Pagat e profesioneve të lira, Kushtetuesja rrëzon Qeverinë

July 14, 2016 16:01

Pagat e profesioneve të lira, Kushtetuesja rrëzon Qeverinë

Gjykata Kushtetuese ka shfuqizuar një ligj të Qeverisë që i përcakton pagën profesioneve të lira dhe mbi këtë pagë trefishoi pagesat e kontributeve.

Në njoftimin e publikuar në faqen zyrtare thuhet se “Gjykata Kushtetuese vendosi shfuqizimin e nenit 4 të ligjit nr.143/2015 që ka ndryshuar nenin 9 të ligjit nr.9136, datë 11.09.2013 “Për mbledhjen e kontributeve të detyrueshme të sigurimeve shoqërore dhe shëndetësore në Republikën e Shqipërisë” dhe VKM-së nr.37, datë 21.01.2016 “Për përcaktimin e pagës mujore, për efekt të llogaritjes së kontributeve të detyrueshme të sigurimeve shoqërore dhe të sigurimit shëndetësor për personat e regjistruar si të vetëpunësuar, të cilët kryejnë veprimtari ekonomike profesionale dhe punonjësit e papaguar që punojnë e bashkëjetojnë me të”.

Në ndryshimet e bëra, 23 profesione të lira do të paguajnë kontributet mbi pagën, e cila varion nga 40.500 lekë deri në 88.800 lekë. Për përcaktimin e nivelit të pagës janë marrë parasysh 6 kritere, duke nisur nga lloji i profesionit, zona, vitet e punës, paga për të njëjtin profesion në sektorin publik dhe statuti i profesionit.

Ligji u kundërshtua ashpër nga avokatët, noterët dhe mjekët.

Kreu i Dhomës së Avokatëve, Edmond Konini, shprehet se Qeveria ka marrë kompetenca, të cilat nuk i takojnë. Me anë të këtij vendimi, thekson Konini, trefishohen detyrimet që avokatët do të kenë detyrimin të paguajnë për sigurimet. “Është e pakonceptueshme që shteti të ndërhyjë nëpërmjet pagave në sektorin privat. Ne nuk pajtohemi pasi efektet e këtij vendimi prekin pjesën dërrmuese të avokatëve. Me anë të tij trefishohen detyrimet që duhet të derdhen për kontributet shoqërore. Qeveria me këtë që po bën po na cakton standardin për një pension më të mirë, por nuk është shteti ai që duhet të mendojë për mua, jam unë ai që duhet të mendoj për veten”, tha më tej kryetari i Dhomës së Avokatëve. Sipas tij, një vendim i tillë jo vetëm nuk do të pranohet, por do të ndiqen të gjitha rrugët ligjore për kundërshtimin e këtij akti.

Për presidentin e Urdhrit të Mjekut, Fatmir Brahimaj, kjo do të penalizojë kryesisht mjekët e rinj.

Sipas tij, një i ri nuk mund të ketë të njëjtën klientelë me atë që ka 40 vite që punon. “Pavarësisht kategorizimit që është bërë, ne sërish gjykojmë që është e lartë vlera e vendosur. Duhet të ketë fasha të tjera për të përcaktuar nivelin e pagës maksimale dhe minimale”, tha Brahimaj. Vendimi i Qeverisë rëndon mbi të gjitha mbi mjekët që punojnë në sektorin privat. Në mbështetje të tyre, presidenti i Urdhrit të Mjekut tha se do të kërkohet që Qeveria të ulë kuotën, e cila do të përdoret si referuese për derdhjen e kontributeve shoqërore dhe shëndetësore. “Pjesa dërrmuese e mjekëve që punojnë në privat janë me kohë të pjesshme. Sipas ligjit, këta profesionistë duhet të paguajnë një siguracion të dytë. Vlera që është përcaktuar është e papërballueshme”, theksoi Brahimaj.

Edhe kryetarja e Dhomës së Noterëve, Mimoza Sadushi, është kundër vendimit të Qeverisë. Sipas saj, kategorizimi nuk duhej të ishte bërë në bazë të vendit, por mbi bazën e volumit të punës, duke qenë se tarifat që noterët aplikojnë janë standarde. “Në vendim janë përcaktuar edhe fasha, por aty nuk kemi të bëjmë me vlerësim pasurish. Kemi të bëjmë me një punë noteri, e cila aplikon tarifa standarde në të gjithë vendin. Problemi është që ne kemi kërkuar që të vendoset një standard dhe kategorizim duke pasur parasysh volumin e punës që ka noteri dhe jo vendin ku ndodhet. Këtë kemi kërkuar vazhdimisht, duhej të ishte bërë një studim sipas volumit të punës”, tha Sadushi.

July 14, 2016 16:01
Komento

1 Koment

  1. Plaku Xhuxhumaku July 14, 16:37

    Ne gjithe boten, profesionistet e lire paguajne taksat bazuar ne deklariin e te ardhurave. Per pensionet dhe asikuracionet e tjera jane vete pergjegjes dhe qeveria nuk ka pune fare me keto.

    Reply to this comment
Shiko komentet

Komento

Your e-mail address will not be published.
Required fields are marked*