Meta: Me Ramën kam marrëveshje 8-vjeçare

INTERVISTE July 1, 2013 23:36

Meta: Me Ramën kam marrëveshje 8-vjeçare

Intervista e Kryetarit të Lëvizjes Socialiste për Integrim, Ilir Meta për emisionin “Opinion”.

Z. Meta duket se keni qenë i vetmi që keni i vetmi që keni ditur me një saktësi të përafërt rezultatin e zgjedhjeve. Keni deklaruar një muaj e gjysmë para zgjedhjeve se koalicioni juaj merr 80 mandate dhe se LSI-ja do të marrë mbi 15 mandate. Ishte ky parashikim fryt i sondazheve, i ndonjë vëzhgimi tjetër apo thjesht e kishit caktuar se do të merrnit këtë numër votash dhe ia arritët qëllimit?

Jo, absolutisht. Ishte fryt i një vlerësimi tërësisht objektiv dhe kompleks të një kërkese për ndryshim nga ana e qytetarëve shqiptarë. Të mundësive që ka e majta në çdo kohë në Shqipëri, kur është bashkë, për të qenë shumicë automatike. Gjithmonë kam vënë buzën në gaz kur kam parë që bëhen këto llogaritë aritmetike….

Nuk ka ndodhur kështu në 2009-n…

Në 2009-n ishte midis dy forcave të majta praktikisht dhe natyrisht që kjo përçonte shumë energji negative. Ndërsa fushata që ne bëmë njëkohësisht, jo vetëm në koalicion, por edhe pak a shumë me dy qendra krijonte një hapësirë shumë më të madhe dhe jepte mundësi për mesazhe më të plota dhe më komplementare në raport më votuesit. Por bindja ime ka qenë e plotë duke qenë se kam atë përvojë që kam në jetën politike në fushatat elektorale, por edhe njohjen konkrete në terren dhe unë mund t’iu them juve sot, dhe janë shumë kolegë tuaj që e dinë shumë mirë sot, se unë që më 13 maj kam konfirmuar atë rezultat që ka dalë më 23 qershor për dy qarqet më të mëdha. Për qarkun e Tiranës, pra 19 me 13 ose 16-3-13 dhe për qarkun e Fierit, 11 me 5 ose 9-2-5. Sepse ne kemi pasur sondazhe shumë të qarta dhe në fakt qytetarët nuk kanë faj pse habiten, sepse atyre iu servir në periudhën janar-shkurt një sondazh i SOROS-it që e nxirrte PD-në katër pikë para PS-së dhe e nxirrte LSI-në 1% dhe unë e thashë që atëherë se ishte një sondazh i porositur dhe se do t’i bëj letër SOROS-it pas zgjedhjeve, se nuk shkonte atëherë. Dhe tani do t’ia bëj vërtetë një letër vetëm për korrektesë sepse ato fonde mund të ishin përdorur për të ndërtuar një çerdhe apo një shkollë, sepse SOROS-i është një njeri dhe një institucion që përpiqet t’i ndihmojë vendet si Shqipëria. Pra, opinioni ka qenë vazhdimisht nën trysninë e shumë sondazheve të porositura. Të vetmet që u përpoqën t’i afroheshin realitetit, pavarësisht se ato nuk janë të shkallës më të lartë profesionale, ishin ato të IPR Marketing në “Ora News”.

Por edhe ky sondazh ishte larg këtij realiteti që u përftua…

Jo, absolutisht. Lidhur me LSI-në në disa rast ishte tërësisht shumë korrekt, siç ishte rasti i Tiranës me 8 % me 3 mandate dhe të gjithë e sulmuan. Siç ishte deri diku rasti i Fierit, siç ishte deri diku rasti i Elbasanit e kështu me radhë apo sikurse ishte fakti që vazhdimisht jepte një rritje të vazhdueshme të kampit opozitar.

Jeni rritur në fushatë apo jeni rritur në mënyrë progresive gjatë 4-vjeçarit?

E para, një herë në rastin e LSI-së nuk duhet bërë krahasimi me 2009-n, sepse LSI-ja që nga themelimi i saj e në vazhdimësi në katër zgjedhjet e bëra përveç 2009-s ka treguar se ka një rezultat të qëndrueshëm prej rreth 120 mijë votuesish. Në 2009-n dihet që ishte një kod komplet kundër LSI-së, gjithë trysnia bëhej kundër LSI-së dhe ishte përpjekja e parë për të implementuar kodin që zhdukte çdo parti tjetër përveç dy partive më të mëdha dhe LSI-ja në këto zgjedhje kishte numëruesit, kishte komisionerët e saj në KZAZ dhe votuesit që gjithmonë janë të lëkundur, sepse duan që vota e tyre të jetë e dobishme dhe të mos shkojë kot, ishin të sigurt që vota e tyre për LSI-në do të shkonte atje ku duhej, nuk do të manipulohej. Kështu që janë shumë faktorë të cilët kanë qenë mjaft pozitiv. Por dy faktorët më kryesorë për ne janë puna e jashtëzakonshme që ne kemi bërë me rininë, kjo është puna e mirë dhe investimi më i mirë dhe më afatgjatë që ne kemi gjatë gjithë kësaj kohe dhe votat tona kryesisht që janë shtuar janë vota që i takojnë rinisë. Dhe e dyta, puna shumë e mirë që ne kemi bërë sidomos gjatë viteve të fundit me LGI-në. Këto kanë qenë dy faktorë shumë të rëndësishëm në terren. Ndërsa nga pikëpamja taktike ne kemi ndjekur një politikë tjetër. Ne, e para njëherë, kemi bërë një fushatë tepër të kujdesshme, shumë të qartë. Nuk kemi bërë shumë spote si në të kaluarën, kemi bërë vetëm një spot nga fillimi deri në fund, me një mesazh të qartë kryesisht në drejtim të punësimit. Nuk kemi bërë shumë mitingje të mëdha, dhe unë kam qenë kundër mitingjeve të mëdha. Kemi bërë disa mitingje, një në Durrës, një në Fier, në Lushnje. Kemi bërë dy në Berat dhe në Tiranë kemi bërë një miting në Pallatin e Sportit  që ka qenë një demonstrim shumë i kulturuar, sepse kemi pasur një qëllim, të mos i lodhim njerëzit. Sepse në kohën e fushatës mendoj se më e rëndësishme është mesazhi që ti përçon tek votuesit dhe targeti i votuesve të tu të pritshëm.

Cili ishte targeti i votuesve?

Targeti ynë ishte rinia, në radhë të parë, dhe gratë.

Z. Meta, keni blerë vota ju apo jo?

Mendoj se kjo është fare qesharake. Këtë e dëgjuam në vitin 2011 kur ne arritëm një rezultat të paparashikueshëm për ata që përsëri bënin sondazhe në Tiranë, se i morën votat si ja hoqën njerëzit nga puna. Tani ne na i hoqën të gjithë njerëzit nga puna sepse ne dolëm në opozitë dhe tani dalin me pretendime të tilla. Këto janë tepër qesharake dhe janë rezultat i politikanëve të dëshpëruar, të cilët nuk pranojnë faktorët kryesorë që u sjellin një rezultat të caktuar por gjithmonë kërkojnë të krijojnë pretekste dhe justifikime për humbjen e tyre.

Një pretendim i tillë është publikuar edhe tek Uashington Post që thotë se shqiptarët u joshën nga pagesat në cash dhe nga vendet e punës dhe se askush përveç makinerisë së Metës nuk e bën më mirë këtë punë. Si i komentoni këto deklarata?

 

Kjo është një gjë fare qesharake që po dëgjoj dhe natyrisht edhe unë kam të drejtë të them se sa euro është paguar ky artikull. Vetë një diplomat amerikan në Shqipëri ka parë dy sondazhe dhe të dyja sondazhet në Fier dhe Tiranë kanë qenë fiks në 13 maj siç kanë dalë rezultatet në 23 qershor. Kështu që këto janë shkrime të porositura, siç janë edhe analistë që nuk mund të pranojnë dështimin e tyre, të cilët janë tendenciozë dhe natyrisht unë tashmë mund të vë në pikëpyetje se sa kanë marrë për këtë apo për atë.

Z. Meta, ju thatë se e majta fitoi sepse e majta në Shqipëri ka qenë gjithmonë shumicë . Për ju, vota e 23 qershorit a ishte një votë ndëshkuese për qeverinë Berisha dhe nëse ishte, pse nuk ishte e tillë edhe për ju që keni bashkëqeverisur për katër vjet?

Së pari, e majta është shumicë dhe kjo është konfirmuar nga të gjitha zgjedhjet që janë zhvilluar në Shqipëri. Pse kjo shumicë kaq e gjerë? Unë mendoj sepse ky ka qenë një mesazh për një ndryshim, njerëzit janë lodhur shumë nga presioni i politikës në shoqëri, nga presioni i politikës në jetën sociale, nga presioni i jashtëzakonshëm i politikës në media, nga protagonizmi i tepruar i politikës  dhe nga konflikti që ajo sjell. Dhe natyrisht ka qenë një trysni e madhe që e ka marrë përgjigjen në mënyrë të qetë në fund fare. Të jeni të sigurt se një pjesë e madhe e atyre që kanë shkuar nëpër mitingje kanë votuar për opozitën. Shkonin nëpër mitingje sepse nuk donin të humbitnin vendin e punës. Lidhur me LSI, sepse ju shpesh flisni për LSI-në, unë nuk kam folur për këto gjëra dhe jam përpjekur që të jem korrekt pasi kam pasur një marrëveshje me Partinë Demokratike dhe nëse shqiptarët e vlerësojnë Ilir Metën dhe LSI-në, e vlerësojnë për karakterin e tyre dhe jo për mungesën e karakterit. Ne nuk kemi dashur të bëjmë koalicion me Partinë Demokratike në vitin 2009. Rrethanat që erdhën impononin vetëm atë zgjidhje si faktor stabiliteti, si mundësi për të vazhduar disa procese. Këto përralla, jo 20 për qindëshi, këto vërtet kanë qenë në letër dhe asnjëherë nuk janë zbatuar dhe ne asnjëherë nuk kemi bërë debat për këto gjëra. Në sistemin e arsimit që nuk e di se sa ka Shqipëria, ka 20 mijë arsimtarë, as 50 mësues nuk janë futur nga LSI. Por, nuk ka qenë dhe nuk është ky problemi. Apo në 10 ministri s’ka pasur asnjë njeri që të ketë qenë në administrim si një person i Lëvzijes Socialiste për Integrim. Apo mund t’ju them që në Ministrinë e Ekonomisë, atje 80 për qind e drejtorëve kanë qenë të Partisë Demokratike dhe nuk i zbatonin porositë e ministrave që ishin atje sepse merrni porosi në tjetër vend. Apo në Ministrinë e Shëndetësisë ku gjysma e sistemit drejtohej nga tjetër kush e kështu me radhë. Pra, e gjithë kjo ka qenë një përpjekje e Partisë Demokratike që të mirat t’i merrte PD-ja, liberalizimin e vizave ta merrte Partia Demokratike dhe të mos merrte merita Lëvizja Socialiste për Integrim edhe pse zëvendëskryeministri dhe ministri i Jashtëm në atë kohë ishte koordinator i gjithë procesit. Ndërsa për problemet e kishte fajin këta të LSI-së.  Njerëzit i kuptojnë gjërat shumë drejt dhe shumë qartë që nuk është LSI përgjegjëse për problemet serioze gjatë katër viteve që kaluan. Lëvizja Socialiste për Integrim ka pasur një rol të rëndësishëm por edhe modest për të atë përfaqësim që ka pasur sepse 4 deputetë ka pasur LSI. Ka vënë veton vetëm në rastin të cilat kanë kanë pasur të bëjnë me interesat e mëdha të vendit, sikurse ka qenë rasti i marrëdhënieve me NATO-n, mbi ndryshimet për ligjin e SHISH. Aty ne mund të prishnim çdo marrëveshje me çdo forcë politike kushdo qoftë, që kundërvënë Shqipërinë me NATO-n, që kundërvënë Shqipërinë me Bashkimin Evropian apo që cenojnë rëndë stabilitetin dhe Kushtetutën e vendit. Për çështje të tjera ne jemi të detyruar të jemi të përmbajtur. Marrim atë përgjegjësi që na takon. Por, jo të krijojmë probleme të cilat dëmtojnë thelbin e një marrëveshje që në fakt ka  në thelb të saj stabilitetin e vendit.

Çfarë garancie ekziston që këto probleme të mos ndodhin edhe me Partinë Socialiste?

Marrëveshja me Partinë Socialiste është një marrëveshje shumë e natyrshme. Mendoj se është një marrëveshje shumë e hapur, transparente. E përgatitur në kohë. Nuk është një marrëveshje që vjen si rezultat i një situate delikate. Ne kemi vendosur një aleancë strategjike që do thotë që para zgjedhjeve, që edhe në rast se humbitnim do të qëndronim në opozitë. Natyrisht që thelbi i kësaj marrëveshjeje është angazhimi ynë që brenda 8 viteve Shqipëria të jetë një anëtar i Bashkimit Evropian, siç u bë Kroacia sot.

Çdo të thotë marrëveshje në kohë? Kur kishit vendosur ju të largoheshit nga mazhoranca dhe të bashkoheshit me PS pavarësisht se kur e bëtë publike ?

Asnjëherë nuk është menduar dhe nuk është menduar nga unë që LSI në zgjedhje të hynte bashkë me PD. Kjo ishte tërësisht e papranueshme politikisht. Ne kemi qenë në zgjedhjet lokale, që nuk janë zgjedhje politike dhe ishim pjesë e një marrëveshjeje dhe pjesë e një vazhdimësie e një qeverisje katër vjeçare. Lidhur me këtë çështje ne kemi qenë të prirur dhe të përgatitur për të dalë vetëm. Kemi pasur një ide për të krijuar një pol të tretë, ndoshta me FRD-në, ndoshta me disa parti të tjera. Kemi pasur vështirësi për të arritur dhe për të plotësuar një kuadër të tillë marrëveshje normale. Vetëm në fund të marsit është marrë një vendim dhe mbase pas një kërkese në rritje nga faktori i majtë evropian për të dalë së bashku në zgjedhje. Pra, kjo është në fund të marsit dhe 1 prilli është njohur si dita e marrëveshjes edhe pse ajo u mbajt në Shkodër.

Z. Meta kanë gabuar sondazhet që parashikonin atë  rezultat tjetër për ju apo shumë ngjarje kanë ndodhur javën e fundit?

Në një vend ku presioni ndaj votuesit është shumë i madh, për vendin e punës, për taksat ndaj biznesit e kështu me radhë, pjesa që përcaktohet si e pavendosur është një pjesë e cila shkon tek opozita. Në mitingun e Tiranës një javë para zgjedhjeve kam deklaruar se “të gjitha sondazhet që jepen dhe porositen synojnë të dekurajojnë votuesit e LSI-së. Dhe kam thënë që LSI do të marrë nga një mandat për çdo qark ashtu siç kam pasur bindjen absolute për 2 në Fier, nuk diskutohej 2 në Berat, nuk diskutohej 3 në Tiranë etj. Ne i falënderojmë të gjithë ata që na besuan dhe i premtojmë se ne do të jemi fjalëmbajtur para tyre.

Për kë sondazhe bëhet fjalë që janë bërë për dekurajim?

Unë nuk e di se kush janë. Unë di që janë bërë vazhdimisht sondazhe me rezultate joreale. E rëndësishme është që sondazhet nuk kanë atë efekt që mendohet tek votuesit. Ashtu sikurse nuk ka rëndësi për votuesin para zgjedhjeve në rast se unë them do marr 30 mandate apo do të marr kaq mandate. Rëndësi ka mesazhi përse do të votojnë.

Standardet kanë qenë shumë të rëndësishme në zgjedhje. Çfarë ndodhi realisht në terren me datë 23 qershor?

Nuk dua të hyj shumë në këtë çështje. Dua të shpreh keqardhjen time që policia në raport me zgjedhjet e vitin 2009 ka bërë hapa mbrapa për sa i takon çështjes së zgjedhjeve. Angazhimi i policisë në funksion të Partisë Demokratike ka qenë i jashtëzakonshëm, sidomos në qarkun e Kukësit, apo edhe në qarkun e Lezhës. Këto kanë qenë dy qarqet më evidente të saj të angazhimit të saj, në mënyrë për të bërë trysni dhe për tu hapur rrugën elementëve të dhunshëm, banditë, për të ushtruar presion ndaj njerëzve të LSI-së dhe ndaj njerëzve të opozitës, me qëllim deformimet e rezultateve. Unë e kam thënë edhe më parë, që kur kemi folur për Komisionin Qendror të Zgjedhjeve që u ndryshuar edhe ai në mënyrë të dhunshme dhe të paligjshme në Kuvend, kam thënë që opozita pavarësish nga çdo gjë që ka ndodhur, nuk do t’i bojkotojë zgjedhjet, nuk do të bëhet pjesë e një KQZ-je jo legjitime, por do të shkojë përpara dhe do të garantojë votën e qytetarëve shqiptarë më 23 qershor. Dhe këtë gjë e bëmë, me shumë vështirësi, duke paguar edhe një çmim të lartë. Por ajo që është e rëndësishme është që shkalla e rezultatit dhe e fitores dhe e rotacionit është tepër e thellë.

Nuk pati tentativa për të prishur zgjedhjet me sa kam parë unë…..

Nuk dua të flas për këtë çështje. Tentativa për të prishur zgjedhjet filloi që kur u prish Komisioni Qendror i Zgjedhjeve. Që këtu filloi tentativa e parë dhe natyrisht që kjo solli një reagim, një organizim më të fortë nga ana e opozitës, një mobilizim më të madh nga komiteti ndërkombëtar, mbi 300 vëzhgues ndërkombëtar në kuadër të ODIHR, të gjithë diplomatëve në Shqipëri, të cilët u vendosën nëpër qarqe duke fjetur me net të tëra në mënyrë që të evitohej çdo lloj parregullsie. Pra nuk mund të themi që nuk pati tentativa për të cenuar standardet, përkundrazi.  Por opozita ruajti qetësinë maksimale dhe vendosmërinë deri në fund të këtij procesi dhe populli shqiptar ka meritën kryesore për këtë që kemi arritur. Edhe këto probleme që kanë  ndodhur, si të thuash kanë mbetur në hije për shkak të këtij ndryshimi të dukshëm që ka ndodhur dhe këtij rotacioni, i cili krijon shpresë për të ardhmen.

Sa korrekte e quani një marrëveshje të prishur 2 muaj para zgjedhjeve e cila rrezikonte edhe zgjedhje të parakohshme në qoftë se edhe 2 deputetë të PS nuk do të ishin bashkuar votat me PD-në për të mbajtur qeverinë dhe për të zhvilluar zgjedhjet normalisht?

Duhet t’ju them se marrëveshja me Partinë Demokratike asnjëherë nuk është konsideruar nga unë e prishur. Ajo është konsideruar një marrëveshje e përfunduar, Sepse përpara zgjedhjeve në respekt dhe të kodit partitë duhet të përcaktojnë dhe të regjistrohen, do dalin më vete, do dalin në koalicion, në çfarë koalicioni do dalin, kështu që dhe LSI kishte detyrimin e saj për tu përcaktuar përpara zgjedhjeve. Dhe në këtë kuadër ne e vlerësuam të mbyllur marrëveshjen me PD, duke i qëndruar nga ana jonë shumë korrekte 100% gjithë angazhimeve që ne kishim marrë. Së dyti, duhet tju them juve, tu them gjithë demokratëve sot që na dëgjojnë, se unë kur kam bërë bisedën me z. Berisha i kam thënë; që e konsideroj të mbyllur për këto arsye, pozicioni im  për të ardhmen dhe i LSI do të jetë ky pozicion, të falënderoj shumë për bashkëpunimin që kemi pasur, ne kemi pasur një bashkëpunim të qëndrueshëm pavarësisht nga vështirësitë dhe i kam thënë këtë gjë, që ne natyrisht s’mund të rrimë në qeveri por ne nuk votojmë kundër kësaj qeverie, sepse nuk ka moral që ne deri tani jemi në këtë qeveri dhe të votojmë kundër saj. Dhe as z. Rama nuk ka kërkuar asnjëherë që ne të bënim gjoja një komplot siç u paraqit më vonë.

Si ka qenë takimi i fundit me Berishën?

Ka qenë shumë normal, korrekt dhe i përmbajtur. Pra ky ka qenë qëndrimi ynë. Ashtu sikurse qëndrimi ynë ka qenë që ne do të vazhdonim bashkëpunimin me PD në nivel vendor dhe s’kemi pasur asnjë kusht nga PS që ju nëse doni të bëni koalicion me ne duhet të prishni marrëveshjen me PD, në Bashkinë e Tiranës apo në vende të tjera. E kam thënë dhe herë tjetër, në qoftë se do më thoshte zotëri na krijohet njëproblem në KQZ, unë do isha përpjekur atë problem ta zgjidhja në mënyrë shumë normale dhe njerëzore duke kërkuar personit që ishte propozuar nga ana jonë që të jepte dorëheqjen. Sepse as për këtë nuk  ka patur ndonjë komplot që ne të merrnim KQZ, sepse duke pasur shumicë në KQZ do të ndryshonim vullnetin e popullit. Pra, mendoj që raporti ynë ka qenë tepër korrekt me PD dhe me kryetarin e saj. Në politikë ka marrëveshje, marrëveshja kishte një afat, afati ishte katër vjeçar.

A bën pjesë në marrëveshjen tuaj me PS ideja që ato ministri që do i drejtoni ju në nivelin politik do i drejtoni vetëm ju, dhe ato që do i drejtojë PS do i drejtojë vetëm ajo, sepse ju thatë që marrëveshja me PD nuk ka qenë e natyrshme, por dhe marrëdhëniet tuaja me PS nuk kanë qenë të lehta?

Mendoj se e kaluara ka sjellë mësime të vlefshme për të gjithë ne. Ne kemi detyrë të mësojmë jo vetëm nga gabimet tona, por të mësojmë dhe nga gabimet e Berishës, e demokratëve dhe e gjithë të tjerëve dhe në këtë kuptim të ecim më shpejt drejt një mënyre të re të bërit politik. Dhe mendoj që Shqipëria me zgjedhjet e 23 qershorit na bëri të gjithëve një mesazh të qartë që duhet të bëjmë një politikë tjetër. Një politikë e cila të jetë në funksion të shoqërisë dhe jo të jetë si presion ndaj shoqërisë. Pra të respektojë ato kërkesa që ka shoqëria, që ka qytetari ynë për një të ardhme më të mirë. Dhe në raport me PS të jeni të sigurt që do të jetë një marrëveshje që do të funksionojë shumë mirë, sepse është një marrëveshje parimore dhe qeveria do të funksionojë si një e tërë. Do të ketë frymën e ekipit dhe të angazhimit të përbashkët kështu që nuk do të ketë disa nënqeveri.

I keni ndarë postat e ministrave?
Jo nuk i kemi ndarë. Janë përgjegjësitë e kryeministrit dhe të kryetarit të kuvendit. Po punohet për të konkretizuar programin qeverisës, pra programin elektoral duke e shndërruar në një program qeverisës. Po punojnë ekspertët.

Do shtohet numri i ministrive?

Këtë gjë nuk e di nëse do të shtohet apo jo, dhe nuk është kjo më e rëndësishmja. E rëndësishme është qeveria do të jetë një e tërë.

Z. Meta, mendoni se 57% e shqiptarëve kanë votuar majtas apo është diçka më komplekse?

Unë mendoj që është kjo e dyta. Natyrisht që LSI me të gjithë politikën e saj dhe mesazhet e saj ka bërë të qartë që synon t’i shërbejë në radhë të parë stabilitetit të vendit. Kjo është në interesin dhe gëzon simpatinë e shumë votuesve që duan stabilitet dhe jo konfrontim të fortë dhe të ashpër politik. Së dyti LSI ka treguar që është një forcë që punon për konsensus, një forcë racionale, është një forcë e cila ka të qarta prioritete kryesore me të cilat duhet të përballet qeveria apo politika. Njëkohësisht është; përpjekur që mesazhin e saj ta japi në një mënyrë sa më të qetë, në një mënyrë sa më të butë.

A vini re tek partneri juaj, që do të jetë edhe Kryeministër i ardhëm,  të njëjtin lexim të kësaj vote?

Unë mendoj se e ka lexuar në mënyrë shumë të përgjegjshme. Reagimet e tij pas fitores kanë qenë shumë të përmbajtura dhe ka reflektuar një maturi shumë për tu lavdëruar.

Jeni i sigurt se i gjithë ai ekstremizëm socialist i akumuluar në gjithë këto vite do të jetë i përmbajtur?

Të jemi të sinqertë një pjesë e këtij ekstremizmi vinte për shkak të një frustrimi që vinte jo për shkak të qëndrimit në opozitë për një kohë të gjatë por edhe për shkak të një konflikti të panevojshëm që ushqehej edhe nga mazhoranca. Filozofia e kësaj mazhorance të re nuk është të provokojë opozitën përkundrazi ta respektojë dhe të bashkëpunojë me të.

Do të jeni kryetar i Kuvendit të Shqipërisë. Në vitin 2009 ju është ofruar dhe nuk e keni pranuar. Pse?

Në vitin 2009 unë nuk kam dashur fare të angazhohem në asnjë lloj pozicioni por nuk doja të jepja përshtypjen që marrëveshja me PD-në ishte e paqëndrueshme. Kjo edhe për shkak se ishte një marrëveshje e papritur edhe në planin e brendshëm dhe në atë ndërkombëtar. Mendova se në pozicionin e ministrit të Jashtëm, edhe për shkak të procesit të liberalizimit të vizave, doja edhe një mbështetje nga e majta evropiane për këtë proces, ky ishte pozicioni më i dobishëm. Lidhur me tani mendoj se natyrisht duhet të marrim përgjegjësi dhe kjo është një përgjegjësi në një institucion shumë të rëndësishëm ku duhet të rrezatojë fryma e dialogut, e bashkëpunimit, për sfidat që ka vendi përpara dhe unë mendoj që bashkëpunimi dhe dialogu janë karakteristika thelbësore të LSI-së.

A ka një marrëveshje mes jush dhe z. Rama që përtej kryetarit të Kuvendit ju mundëson ju edhe kandidimin për President të Republikës në fund të mandatit?

Nuk kemi marrëveshje përveç marrëveshjes së Shkodrës. Çdo marrëveshje tjetër që do të bëhet në vijim të marrëveshjes së Shkodrës do të bëhet publike.

E aspironi ju postin e Presidentit të Republikës?

Ne jemi në funksion të zgjidhjeve më të mëdha që dalin përtej dëshirave dhe ambicieve individuale.

Që do të thotë kjo e fundit?

Kjo do të thotë së detyrën e kryetarit të Kuvendit, në rast se Kuvendi do të ma besojë mua, unë do ta kryej në mënyrë më konstruktive, më të përgjegjshme.

I referohem disa deklaratave të eksponentëve të lartë socialistë mbi administratën para zgjedhjeve që ajo është e politizuar. Tani që keni fituar, si do të silleni me administratën sepse thatë që e keni lexuar mesazhin siç duhet? A do të ndihet e kërcënuar administrata publike në Shqipëri?

Në do të respektojmë ligjet. Nuk ka pse të ndihet e kërcënuar administrata. Ne do të respektojmë ligjet që janë në fuqi.

Z. Rama deklaroi se ndihen të kërcënuar drejtorët e shkollave apo tatimorët etj…

U ka bërë thirrje që ata të mos bënin presion për shkak të detyrës mbi fëmijët, mbi prindërit e kështu me radhë.

Ai madje ka paralajmëruar që do të ketë ndëshkime për ta…

Do të respektohet ligji. Kush ka qenë në rregull me ligjin do të jetë shumë i qetë.

Po me Bashkinë e Tiranës çfarë marrëdhënieje do të keni? Me kryetarin dhe me pjesën e anëtarëve të LSI-së në Këshillin Bashkiak të Tiranës?

Lidhur me pushtetin vendor u kemi dhënë sovranitet të plotë përfaqësuesve tanë të cilët do të veprojnë edhe në kuadër të Aleancës për Shqipërinë Evropiane.

Çdo të thotë sovranitet?

Do të thotë të respektojmë interesin e qytetarëve. Qëllimi është gjithmonë të ndihmojmë kryetarët e bashkisë për më shumë transparencë, për më shumë investime. Dhe për të pasur gjithmonë qytetarët të parët.

Përshembull  planin urbanistik z. Meta për të cilin Rama ka deklaruar se do ta anulojë?

Nuk e kam dëgjuar këtë çështje, çdo gjë do të bëhet sipas ligjit.

 

Në mazhorancën 8 vjeçare u vunë re plane nepotike dhe  një përqendrim ekonomik në duart e një pakice e cila morri dhe notë negative. Në qeverisjen tuaj z. Meta a e shikoni rrezikun e përqendrimet ekonomike  në duart e një pakice që e vë në vështirësi të jashtëzakonshme vendin?

Natyrisht që këto janë rreziqe potenciale dhe absolutisht mendoj që transparenca është ilaçi më i mirë. Dhe transparenca është diçka që nuk bëhet vetëm nga qeveria, por dhe nga parlamenti, nga institucione të tjera por dhe nga media, nga ju, nga analistët, nga të gjithë. Ajo që unë besoj shumë që do të ndryshojë kjo mazhorancë në raport me mazhorancën e mëparshme është në radhë të parë mendoj gjithë përfshirja. Që do të thotë që do të jetë një qeveri shumë e hapur për dialog. Për dialog me ju si përfaqësues të medias dhe opinionit publik, për dialog me shoqërinë civile në përgjithësi, për çështjet ekonomike që ju ngritët, apo sociale me grupet e interesit. Pra me dhomat e tregtisë, të industrisë, të shoqatave të ndryshme, të bizneseve në vend gjë që ka munguar praktikisht të paktën për këto katër vite ose ka qenë fare formal. Pra, mendoj që do jetë një proces i tillë i cili do të krijojë mundësi për të patur një qeverisje transparente larg ndikimit të grupeve të caktuara të cilat kontrollojnë çdo gjë, bëjnë vendime dhe marrin përfitimet e tyre nga një qeveri në mënyrë të padrejtë dhe abuzive. Besoj se gjithëpërfshirja do jetë një element shumë i rëndësishëm dhe që do bëjë një dallim thelbësor midis mazhorancës që ka ardhur me mazhorancën e mëparshme.

A mendoni që nevojiten procese dhe një kujdes më i madh për ta drejtuar dhe sistemin financiar drejt një transparence akoma më të madhe, për shkak të shmangies të këtij bllokimi që kanë aktualisht bankat?

Ne do të identifikojmë qartë të gjitha problemet,  sepse duhet të kemi parasysh që edhe në raport me statistikat dhe me gjendjen reale, ka pasur probleme të transparencës, në shumë aspekte, që tek borxhet e papaguara, për punët publike e shumë çështje të tjera. Për to do të bashkëpunojmë ngushte edhe me guvernatorin e Bankës Kombëtare, por do të bashkëpunojmë ngushte me të gjithë institucionet ekonomike dhe financiare dhe jam i bindur që në një kohë të shpejtë ne do të arrijmë në një zhbllokim dhe në një frymëmarrje të ekonomisë, që do të ndihet deri tek biznesi i vogël. Natyrisht që objektivi ynë kryesor është që të vëmë Shqipërinë në punë, dhe në radhë të parë përmes rritjes së prodhimit në vend, sepse vetëm kjo do të sigurojë uljen  e importeve, rritjen e eksporteve, një ekonomi konkurruese dhe të qëndrueshme.

Do të rishikohen koncesionet, sikundër ka paralajmëruar z. Rama?

Transparenca do të jetë në pikat e para të kësaj qeverisje dhe  mazhorance, dhe çdo gjë do të bëhet sipas ligjit.

Si e gjykoni faktin që 20 për qind e deputetëve vijnë nga biznesi dhe a ka mundësi mazhoranca juaj të frenojë ambiciet e tyre normale?

Çdo vendimmarrje, edhe në qeveri, edhe në Parlament, dhe kudo në çdo institucion do të jetë publike. Do të gjykohet nga të gjithë nëse vendimi është marrë në interes të publikut, apo në interes të grupeve të caktuara. Nuk duhet të paragjykojmë. 85 për qind e gjithë ekonomisë sonë, sot është një ekonomi private. Nuk më duket ndonjë gjë e tmerrshme sepse paska 20 apo 25 deputetë që vijnë nga sipërmarrja sepse 85 njëkohësisht e atyre që janë të punësuar në Shqipëri janë punësuar në sektorin privat.

A nuk kemi të bëjmë me një konflikt interesi në këtë rast ?

Ju dyshimet duhet t’i mbani. Të mos e humbni vigjilencën.

Mos e humbi ju vigjilencën…

Po e humbën edhe ne se mund të na interesojë, prandaj ta mbani të zgjuar, pastaj puna është po e humbët dhe ju. Këtu është problemi. Ju e dini shumë mirë që çdo akt qeveria publikohet, çdo akt parlamenti publikohet, çdo urdhëresë e ministrave publikohet. Ne jemi këtu për të qenë të dyshuar nga ana juaj, për të qenë të kontrolluar nga ju dhe nga opinioni publik. Të mos ecim me paragjykimet sepse paragjykimet nuk na ndihmojmë por dyshimet t’i mbajmë.

Keni përcaktuar një afat të marrëveshjes me Partinë Socialiste duke qenë se deri tani e keni cilësuar vetëm si strategjike?

Nuk ka afat eksplicit por ka një objektiv strategjik; anëtarësimi i Shqipërisë në Bashkimin Evropian mundësisht brenda 8 viteve.

Pra, është një marrëveshje e shtrirë në 8 vjet?

Kështu duhet të kuptohet.

Sa poste ministrore do të marrë LSI-ja?

Nuk është fare kjo më e rëndësishmja. Në këtë moment më e rëndësishmja është të ecim drejt realizimit të programit të LSI-së për rritjen e punësimit në vend.

Aleatët e tjerë të koalicionit a do të përfshihen në qeveri në poste ministrore?

Sigurisht që Aleanca për Shqipërinë Evropiane është një e tërë.

A do ta pranonit në koalicion PDIU-në nëse do të kishte një tentativë të tillë lëvizjeje? 

Nuk mund të flas në emër të gjithë koalicionit, sepse kjo nuk është etike. Por unë e kam thënë edhe para zgjedhjeve të 13 qershorit që fryma gjithëpërfshirëse do të jetë e pandalshme.

Punësimi thoni z. Meta, por ku dhe si do t’i punësoni njerëzit? A do të ketë më shumë ministri dhe më shumë njerëz të punësuar në administratë?

Me programin për punësimin, janë pesë pikat e punësimit. Ju nuk arrini të kuptoni. Punësimi është pikërisht në rritjen ekonomike të vendit, është në vënien në punë të bujqësisë dhe modernizimin e saj. Është në krijimin e parqeve industriale dhe tërheqjen e investitorëve të huaj, duke u ofruar lehtësitë maksimale vetëm në funksion të arritjes së këtij objektivi. Pra ky është punësimi.

Z. Meta do të shtonin numrin e ministrive apo struktura e qeverisë do të mbetet e njëjtë?

Çështja e strukturës do të diskutohet. I takon Kryeministrit të ardhshëm të bëjë propozimet e para sepse ai vetë do të jetë Kryeministër.

Ju vetë sa ministri do të kërkoni?

Nuk është kjo më e rëndësishme për ne.

Unifikimi i programeve ka rëndësi. Debati i taksave ka qenë një nga më kryesorët, pasi ka pasur propozime të ndryshme nga PS-ja dhe LSI-ja për këtë çështje. Çfarë luan në këtë histori?

Unë mendoj se diskutimi dhe debati që është bërë natyrisht që sjell nevojën për reflektim, por në parim të gjithë jemi dakord që ai që fiton më shumë duhet të kontribuojë më shumë. Konkretisht se si do të ecet më tej, kjo do të bëhet publike në momentin që do të detajohet programi qeverisës. Por është theksuar se ky program përveç ekspertëve të forcave politike të cilat do të përbëjnë qeverinë e ardhshme do të jetë një program i konsultuar edhe më gjerë.

Meqë jemi te programi. Z. Rama tha pas zgjedhjeve se Shqipëria është në krizë dhe se të gjithë bashkë duhet ta përballojmë. Çështja është a janë në këto kushte kur deficiti buxhetor edhe investimet gjatë 6 muajve të fushatës kanë qenë shumë të larta, të ardhurat të ulëta gjithashtu, a janë të realizueshme objektivat tuaja për premtimet elektorale për uljen e taksave apo heqjen e TVSH-së për energjinë, heqjen e akcizës dhe ato që ju keni premtuar?

Së pari, duhet të kemi parasysh se në themelin e kësaj qeverisjeje duhet të jetë transparenca dhe përsëri kjo do të verifikohet nga ju në radhë të parë dhe nga opinioni publik. Një nga elementët e parë të qeverisë do të jetë inventari, pra cila është gjendja reale financiare, buxhetore, ekonomike që do t’i bëhet e ditur opinionit publik. Së dyti, do të jetë një program për stabilizimin e kësaj gjendjeje, për mbushjen e këtyre gropave dhe natyrisht që kjo sado ndikim të ketë nuk do të mund të shmangë vullnetin për të realizuar ato reforma dhe ato premtime të cilat e rrisin ekonominë në vend e gjallërojnë atë dhe çojnë përpara dhe reformat sociale.

A keni një ide se cilat do të jenë vendimet e para që do të merrni në 100 ditët e para? Cili do të jetë premtimi i parë që do të mbani?

Këto do të bëhen publike kur të jetë gati programi. Premtimi i parë është transparenca. Ky është premtimi i parë dhe mendoj se kjo është shumë e rëndësishme.

Keni pasur dy marrëveshje të tjera jo kaq të shkruara apo të përkufizuar me z. Rama. Një në vitin 2002 dhe të shkruar në vitin 2007. Në të dyja rastet ju pretendoni se z. Rama nuk i ka qëndruar këtyre marrëveshjeve. Çfarë ju bën të besoni se këtë herë do t’i qëndrojë kësaj here?

Po ndoshta edhe thënia popullore “e treta e vërteta”.

E dyta, a kanë lënë hije në raportet mes jush akuzat e përbashkëta që keni shkëmbyer këto katër vjet?

Mendoj se kryesore është angazhimi i përbashkët për të ardhmen dhe mendoj që kjo do të dominojë.

A keni qenë ju i zhgënjyer nga qeverisja me Partinë Demokratike?

Nuk dua të flas për atë kohë sepse unë natyrisht kam pasur mendimet e mia. Këto mendime ia kam shprehur edhe z. Berisha, ua kam shprehur edhe përfaqësuesve të caktuar, por nuk mund të flas sepse nuk më duket e drejtë të flas për një gjë që ka kaluar.

Z. Berisha ka dhënë dorëheqjen në fund të një rezultati në fakt që ia bënte të pamundur vijimin e mëtejshëm. Në gjykimin tuaj si ka qenë ai si Kryeministër i vendit gjatë 4 viteve që keni bashkëpunuar me të dhe si e gjykoni gjestin e fundit dhe kontributin e tij në politikë? 

Kjo do të donte një kohë të gjatë dhe ndoshta unë duhet të isha pak më i qetë pas një fushate mjaft intensive dhe të lodhshme. Por e rëndësishme është që situata në vend është e qetë pas zgjedhjeve, ka përgatitje për të bërë një tranzicion si në çdo vend normal evropian dhe mendoj se kjo do të na ndihmojë për të lënë pas disa probleme që patëm me zgjedhjet. Dhe është shumë e rëndësishme që ky proces të vazhdojë në mënyrë të tillë. Dorëheqja mendoj se ishte një akt normal edhe civil dhe si çdo akt i tillë vlen të vlerësohet.

Po e ndiqni garën që po zhvillohet në PD?

Nuk kam asnjë interes për garën në Partinë Demokratike.

Kush mund të jetë kryeopozitari më i mirë për ju dhe z. Rama gjatë kohës që do të jeni në pushtet?  

Për ne nuk ka rëndësi fare se kush do të jetë kryeopozitar. E rëndësishme është që opozita e re të kontribuojë edhe ajo për të bashkëpunuar për të mirën e vendit, për të mirën e reformave. Të jetë një opozitë konstruktive, një opozitë me propozime. Blendi pak më parë më bëri pyetjen se cili është mendimi im për z. Berisha si kryeministër. Ndoshta, mendoj unë, një nga problemet më të mëdha të tij ka qenë se merrej shumë me çështjet politike, merrej me çështjet e opozitës ndërkohë që mund të merrte disa vendime që mund të dukeshin si të vogla dhe të parëndësishme por të cilat kishin impakt të përditshëm në jetën e qytetarëve shqiptarë.

Z. Rama një ditë përpara se z. Berisha të jepte dorëheqjen, ku doli për fitoren e aleancës suaj, ku tha i uroj jetë private të qetë. A mos ishte ky tejkalimi i kufirit ky nga z. Rama?

Për ne është e rëndësishme të ecet vërtet më shpejt drejt një konsensusi sa më të gjerë për ato reforma që ka nevojë vendi sepse një nga problemet më të mëdha që ka pasur vendi ka qenë jo se ka pasur apo s’ka pasur maxhorancë  apo opozitë, por sepse bashkëpunimi i tyre nuk ka qenë aty ku duhej. Prandaj edhe për të ardhmen pavarësisht se ne kemi një maxhorancë tepër të gjerë, konsensusi është shumë i rëndësishëm për të forcuar stabilitetin e vendit, për të rritur besueshmërinë vendit edhe tek partnerët tanë ndërkombëtarë.

Ju keni qenë kundër një sistemi shëndetësor falas që ka premtuar PS. Si do të rakordoni në këtë pikë?

Mendoj që kur të publikohet programi i ardhshëm i qeverisë mund të diskutojmë më konkretisht për çdo çështje.

Tani në këtë mazhorancë me 84 vota do të kërkoni që bëhen ndryshime kushtetuese për t’i dhënë më shumë garanci opozitës qoftë për emërimet në gjykata apo të presidentit etj?

Ne kemi qenë dhe jemi që Kushtetuta të rivendoset në themelet për të cilat votoi populli shqiptar dhe që u ndryshuan në atë mënyrë që ne e kemi konsideruar të padrejtë dhe i qëndrojmë edhe sot e kësaj dite. Por, për të bërë ndryshime në Kushtetutë apo qoftë edhe në Kod, një parim thelbësor është konsensusi dhe me opozitën në mënyrë që të ketë një legjitimitet të  padiskutueshëm sepse nuk mund të ndryshosh Kodin pa u dakordësuar dhe me opozitën dhe t’i thuash që unë e bëra ligjin kështu dhe tani po deshe hajde, po deshe mos hajde në zgjedhje. Kështu që parimi i konsensusit mbetet i padiskutueshëm. Natyrisht që vullneti ynë ka qenë, është dhe do të jetë për këtë çështje. Sa i përket çështjes së ekuilibrit, mendoj se u zgjidh edhe puna e ekuilibrit të ri politik sepse ishin të gjitha pushtetet të përqendruara në dorën e një force politike. Tani kemi një ekuilibër  sepse kemi një president i cili është zgjedhur kryesisht nga demokratët por edhe nga ne. Mendoj që do të ketë një bashkëpunim midis presidentit dhe mazhorancës së re në Parlament, në qeveri, institucione dhe të tjera. Është një gjendje ekuilibri e cila imponon një bashkëpunim objektiv dhe të gjerë politik në vend. Ndërsa ndryshimet në Kushtetutë dhe në Kod kërkojnë konsensus. Nëse të tjerët japin konsensusin ne jemi shumë të lumtur për këtë gjë.

Çfarë do bëni ju për Radio Televizionin Shqiptar?

Mendimi im është që t’i japim të gjitha institucioneve pavarësinë e duhur. Të jenë garante për të gjitha palët. Të vendosim disa kolona të shtetit dhe besoj se do ta bëjmë këtë gjë.

Mendoni se do të keni mundësi të realizoni disa nga projektet tuaja në këto vështirësi financiare?

E theksova edhe më parë që akti i parë do të jetë transparenca. Askush nuk mund të thotë sot me saktësi të plotë se si është gjendja financiare e vendit. çdo gjë do të bëhet e ditur për publikun por kjo nuk do të ndryshojë objektivat tona. Do të kërkojë një periudhë stabilizimi por natyrisht që reformat, ristrukturimi i ekonomisë do të ndodhë siç janë premtuar.

Rama në programin thotë se do të krijojë 300 mijë vende pune dhe ju nuk kishit një shifër konkrete. Le tga themi që ai fantazon dhe ju jeni më realist. Në këtë kohë që po rrini më shumë bashkë po ju bën ai më me fantazi apo ju po e bëni më realist?

Mendoj se objektivat domethënës janë një motivim më shumë për të punuar më shumë për të shkuar drejt tyre. E rëndësishme është që çdo ditë të tregohet përkushtim maksimal për realizimin e një programi dhe për të reflektuar kërkesat dhe nevojat e përditshme të qytetarëve ndaj qeverisë. Në rast se demonstrohet kjo çdo ditë atëherë beteja është e fituar. Vetëm distanca midis qeverisë dhe qytetarëve sjell zhgënjim dhe atë reagim që e pamë më 23 qershor.

Ka qenë realizmi juaj që bënë që PS të mbesë aq sa ishte dhe LSI të rritet shumë?

Së pari PS është rritur. Ky është një fakt i pamohueshëm. Së dyti PS ka një meritë që insistoi për të bërë këtë koalicion, atëherë ku u sulmua, kur u anatemua nga të gjithë. Dhe natyrisht që kërkesa për këtë koalicion  u bë mbi një besim që ky bashkëpunim do të shumëfishonte energjitë dhe elektoratin sikurse edhe ka ndodhur.

 

Nga PS është deklaruar se ministrat nuk do të jenë deputet. Mendoni që do të cenohet niveli profesional i qeverisjes kur qeveria nuk do të jetë e përfaqësuar nga nivelet më të larta politike dhe kapacitet  më të larta profesionale që ka të paktën nga PS?

Unë nuk kam asnjë arsye që të ndërtoj përgjigje mbi komentet që ju keni dëgjuar. Por në respektin tuaj mund tju them që kjo është një reformë. Unë besoj që është një hap pozitiv sepse i jep mundësi qeverisë të jetë plotësisht efikase, i jep mundësi parlamentit të jetë plotësisht efikas, sepse ne kemi parë raste kur është shtyrë parlamenti sa të vij ministri që është atje apo të vij nga jashtë shtetit, të vij të votojë si deputet, e kështu me radhë. Kështu që nuk ka asgjë të keqe, njerëzit bëjnë zgjedhjet e tyre mbi bazë të propozimeve që bën drejtuesi i qeverisë. Të dyja janë detyra shumë të rëndësishme, shumë të çmuara si e deputetit, si e ministrit, nuk mendoj se Shqipëria nuk ka njerëz për ministra.

Ja dedikuat fitoren e LSI të rinjve dhe grave?

Unë në radhë të parë ja dedikoj të gjithë të rinjve dhe të rejave në gjithë Shqipërinë. Jam krenar për LRI Është një organizatë e jashtëzakonshme dhe e paparë.

Sa të përfaqësuara do jenë gratë  e LSI në qeverinë e re?

Kemi numrin dy në listën e Tiranës, e cila është dhe e re dhe grua.

Do të jetë në qeveri znj. Gjosha?

Nuk kemi marrë asnjë vendim dhe nuk kemi bërë asnjë diskutim.  Do të shikojmë strukturën e re të qeverisë dhe do të diskutojmë. Nuk kemi asnjë emër për këtë çështje.

LSI-ja pati një rritje të jashtëzakonshme në këto zgjedhje, një sukses tepër i madh i SI-së në këto zgjedhje. Çfarë do të mendoni ju tashmë përballë këtij suksesi për ta bërë atë të qëndrueshëm, afatgjatë?

Mund t’ju them me kënaqësinë maksimale që 90 për qind e strukturave në të gjithë vendin kanë punuar në mënyrë të shkëlqyer, dhe i kanë besuar objektivat që unë kam pasur për LSI-në dhe për Qarqet e caktuara. Natyrisht ka pasur edhe rezultate të cilat mund të ishin më të mira. Ajo që mbetët për të ardhmen është kujdesi i vazhdueshëm  për ripërtëritjen e strukturave, për të përmirësuar përfaqësimin e tyre. Kjo është një punë e përditshme që ne e kemi bërë në mënyrë të përditshme dhe do të vazhdojmë ta bëjmë. Lidhja me njerëzit është baza e të gjithë suksesit tonë.

Çfarë do të bëhet me borxhin e brendshëm që qeveria ka ndaj kompanive që kanë kryer punë publike dhe nuk janë likuiduar akoma?

Askush nuk e di shumën e saktë, kjo shumë do të verifikohet, janë disa alternativa. Është çëshjte prioritare. Do të jetë një proces zinxhir që do të ndihet deri tek biznesi i vogël.

INTERVISTE July 1, 2013 23:36
Komento

1 Koment

  1. bbb July 2, 01:11

    Sa poste ministrore do të marrë LSI-ja?

    Nuk është fare kjo më e rëndësishmja. Në këtë moment më e rëndësishmja është të rrisim nummrin e misitrive dhe dikastereve,qe eshte numer shume i vogel per nje Rilindje te LSIse. Me pas shumzeoji me 40% dhe del heaspi i qeruar.

    Aleatët e tjerë të koalicionit a do të përfshihen në qeveri në poste ministrore?

    Sigurisht do marrin poste qveritare ata qe nuk kane llapur kudra aleances se 1 prillit dhe kudra LSIse. Njoh une nje kryetar partie qe ka qe me 1 Prill qe po i ha kurrizi…

    A do ta pranonit në koalicion PDIU-në nëse do të kishte një tentativë të tillë lëvizjeje?

    Nuk mund të flas në emër të gjithë koalicionit, sepse kjo nuk është etike. Por ata do te ingranohen ne programin e LSi per te vjedhur ku te mundemi e sa te mundemi, ka vend jo vetem per PDIU por per cdo parti tjeter…bile edhe per PDne…

    Punësimi thoni z. Meta, por ku dhe si do t’i punësoni njerëzit? A do të ketë më shumë ministri dhe më shumë njerëz të punësuar në administratë?

    Me programin për punësimin, janë pesë pikat e punësimit. Ju nuk arrini të kuptoni. Punësimi është pikërisht në rritjen prodhimit te droges ne Myzeqe, trafikut te hashshit, cigareve kotrabande, skrapit dhe cmontimit te metaleve me vlere si dhe punesimi neper ambasada dhe kosnullata i militantve tane, kryesisht kollovrave te Policanit. Pra ky është punësimi.

    Z. Meta do të shtonin numrin e ministrive apo struktura e qeverisë do të mbetet e njëjtë?

    Çështja e strukturës do të diskutohet. I takon Kryeministrit të ardhshëm të bëjë propozimet e para sepse ai vetë do të jetë eshte i etur per sa me shume ministri por edhe ne te LSI po na han duart se me kaq pak ministri ske cte vjedhesh.

    Ju vetë sa ministri do të kërkoni?

    Nuk është kjo më e rëndësishme për ne. Rendesi ka te rritet numri i ministrive njerehere, pastaj i regullojme ato pune…se ja kemi mare doren…

    A keni një ide se cilat do të jenë vendimet e para që do të merrni në 100 ditët e para? Cili do të jetë premtimi i parë që do të mbani?

    Këto pyetje ma beri edhe nje qytetar ne Polican…Cfare do beni ju beni ju ne fillim per Policanin?? Do bej minister urgjentisht Ylli Manjanin- i thashe une

    Keni pasur dy marrëveshje të tjera jo kaq të shkruara apo të përkufizuar me z. Rama. Një në vitin 2002 dhe të shkruar në vitin 2007. Në të dyja rastet ju pretendoni se z. Rama nuk i ka qëndruar këtyre marrëveshjeve. Çfarë ju bën të besoni se këtë herë do t’i qëndrojë kësaj here?

    Po ndoshta edhe thënia popullore “e treta e vërteta”.Se Rama eshte rrufjan e dredh bishtin, kurse une po e pashe prapa se Rama hedh vickla…gati e kam aleancen me PDne

    E dyta, a kanë lënë hije në raportet mes jush akuzat e përbashkëta që keni shkëmbyer këto katër vjet?

    Eh…Mendoj se kryesore është angazhimi i përbashkët për të ardhmen dhe mendoj që kjo do të dominojë. Te shkuara te harruara thote populli yne i majte kokpalare…

    A keni qenë ju i zhgënjyer nga qeverisja me Partinë Demokratike?

    I zhgenjyer disi se nuk kishim me shume se 20% te pushtetit…Nuk vodhem sa duhet…

    Z. Berisha ka dhënë dorëheqjen në fund të një rezultati në fakt që ia bënte të pamundur vijimin e mëtejshëm. Në gjykimin tuaj si ka qenë ai si Kryeministër i vendit gjatë 4 viteve që keni bashkëpunuar me të dhe si e gjykoni gjestin e fundit dhe kontributin e tij në politikë?

    Berisha deri me 1 Prill ishte yll bote, njeri i shkelqyer dhe korrekt. Pas 1 Prillit u kthye ne njeri te neveritshem…

    Z. Rama një ditë përpara se z. Berisha të jepte dorëheqjen, ku doli për fitoren e aleancës suaj, ku tha i uroj jetë private të qetë. A mos ishte ky tejkalimi i kufirit ky nga z. Rama?

    Ju keni qenë kundër një sistemi shëndetësor falas që ka premtuar PS. Si do të rakordoni në këtë pikë?

    Mos ja vini re Edit se ja ka futur kot per shendetsine… Aq me teper qe ate ministri do e marrim neve te LSI…

    Mendoni se do të keni mundësi të realizoni disa nga projektet tuaja në këto vështirësi financiare?

    Vallaji zoti i ruajt njerzit, se programi yne synon pasurimin tone si parti dhe jo mbushjene barkut me buke te fukarenjve.

    Rama në programin thotë se do të krijojë 300 mijë vende pune dhe ju nuk kishit një shifër konkrete. Le tga themi që ai fantazon dhe ju jeni më realist. Në këtë kohë që po rrini më shumë bashkë po ju bën ai më me fantazi apo ju po e bëni më realist?

    Mendoj se mendoj se ka thene 3000 veta…e keni degjuar gabim…ne do pundsojme vete njerzit dhe militantet tane….

    Ka qenë realizmi juaj që bënë që PS të mbesë aq sa ishte dhe LSI të rritet shumë?

    Së pari PS nuk është rritur. Ky është një fakt i pamohueshëm. Ketu del merita e eEdit qe na dha doren ne te LSI qe do perfudnonim si FRD nqs nuk hynim ne koalicion me PSne

    Nga PS është deklaruar se ministrat nuk do të jenë deputet. Mendoni që do të cenohet niveli profesional i qeverisjes kur qeveria nuk do të jetë e përfaqësuar nga nivelet më të larta politike dhe kapacitet më të larta profesionale që ka të paktën nga PS?

    Jam kuder idese. Unë nuk kam asnjë arsye që të merrem me budalleqet qe thote Rama. Une jma i zoti qe te bej 3-4 pune njeresh. Te punoj edhe kryetar partie, edhe kryetar parlamenti, edhe mnister edhe shtangist edhe boksier(e mabni mend si e rraha Zhosefinen??)Une skam frike nga pune. Mesa duket ata te PS jane qullasher dhe e kane frike punen. Pune te jep para

    Do të jetë në qeveri znj. Gjosha?

    Zoti Gjosha nuk mund tejete ne qeveri sepse ai nuk permbush kushin kryesor te LSIse..Nuk e ka origjinen nga Skarapri.

    LSI-ja pati një rritje të jashtëzakonshme në këto zgjedhje, një sukses tepër i madh i SI-së në këto zgjedhje. Çfarë do të mendoni ju tashmë përballë këtij suksesi për ta bërë atë të qëndrueshëm, afatgjatë?

    Ne me mashtrime dhe me para siguruam 17 mandate. Duhet pune, mashtrime, tja besh popullit mendjen dhalle. Pastaj po hodhe para je ne rregull…

    Çfarë do të bëhet me borxhin e brendshëm që qeveria ka ndaj kompanive që kanë kryer punë publike dhe nuk janë likuiduar akoma?

    Ne fakt nuk eshte puna e qeverise te merret me borxhe…Qeveria ka pune te tjera… Si te fitosh nje tender, si te shesesh ndonje hidrocentral, si te nxejrresh ndonje vize…Por per borxhin…Askush nuk e di shumën e saktë, kjo shumë do të verifikohet, janë disa alternativa. Është çëshjte pa rendesi. Ky vend ka jetuar, po jeton dhe do jetoje me borxhe….

    Reply to this comment
Shiko komentet

Komento

Your e-mail address will not be published.
Required fields are marked*

Sondazh

A ËSHTË EDI RAMA I MAJTË?

Shiko rezultatin