilat sic e kemi pare janë dukur here pas here në tryezat e bisedimeve dhe në tentativat diplomatike te serbise për te mos lejuar shkeputjen e Kosoves nga serbia!? Kësaj tentative e ketij plani i sherben edhe vetoni ? Do te dalin herë pas here edhe vetonë te tjerë? Ka shumë fuksa të “lënë në gjumë”nga serbia? Vetoni duhet te jetë nga ata qe quhen “potencialë” dhe qe pushteti okult serb i shfrytezon për te dhenë “goditje te medha”? Si kjo e tanishmja qe synon te fshije fare luftën popullore dhe njeherazi kundërshtarët e saj! Si mund të ketë pasur kundërshtarê kur “nuk ka pasur luftë”???? Ja këtë “plan të zi” kërkon të artikulojë vetoni ? Dilo? I keni bërë nje sherbim te lavderueshëm jo vetëm luftes clirimtare te popullit te Kosovës por ne radhe te pare kini demaskuar një plan ogurzi qe kelyshet e beogradit do te perpiqen t’i gjejnë kurdoherë terren te pershatshem per ta implementuar??? Kini rritur vigjilencën e shqiptareve te Kosovës pêr ti parê kembët e gjarprit si kembêt e vetonit? Vetonit tê ushqyer me frymën dhe parate e beogradit??? Nuk u ndala te argumentet e tua rreth peshês se U ÇK në luftë. Për nje ushtarak ato kuptohen lehtë. Ju i kishit thenë si duhet? U ndala te”kembet e veton gjarpërit” sepse kuptova qe ju po flisnit per një ceshtje rreth se cilës nuk lejohet “renia ne gjumë”? Ky mendoj se ishte thelbi i mesazhit tuaj!? Unë e kuptova ose them se e kam kuptuar? Përqafime Dilo! Të fala nga ” Mali i Gjeshnikoshit” i cili ka rritur vetëm trima e patriotë si ju!

    Reply to this comment
    • Furtuna August 14, 21:14

      Mendoj se pëllumbi e ka kapur drejt thelbin e këtij libri të Surroit sjellë népérmjet kritikës shumëplanéshe te autorit Dilaver Goxhaj? Përshëndetje!

      Reply to this comment
      • Drenica luftarake August 14, 21:22

        Ndaj të njëjtën pikepamje me z. Pellumb,çobani nga kurveleshi,mal osdrimi,andi,albion xhane,gimi etj. I përshëndes sebashku me autorin realist e kritik objektiv Goxhaj!

        Reply to this comment
        • Peja August 14, 21:26

          Né Pejé jan djeg krejt librat e Veton Surrojt? Duhet me ba kujdes nga komentat e marrokve te udb qe nuk mungojn as ktu! Njatjeta juj!

          Reply to this comment
    • XXXXX August 14, 21:57

      Dy kofina te kishin vene
      si i vhen nje thundraku
      kapter bunkeri,te kishin bene
      me nje vlere,sa oturaku.

      Zhgaravitu dhe uleri.
      ashtu si ben,edhe derri
      nga brek heqija, s shpeton ti
      si dhurate nga dylberi.

      Hamulit or hamulit
      ashtu si ben edhe zagari
      me qaforen,qe te mbyt
      e vendosur nga gjaktari.

      Pershendetje si gjithmone ,shum komente jane te fshira nga Dita,per te te ruajtur nga vlera qesharake qe ke o kapteri shqiptar.

      Reply to this comment
      • durimi August 15, 16:54

        Ky personai “trim” qe nevend te emerit vendos xxxx, e njoh nga helmi qe ka, pasi ka shkruar gjithmone kunder autorit te ketij shkrimi kur ky ka dhene nje interviste te gjate vitin e kaluar per luften ne Kosove, pavaresisht se nuk me eshte dhene rasti ta njoh nga afer. Ky eshte vellah i fshatit tim, nga Perondia e Kucoves, dhe quhet Spiro Bucka, por nuk di pse perdor mbiemrin Butka. Ne fshatin tone nuk ka guxuar te vije pas mbariit te luftes ne Kosove, dhe kjo nga qe te gjithe ne fshat e dine se ka qene deri ne Kukes dhe njoftonte se gjoja kish shkuar ne lufte ne Kosove, por kur shkoi nje bashkfshatari yne, Perprim I., per te marre kosovaret e ardhur ne Kukes e takoi atje dhe na tha se Spirua i Buckallareve eshte ne Kukes dhe jo ne lufte. Qysh ahere i doli genjeshtra ndaj dhe nuk vjen me ne Perondi. Eshte shume inatcor dhe nuk do kurre qe te flitet mire per dike. Eshte nga mehalla e vellehve te fshatit tone. Njerezit e fisit te tij jane shue te mire dhe per kete thone: nuk die se nga ka ngjare ky djall. Une e njoh mire, pasi vellai im ka kryer 7-vjecaren me te ne nje klase dhe qysh ahere na fliste per ligesine e tij shpirterore, qysh ne ate moshe. Mos e paste njeri fatin e te punoi me te, thone te afermit e tij ne Perondi.

        Reply to this comment
  9. shqip hesapi August 15, 04:02

    Zoti Dilaver, edhe ne rinine tende ke qene oficer shume i pergatitur ,i afte dhe trim por dhe bindes ne argumentet qe sillje .Nje te tille e shoh edhe ne kete shkrim dhe me vjen shume mire qe paske mbetur oficer trimeror.Te lumte !,Vetoni edhe po ta lexoje kete shkrim s’arrin ta kuptoje se nuk i ka mbetur gjak shqiptari se nuk pati qe kur lindi.Me kete lexim te ketij shkrimi m’u duk vetja sikur kalova disa momente te bukura me ju.Gjithmone pershendetje.

    Reply to this comment
  10. lumi August 15, 04:28

    Qel qel kokodel dy pot bin e ni pot del
    me dy qela qe i,kan gazetat ne gjuhen shqipe
    dy majmuna te droguar serbofilat e te shitur te ihuaji
    kta jan. suri e fetziu.bre.!!!! !! !!!!!!!!! !! !!!:

    Reply to this comment
  11. alfade August 15, 07:22

    S’ka asgje per t’u cuditur ! ”Shurroi” i perket nje tendence te caktuar qe katalogohet si
    antishqiptare dhe ne sherbim te armiqeve te pavaresise se Kosoves ! Dikur nje pjese e
    intelektualeve shqiptare shkonin per t’u defryer ne Beograd dhe tash i mundon kjo nostal-
    gji dhe zoti ”Shurroi” fatkeqesisht i bindet refrenit qe ”per hir te sime reje shkoj e flej me
    mullixhin” ! Lufta UCK nuk mohohet zoti Surroi ke c’ke Ti me Z. Thaci !

    Reply to this comment
  12. Po,Po August 15, 07:39

    E pershendes autorin e ketij shkrimi dhe jam plotesisht i nje mendje me te.Po kaq,ne mos me teper ndiej neveri per spiunet e felliqur te UDB-se e te Asfalise,si ne Kosove,ashtu dhe ne Shqiperi e hapesirat ku banojne shqiptare.Nje koke gjarperi serb eshte edhe Sali Berisha,qe me bemat e tij thellesisht antikombetare,i kane sjelle nje dem te pa riparueshem ceshtjes kombetare.
    PERSHENDETJE NGA SHQIPERIA !

    Reply to this comment
  13. Novruz August 15, 12:26

    Nje artikull i shkelqyer, i denje per doktorature shkencore, nje avokature perfekte per UCK, autori pervec se ushtarak me merita te mirenjohura si pjesemarres ne nivelet me superore te komandimit te UCK, rezulton edhe nje politolog dhe analist brilant i mbrojtjes se luftes se lavdishme te UCK qe solli clirimin e Kosoves. E pergezoj per analizen e thelle e te argumentuar ku bie ne sy qe emocionet njerzore per sakrificat e medha te bera ne kete lufte clirimtare nuk i kane humbur autorit etiken qytetare e intelektuale me autorin e “gjarprit”. Me kete artikull kuptova qe Surroi nese nuk eshte vet “gjarper” eshte nje llafollog i lindur dhe rritur ne epruvete. Por nuk kuptoj, pse heshtin pjesemarresit dhe drejtuesit e tjere te UCK?. Novruz Limaj

    Reply to this comment
  14. Denis August 15, 15:50

    A e kupton zoti Veton se ke vrarë veten me këto shprehje të bukura por gjithë helm e nonsens?

    Reply to this comment
  15. ushtari i UCK August 15, 21:33

    Une jam nje prej shtareve te UCK prej Majit te vitit 1998, ne fillim ne formacionin Lumi, me komandant Celikun dhe me pas ne shtabin e Zones Pahtriku dhe aty ka muaji shkurt 1999 me kalun ne kompanine ne roje te Shtabit te Pergjithshem ne Divjake. Shpetim Golemi me ka gjet atje kur ai erdhi ne Shtabin tone. Qysh ditet e para na la pershtypjen ma te mire si oficer dhe si njeri. Cdo dite e ma shume na hyyni ne shpirt dhe keshtu ka mbet ne zemnat tona. I falemnerse zotni Durimi, i cili na sqaroi se personi qe shkrun keq per zotni Shpetim Golemin, pasi keshtu e kena njoft ne ne UCK zotni Dilaverin, eshte spiro Butka dhe tash po e mesojme se e k ndryshe mbiemnin. Pune e tij, por ajo qe na ka ba shume pershtypje me ket Spiro Butken eshte se prej sa e ka sjelle zotni Bislim Zyrapi ne Ministrine e Mbrojtjes kur minister ishte zotni Azem Syla dhe una isha perseri roje ne Ministri, ky njeri nuk na ka lane pershtypje te mira, si shume i dyshimte. Ne nje rast, kur zotni Shpetimi qe nis per me cu eshtnat e trimit Indrit Cara ne Shqypni, ne nji moment une ndodhesha ne zyren e Sabit Gecit dhe erdhi Spiro dhe i foli keq per Shpetimin dhe i kerkoi qe Shpetimi te mos merrek ma me deshmoret nga Shqypnia por te merrej Spiro dhe Sabiti e pelqevi ate mendim dhe i besovi Spiros. Pasi kishin kalu disa muaj vijne ne Ministri familjare te deshmorit Astrit Suli. Komandant Celiku dhe Kadri Veseli po kerkojshin Spiron per me e cu ne Shqypni dhe gjat gjithe dites nuk po e gjejshin, tuj me dergu edhe mue dy here ne Shtab por edhe atje nuk po e gjejshin se ku pat shku. Kur une u ktheva per heren e dyte nga Shtabi TMK nehyrje te Ministrise takova Shpetimin dhe vec e pershendeta e nuk i tregova gja, por u ngjita nalt dhe trokas ne zyren e Ministrit ku ndodheshin Ministri Azem, Komandant Celiku dhe Kadri veseli dhe pasi u tregoj se ne shtab nuk po e gjejshin Spiron, u tregove se ketu asht Shpetim Golemi. Shko e thirre me tha ministri dhe e gjeta ne zyren e vet, pasi ai ishte shefi kabinetit te ministrit. i tregova se e kerkonte ministri. Bashke me Shpetimin u futa edhe une ne zyre. Ata i treguen problemin dhe Shpetimi u tha se ju kini caktu Spiron. Por ata i thane se nuk po e gjejshin dhe Shpetimi u tha se ai jo vetem qe nuk ishte zevendesi i Spiros por e quante fyerje qe te bente nje detyre qe i ishte ngarkue atij personi mik te tyne por shume i poshten ne te gjitha drejtimet. Pas ma shume se gjumes ore ma ne fund Shpetimi pranoi me shku dhe me sa di una cdo gja pat shkue mire. Me sa me kujtohet kjo gja duhet te kete ndodhe kah fundi Janarit 2000 se pas gati nji jave u krijue UNMIK dhe u shkri Qeveria e jone e luftes.
    ma pas ky Spiro me ndihmen e zotni Bislim Zyrapit, Celikut dhe Kadri Veselit ua emnue prane Agim Cekut ndersa zotni Shpetimi u largue dhe nuk u fut ne TMK. Prej atehere une nuk e kam takue ma Shpetimin, ndersa Spiron e kam pas ne Shtabin e TMK ku me caktuen pasi u mbyll ministria.Spiro shpesh here na i vinte ne grindje njeresit tane me genjeshtrat e tij perfide sa ne nje rast zotni Must Jashari desh me e vra oe Spiro i kish kambet e shpejta dhe nuk u duk dy dite ne shtabin e TMK. ma vone, aty ka viti 2003 nuk e morrem vesh se pse u prish me Agim Cekun dhe erdhi nji urdhen kah KFOR dhe Spiro largohej nga TMK. Dha edhe nje konference shtypi tuj sha Agim Cekun, por ma vone muerrem vesh se ishte loje, pasi Spiro krijon AKSH tuj marre graden e gjeneral kolonelit me emnin alias Vigan Gradica dhe filloi me kerku pare per kete ushtri te cilen Presidenti Amerikan Bush e futi ne listen e zeze bashke me emnin e Spiros dhe i cili nuk mund te vije ne Kosove se e ndalon KFOR. Mirepo me sa po del, Spiron e dashkan Celiku, Azem Syla, Kadri Veseli e te tjene sepse krijuen edhe shoqaten e veteraneve te UCK n Tirane dhe atje shkovi zotni Rexhep Selimi dhe e emnoi kryetar te asaj shoqate dhe me sa kena mesu as zotni Shpetimi as komandant Adem Shehi dhe as shef Bardhyl Tahiri qe kan qene ne lufte me na nuk jane ne ate shoqate e jo ma ne kry te saj. Per ket Spiro merr page mujore por, me sa po shohim pagen e merr per me shkru kunder Shpetim Golemit dhe ket e pata vene re qysh se Shetimi iku ne Tirane ne vitin 2000 ku Spiro shkrujti nje shkrim kunder tij te gazeta Rilindja dhe prej ather ne ushtaret e TMK ne shtab nuk e shijshim dot me sy, e urrejtshim [por nuk kishim ca me ba se e perkrahte shume Ceku. Vitin e kalum zotni Shpetimi bani nji interviste goxha te gjate disa javore ne ket gazete dhe me sa kena lexu neper komente ishte vetem ky Spiro qe e shante. Por edhe ne ket shkrim te Shpetimit eshte vetem ky Spiro qe shkrun keq dhe mbron Veton Surroin gja qe ka me u kuptue se ky njeri ka qene dhe asht kunder UCK dhe i vunun nga disa ne Kosove per me mbajt kete pozicion, ndryshe nuk do te kish perkrahjen e Azem Syles, Kadri Veselit e Rexhep Selimit. Por shkrimi i zotni Shpetim Golemit eshte fantazi dhe i falemneres pasi asht i vetmi prej komandanteve te UCK qe shkrun ashtu si duhet per UCK dhe askush tjeter nuk po ban ket qe po ban Shpetim Golemi. Nuk e dime se pse zotnite e masiperm nuk i dun Shpetim Golemin, Adem Shehin e Bardhylin. Cudi!

    Reply to this comment
  16. emo August 28, 21:31

    Ne fakt, me ndihmen e UQK-se dhe NATO-se u shlirua Kosova ndaj regjimit Serb-Okupatorit.

    Reply to this comment
  17. Ismet balaj September 12, 16:45

    Pa luften e armatosur te shqiptareve qe udhehiqej nga UCK-ja, me idealin e vetem”Clirimin e Kosoves dhe bashkimin me Shqipwrine”, ideali i cili u pergjysmua nga Fuqite e Medha,sic ka ndodhur edhe gjate shekullit te XX e me pare,nuk do te kishte NATO ne Kosove.Nderhyrja e NATO-s ne KOsove e shpejtoi dhe e siguroi fitoren e lirise se popullit shqiptar te Kosoves. UCK-ja , me luften e saj clirimtare pergatiti kushtet qe justifikohej pikerisht qe nderhyrja e NATOS u be domosdoshmeri historike. Une, sa e perfundova se lexuari librin e zi te udbashit milloshevicist Veton dhe do te shkruaj patjeter, por mendimet dhe analiza e bere nga Shpetim Golemi pasqyrojne mire shkaqet pse Surroi peshtyne surratin e tij te zi, duke mohuar rolin historik te UCK-ese.

    Reply to this comment
Shiko komentet

Komento

Your e-mail address will not be published.
Required fields are marked*