Rama dhe Renzi bien dakord për njohjen e pensioneve mes Shqipërisë e Italisë

Lajmin më të mirë për mijëra emigrantë shqiptarë në Itali e dhanë sot kryeministri shqiptar Rama dhe ai italian Renzi, kur deklaruan se dy vendet kanë rënë dakord për njohjen e pensioneve të emigrantëve në vendet respektive.

Kjo është një nga marrëveshjet më të rëndësishme që arrihet mes Shqipërisë dhe Italisë, duke qenë se në shtetin fqinj jetojnë mbi 500 mijë emigrantë të cilët do të përfitojnë nga njohja e pensioneve mes dy vendeve.

Të dy kryeministrat e kanë dhënë lajmin e mirë edhe nëpërmjet një video selfie.

“Në vijim të një pune të admirueshme për njohjen e viteve të pensionit e bërë gjatë këtij viti për emigrantët shqiptarë që punojnë dhe paguajnë taksa në shumë vende të botës, sot ramë dakord që projekti i vendosur në tavolinën e përbashkët të të dy ministrave të vijojë me negociatat e të dyja palëve. Kjo i shërben si një numri të madh emigrantësh shqiptarë në Itali, por dhe një numri të konsiderueshëm italianësh në Shqipëri”, theksoi Kryeministri Rama.

Ndërsa kryeministri italian Renzi tha se ministrat e Punës së dy vendeve, Poletti dhe Veliaj, po vijojnë intensivisht negociatat për nënshkrimin e marrëveshjes së pensioneve.

.