Kritika policisë britanike. Njëri nga autorët e sulmeve, i dyshuar prej vitit 2015

June 6, 2017 17:08

Kritika policisë britanike. Njëri nga autorët e sulmeve, i dyshuar prej vitit 2015

Policia britanike po mbrohet prej rrebeshit të kritikave të lëshuara ndaj saj, duke deklaruar se nuk kishte pasur rrugë tjetër veçse të hiqte dorë nga hetimi i njërit prej autorëve të sulmit të së shtunës, i cili kishte rënë në sytë e forcave të rendit dhe të shërbimeve të inteligjencës në vitin 2015.

Krerët e policisë thanë se 27-vjeçari Khuram Butt, i lindur në Pakistan, por që jetonte në Londër, ishte vënë në vëzhgim, megjithatë asokohe nuk pati asnjë provë që të tregonte pjesëmarrjen e tij në ndonjë komplot.

Dy agresorët e tjerë ishin emra të panjohur për autoritetet e sigurisë. I fundit prej tyre u identifikua sot si Youssef Zaghba, marokeno-italian. Të 12 personat e arrestuar të dielën pas sulmit, tani janë lënë të lirë. Mëngjesin e së martës, efektivët e policisë bastisën një tjetër banesë në lindje të kryeqytetit britanik, por nuk pati asnjë të ndaluar.

Ish-zëvendës Sekretari i Departamentit amerikan të Sigurisë Kombëtare, Douglas Smith mendon se integrimi i myslimanëve në shoqërinë perëndimore përbën një sfidë globale.

“Kjo është e njëjta situatë me të cilën përballemi edhe në në Shtetet e Bashkuara. E kemi parë këtë në masakrat e tmerrshme në Charleston, Karolinën e Jugut e të tjera. Kur njerëzit ndihen të përjashtuar, ata hakmerren. Nuk mendoj se është një problem vetëm i britanikëve, është problem global. Mënyra për ta përballuar është afrimi me komunitetin. Imamët islamikë në Londër nxorën një deklaratë të fuqishme në mbështetje të Britanisë së Madhe, e mendoj se ky është një lloj partneriteti, të cilin kryeministrja duhet ta zhvillojë”, tha Douglas Smith, ish-zëvendës Sekretar i Departamentit të Sigurisë Kombëtare në SHBA.

Sulmi në urën e Londrës është vënë në qendër të debateve në ditët e fundit të fushatës zgjedhore, duke e përqëndruar vëmendjen te Theresa May.

Kreu i Partisë Laburiste, Jeremy Corbyn shprehu mbështetjen për zërat që kërkojnë dorëheqjen e saj, nisur nga roli i luajtur prej saj në reduktimin e personelit të policisë gjatë kohës kur shërbente si Sekretare e Brendshme. Corbyn shtoi, megjithatë, se mënyra më e mirë për ta rrëzuar Mayn është me anë të votës.

June 6, 2017 17:08
Komento

Ende pa komente

Ende pa komente!

Je i mirëpritur. Bëhu i pari që komenton këtë artikull. Kujdes etikën.

Komento
Shiko komentet

Komento

Your e-mail address will not be published.
Required fields are marked*