Motive popullore dhe frymëzime të tjera nga rinia e parë

March 8, 2016 00:08

Motive popullore dhe frymëzime të tjera nga rinia e parë

Motiv popullor

Kur më sheh ndënë qerpikë,
më mbetet fjala në grykë,
kur më del si xhind në ëndrra,
më lë fryma – më lë zëmra.

Natë e ditë – ballë për ballë,
s’rrojmë dot në një mëhallë,
s’shkohet jeta në furtunë,
ja vdis ti – ja të vdes unë!
Tiranë, 1973

Iku puna jonë…

Eh-moj-pëllumbeshë,
sa shumë që u deshëm,
me dashurinë tonë,
botën e përqeshëm.

Kur të shoh të zbardhur,
s’di ç’të them më parë,
për rrudhat e tua,
më vjen për të qarë!

Iku puna jonë,
e sosëm lëndinën,
për rininë që shkoi,
të vëmë ulërimën…
1983

Unë t’i kam puthur ata sy

Kot më shikon me sy të vrejtur,
kot ti me mua mban mëri,
dikur me mall të përvëluar,
unë t’i kam puthur ata sy.

Kot më shikon e zëmëruar,
unë prapë të dal në ëndërrime,
prushi i nxehtë i buzës tënde,
mbeti përjetë në buzën time…
1988

Nuk gëzohem që të pashë

Dhjetë vjet që s’ishim parë,
ndarë si në burg të zi,
sa të pashë-sot-menjëherë,
prapë rashë në dashuri.

Na përplasi dallgë e jetës,
nëpër brigje pa mëshirë,
larg e larg njëri-tjetrit,
si dy yj në errësirë.

Dhe tani mbas dhjetë vjetësh,
u takuam në një breg,
ti e urtë je bërë si shqerë,
unë i butë si sheleg.

C’t’i kujtojmë ato zjarre,
që u ndezën e u shuan,
ç’t’i kujtojmë ato netë,
kur me zjarr u përvëluam.

Më kanë lodhur ato vite,
më shumë ndarje se takime,
pak nga pak çdo gjë u shua,
mbeti veç vetmia ime.

Nuk gëzohem që të pashë,
zog që larg ke fluturuar,
tani që të dua prapë,
ndihem dy herë i vetmuar…

Athinë, 1993

March 8, 2016 00:08
Komento

4 Komente

  1. Lola March 8, 09:59

    Shume te bukura! Te ndiera.
    Oh sa na fute ne mendime….

    Keshtu e ka jeta!
    Duhet te jete i lumtur kush i ka provuar keto ndjenja. Si dashurine dhe ndarjen.

    Reply to this comment
  2. tom March 8, 12:21

    Vlere.
    Nje kumt per te gjithe ata,qe dashurojne poezite e verteta te Benit.

    Reply to this comment
  3. ODISEJA March 8, 22:10

    O YLL I JUGUT I LABERISE HEROIKE

    VARGJET E TUA JANE PERLA SHQIPTARE SIMBOLIKE
    I SHKELQYER I SHKELQYER

    Reply to this comment
  4. BUBA September 5, 13:34

    I keni thene te TETERA SHOKU DUKA!!!!!

    Reply to this comment
Shiko komentet

Komento

Your e-mail address will not be published.
Required fields are marked*