Klosi: Gazidede ka zbatuar verbërisht urdhrat e Berishës

Lidhur me intervistën që dha ish-nënkryetari i SHIK-ut në vitet 90, Bujar Rama, ka pasur një sërë reagimesh të forta që kundërshtojnë deklaratat e tij.

DITA sjell në vijim dy intervista: atë me pasardhësin e Gazidedes në krye të Shërbimit Informativ, Fatos Klosin, si dhe me ish-truprojen e Berishës, Izet Haxhia.

Të dy këta bashkohen në idenë se deklaratat e Bujar Ramës nuk tregojnë të vërtetat e hidhura për bëmat e SHIK-ut në ato vite dhe se kush duhet të mbajë përgjegjësi për krimet që janë bërë në ato vite…

– Zoti Klosi, një intervistë e Bujar Ramës, ish-zëvendësit të Bashkim Gazidedes në vitet 1992-97, ka ngjallur debate, pasi në atë intervistë justifikohesh disa gabime dhe qëndrime të Gazidedes në atë periudhë. Cili është mendimi juaj për atë intervistë?

E dëgjova intervistën e Bujar Ramës dhe them se ajo ishte një intervistë e mbushur me gënjeshtra nga fillimi në fund. Nuk mund të shfajësohet Gazidedja për përgjegjësitë që i takojnë për një sërë ngjarjesh të hidhura gjatë atyre viteve që kreu detyrën e shefit të Shërbimit Informativ…

– Pse e thoni këtë?

Sepse nuk është aspak e vërtetë që Bashkim Gazidede të ketë gabuar padashje nga dezinformimi që i bënin vartësit. Kjo nuk qëndron. Unë them se Gazidede i ka besuar verbërisht Berishës dhe ka zbatuar po aq verbërisht urdhrat e tij. Kur ai pranoi të bëhej Gjeneral për të shtypur revoltat në jug, kemi të bëjmë me më shumë se shkelje të detyrës…

– Do të thoni se ky është faj?

Po, një faj shumë i rëndë madje. Një krim që edhe sot ë kësaj dite nuk është ndëshkuar. Nuk ka asnjë justifikim për një shef të shërbimit Informativ të kryejë operacione ndëshkimi ndaj bashkëqytetarëve të vetë. Bashkimk Gazidedja e bëri këtë pasi pranoi të bëhej gjeneral dhe të kryesonte operacionin kundër jugut të vendit.