Kufiri, Kroacia sfidon KE për përplasjen me Slloveninë

July 6, 2017 12:44

Kufiri, Kroacia sfidon KE për përplasjen me Slloveninë

Me një qëndrim sfidues, kryeministri kroat Andrej Plenkoviç i kërkoi Komisionit Europian të mos përzihet në mosmarrëveshjet kufitare të Zagrebit me Slloveninë, sepse nuk ka kompetencë në çështje të tilla.

Të martën, Komisioni i kërkoi të dy vendeve anëtare të bllokut të vënë në jetë vendimin e Gjykatës së Arbitrazhit që i jep Lubjanës akses në ujërat ndërkombëtare pranë brigjeve kroate.

Por Kroacia nuk pranon t’i bindet një vendimi që sipas saj nuk ka forcë ligjore. Plenkoviç kujtoi se Zagrebi u tërhoq nga procesi i arbitrazhit në 2015-n sepse ishte, sipas tij, i “ndotur dhe i kompromentuar në mënyrë të pakthyeshme”.

“Do të ishte mirë nëse Komisioni qëndron brenda kornizës së kompetencave të tij, sepse tek gjykimi i kufijve del paksa jashtë linjës së vetë. Ka vende të cilave u janë dashur edhe 100 vjet për të zgjidhur problemet kufitare. Tani vonë e tha ministri i Jashtëm i Belgjikës që bisedimet e kufirit me Holandën vazhdojnë prej vitesh. Megjithatë, kjo çështje nuk ka zënë vend në axhendën e Komisionit Europian”, deklaroi Plenkoviç.

Të dyja ish-republikat jugosllave që pavarësinë e siguruan në vitin 1991, kërkojnë një rrip të ngushtë ujor në veri të Gjirit të Piranit.

Sllovenia, me një vijë bregdetare prej vetëm 46 km pretendon se aksesi i saj në ujëra ndërkombetare rrezikohet sepse Kroacia, me brigje që shtrihen për 1.700 km, këmbëngul që kufiri detar të kalojë në mes të gjirit.

Vendimi i gjykatës me seli në Hagë është që problemet të zgjidhen sipas regjistrave të vjetër kadastralë e i lejon Lubjanës krijimin e një korridori detar 16 km të gjatë, i cili t’i sigurojë daljen në detin Adriatik, por nuk është e qartë sesi do të arrijë të implementohet në realitet.

Pretendimi i Kroacisë se procesi i arbitrazhit është njollosur u ngrit pasi në 2015-n u mësua se një zyrtar slloven e kishte diskutuar çështjen me një anëtar të komisionit të arbitrazhit.

Lubjana nuk i mohon akuzat, megjithatë sërish këmbëngul që Zagrebi t’i qëndrojë kushteve të marrëveshjes.

July 6, 2017 12:44
Komento

Ende pa komente

Ende pa komente!

Je i mirëpritur. Bëhu i pari që komenton këtë artikull. Kujdes etikën.

Komento
Shiko komentet

Komento

Your e-mail address will not be published.
Required fields are marked*

Sondazh

A ËSHTË EDI RAMA I MAJTË?

Shiko rezultatin