Rama në Bugajski Hour: Vëzhguesit kanë qenë spektatorë në një mort

INTERVISTE June 15, 2013 22:19

Rama në Bugajski Hour: Vëzhguesit kanë qenë spektatorë në një mort

Kryetari i Partisë Socialiste, Edi Rama, flet në emisionin “Bugajski Hour” të analistit Janush Bugajski në Albanian Screen

 

Le të hidhemi drejt e tek zgjedhjet, sepse ato, sigurisht, çdokush po mendon për ato. Një pyetje e përgjithshme, a po ecën Shqipëria përpara apo mbrapa në këtë performancë zgjedhore? Me fjalë të tjera, si janë këto zgjedhje krahasuar me ato të mëparshmet?

Do të nxirrja në pah një ndryshim pozitiv. Ka një mori transmetimesh televizive direkte dhe shumë hapësirë që njerëzit të shprehen dhe të dëgjojnë alternativat. Për pjesën tjetër, pra institucionalisht, ne s’jemi as atje ku kemi qenë, por kemi bërë hapa mbrapa. Sepse kemi humbur institucionin qendror të zgjedhjeve, KQZ-në, të cilën partia qeverisëse e ka shndërruar në një organizatë partiake.

 

Më lejoni t’ju pyes specifikisht për KQZ-në, sepse kjo është pyetja që doja t’ju pyesja. A do të jetë KQZ-ja në gjendje të përmbushë mandatin, meqenëse nuk ka shtatë anëtarë? Dhe nëse nuk i ka, a do të minonte kjo legjitimitetin e zgjedhjeve?

Mendoj se standardet s’janë plotësuar akoma, sa i përket pjesës së organizimit. Por le të shpresojmë se KQZ-ja nuk do të luajë rolin që ne e kemi parë të luajë në të kaluarën, sidomos në zgjedhjet për Bashkinë e Tiranës dy vjet më parë, sepse kjo do të ishte katastrofale dhe pasojat janë të paparashikueshme.

 

Kam parë se ka pasur mospajtime në lidhje me numrin e vendeve për zonat zgjedhore. KQZ-ja ia kaloi çështjen Parlamentit, i cili vendosi ta bëjë shpërndarjen e numrit të deputetëve bazuar në censusin e 2009-s dhe jo në atë aktualin. Cili është këndvështrimi juaj mbi këtë?

Është e thjeshtë. Demografia praktikisht ka ndryshuar dhe bazuar në demografinë e re, kishte katër mandate deputetësh për t’u rishpërndarë. Rishpërndarja do t’i kishte dhënë opozitës një avantazh të pranueshëm. Dhe prandaj partia qeverisëse vendosi brutalisht dhe forcërisht të rishpërndarnte mandatet bazuar në demografinë e vitit 2009, gjë e cila është absolutisht në kundërshtim me Kushtetutën dhe ligjin. Por, e tillë është Shqipëria.

 

Pyetja më e madhe që shtrohet në SHBA, në Uashington, është: A do të jenë këto zgjedhje plotësisht legjitime? Jo vetëm mjaftueshëm të lira dhe të drejta, por dhe të pranuara nga popullata shqiptare, nga të gjitha partitë, si dhe ndërkombëtarisht?

Kjo është një pyetje që bëhet nga gjithkush, përveç Kryeministrit. Pra, kjo është diçka që mbetet për t’u parë dhe është një çështje që çdokush do të duhet t’i përgjigjet kur zgjedhjet të jenë kryer. Pra, kuadri është thyer, por le të shpresojmë se vullneti i popullit nuk do të deformohet sërish dhe zgjedhjet nuk do të preken sërish nga manipulimet dhe nga fshirja e vijës ndarëse ndërmjet pushtetit dhe shtetit.

 

Ju thatë manipulime. A ka shenja se ka manipulime? A i druheni ndonjë mashtrimi apo ndonjë gjëje të ngjashme?

Thjesht shpërndarja e mandateve sipas vitit 2009 është një mashtrim më vete. Sulmi brutal mbi KQZ-në që minoi Kushtetutën dhe pavarësinë e këtij Komisioni, dhe transformimi i saj në një organizatë partie, është mashtrim. Ç’është mashtrimi, fundja fundit? Ne nuk kemi përse të presim… shpresojmë që jo… ushtrinë, apo shërbimet sekrete, apo policinë të shkojnë në qendrat e votimit e të rrahë njerëzit, e të mbushë kutitë e votave. E pamë këtë në vitin 1996 në kohën e “Sali Berishës së Parë”. Shpresojmë të mos ndodhë e njëjta gjë në kohën e “Sali Berishës së Dytë”. Por përtej kësaj, them se këto zgjedhje nuk janë ato zgjedhje që një vend anëtar i NATO-s apo një vend kandidat për në BE duhet të ketë.

 

Ju thatë që ka gjasa për dhunë… dhe le të shpresojmë që asgjë e tillë të mos ndodhë. Sidoqoftë, ka pasur…

Jo, unë thashë le të shpresojmë që të mos ndodhë kështu. Por s’janë dhuna dhe manipulimi brutal ato që përkufizojnë manipulimin në vetvete. Ka mënyra e mekanizma të tjera. Kjo është ajo që doja të thosha.

 

Ka pasur një rast të agresionit fizik ndaj një kandidati zgjedhor në jug të Shqipërisë, si dhe disa kërcënime ndaj disa kandidatëve të tjerë. A është kjo diçka që ju e dëshmoni në mbarë vendin?

Ai ishte një rast jashtëzakonisht i shëmtuar në një zonë ku disa vjet më parë një deputet i PS-së u vra. Hetimet s’kanë nxjerrë akoma asnjë të dhënë lidhur me këtë vrasje. Ka fakte mjaft shqetësuese si dhe dëshmitarë në lidhje me banda të mbështetura nga qeveria dhe nga disa ministra. Pra, e shoh rrahjen e një kandidati si pjesë të së tërës.

 

Ju po thoni se është e orkestruar nga qendra, apo bëhet fjalë për “koka të nxehta” apo fanatikë?

S’ka “kokë të nxehtë” që mund të rrahë me paramendim një kandidat për deputet pa pasur lidhje të forta me qendrën.

 

Por, me gjasë, kjo është diçka që komuniteti ndërkombëtar po e monitoron nga afër, përfshirë Misionin e OSBE-së dhe atë të ODIHR-it?

Kështu shpresoj!

 

Cila është pikëpamja juaj mbi Misionin e ODIHR-it dhe atë të OSBE-së?

Kam një këndvështrim të përzier. Dhe kjo sepse unë i kam parë ata të dështojnë në vitin 2009. I kam parë ata të bëjnë një punë të jashtëzakonshme në vitin 2011. Pra, s’e di se si funksionon. S’e di përse. Por kam parë dy përvoja të ndryshme. Shpresoj se kësaj here, do të kemi një përvojë të ngjashme me 2011-n, dhe jo me 2009-n. Kam kujtime mjaft të mira nga kreun e Misionit të ODIHR-it, Jonathan Stonestreet. Njeri tejet mbresëlënës, tejet objektiv, tejet i hapur, tejet i fokusuar, dhe, ç’është më e rëndësishmja, me një respekt të lartë, jo ndaj disa standardeve të caktuara, por ndaj standardeve.

 

Cila është pikëpamja juaj mbi raportin para-zgjedhor të ODIHR-it? Kur i hedh një vështrim, duket një raport mjaft i fortë në termat e problemeve.

Them se kemi të bëjmë me shkollën e 2011-s, e jo me shkollën e 2009-s.

 

Që është gjë e mirë?

Shpresoj që të jetë.

 

A mendoni se ka një numër të mjaftueshëm vëzhguesish në Shqipëri për të mbuluar të gjithë territorin?

Nuk e di. Por nuk besoj në monitorimin e zgjedhjeve në Shqipëri.

 

Nuk besoni?

Jo! E kam thënë dhe më parë! Është opinioni im personal! Nuk besoj në monitorim në termat e nevojës për të parandaluar atë që mund të ndodhë. Sepse ajo çfarë ka ndodhur më parë ka qenë gjithnjë një fakt i kryer. Një fakt i kryer i shoqëruar me një ndjesi të tmerrshme dobësie nga ana e komunitetit ndërkombëtar përballë asaj që ka ndodhur. Pra, monitorët më duken si spektatorë në një mort. Dhe shpresoj se s’do të ndodhë kështu.

Shikoni, ne patëm një raport mjaft të mirë dhe objektiv nga ODIHR-i në vitin 2011. Në një organizim normal të politikës, shtetit dhe qeverisë, ai raport do të kish qenë një udhërrëfyes i përsosur për të mbajtur zgjedhje mjaft të mira kësaj here. Por asgjë s’ka ndryshuar kësaj here. Ne kemi zgjedhje që janë edhe më shqetësuese, për sa folëm më parë: shpërndarja e mandateve dhe një KQZ që nuk funksionon. Pra, çfarë sjellin tek e fundit këto raporte? Problemi është se nëse nuk gërshetohen me një trysni mjaft të qartë e konstruktive nga ana e komunitetit ndërkombëtar që thotë: Dëgjoni, ky është vendi juaj. Ju takon juve të bëni zgjedhje, e jo neve. Por mos harroni se nëse dëshironi të jeni anëtarë të familjes sonë të NATO-s dhe të BE-së, dhe të familjes së botës demokratike, nuk është kjo mënyra se si bëhen zgjedhjet. Pra, ose mjaft me kaq, ose ju do të keni telashe me ne. Kjo është mënyra, pra! Nëse nuk bëhet kështu, unë e kam të pamundur ta ndryshoj. Pra, nuk fajësoj askënd, dhe mendoj se kjo është arsyeja përse këto misione tekembramja s’kanë impaktin e duhur që duhet të kenë.

 

Por mund ta kenë, megjithatë. Në dukje, këto misione janë një frenues i manipulimeve të mëdha. Një deklaratë e tyre e fortë mbas zgjedhjeve do të ketë jehonën e qeverisë së SHBA, të Brukselit dhe të qeverive të Evropës Perëndimore. Prandaj them se ato kanë një impakt mbi qeverinë, nuk jeni dakord?

Shpresoj shumë që të jetë kështu! Çështja është se ajo me çfarë po përballemi në realitet është se tendenca shkon drejt përkeqësimit e jo drejt përmirësimit.

 

Pra, sa i përket pyetjes së parë që ju bëra në lidhje me performancën… zgjedhjet nuk janë mbajtur akoma dhe kështu ne s’kemi akoma një rezultat – do të kemi dhe ankesat mbi zgjedhjet… Deri më tani, si gjykoni, Shqipëria ka bërë hapa mbrapa në këtë fushatë elektorale?

Siç jua thashë, ka një gjë që është pozitive. Ka më tepër transmetime televizive direkte. Ndoshta kjo është tepër, kur bëhet fjalë për vende që janë përtej politikës si një sport kombëtar. Këtu politika është ende sport kombëtar, pra shikohet dhe nga publiku, i cili ka një interes të lartë. Kjo është gjë e mirë. Për pjesën tjetër, nuk shoh ndonjë përmirësim. Them se po përkeqësohet!

 

Ju thatë transmetime televizive. Me sa shoh, mjedisi mediatik është tej mase i polarizuar, dhe favorizon një parti apo interesa specifike. A mendoni se ka mungesë të objektivitetit të mjaftueshëm në transmetimet televizive, përjashto Albanian Screen, sigurisht, në termat e fushatave elektorale dhe zhvillimeve politike?

Mendoj se media këtu vuan shumë prej trysnisë. S’mendoj se ka televizione që janë me njërën palë, dhe televizione të tjera që janë me palën tjetër. Them se ka televizione që janë të favorizuarit e shtetit dhe ka të tjera televizione që orvaten të kenë zërin e tyre dhe që jo domosdoshmërisht përfaqësojnë parti të caktuar, dhe aq më pak partinë tonë. Kjo do t’u shkaktonte atyre dëme sa i përket shikueshmërisë. Por ka dhe më keq. Pra, mendoj se sa i takon mjedisit mediatik, mund të ketë dhe më keq, dhe them se është mirë.

 

Pra, ju e paskeni pranuar siç është?!

Jo tamam! Them se ka hapësira të mëdha për përmirësime për ta pasur më të shkëputur hapësirën mediatike nga interesat politike, por kjo është gjithashtu kulturore dhe kërkon kohë për t’u arritur.

 

Njëra prej çështjeve që ka shqetësuar gjithnjë shqiptarët dhe ju në zgjedhjet e kaluara, ka qenë procesi i numërimit. Me fjalë të tjera, a do të jetë ky proces mjaftueshëm i hapur, transparent, i monitoruar e i pranuar nga të dyja palët?

Mbetet për t’u parë! S’e di! Shpresoj që po! Ne jemi tejet të interesuar që procesi të shkojë sa më mirë dhe duam që gjithçka të ecë në paqe. Nuk i kemi ngritur si çështje të mëdha këto ngjarje të tmerrshme në KQZ, sepse s’donim të përqendronim vëmendjen e publikut mbi çështjet teknike. Ndonëse kjo s’është një çështje thjesht teknike, por tejet e rëndësishme, sepse ne kemi për të fituar. Sondazhet tona na bëjnë të ndjehemi të qetë. Ne e dimë se kush i fiton zgjedhjet. Dhe si fitimtarë të zgjedhjeve, ne jemi më pak të interesuarit për të pasur telashe në numërimin final. Por në krahun tjetër, ashtu siç ne kemi sondazhet tona, edhe pala tjetër ka sondazhet e veta. Dhe ata e dinë si mos më mirë se do të humbasin, por ata nuk dinë të humbasin. Dhe Saliu nuk është aspak nga ata që dinë të humbasin. Gjithçka mund të ndodhë!

 

Ç’doni të thoni me gjithçka?

Gjithçka mund të ndodhë! Kemi parë shumëçka në këtë vend gjatë këtyre njëzet viteve. Uroj që asnjëra prej tyre të mos përsëritet, por e kam të vështirë të shohë Kryeministrin  të pranojë humbjen. Ai ka për të humbur thellë.

 

Ç’mund të bëjë ai nëse është e ligjshme?

Nëse përgjigja e kësaj pyetje do të ishte aq e lehtë, ne sot nuk do të kishim vende në mbarë botën ku përballë gjërave legjitime, diktatorët sillen në mënyrë ilegjitime.

 

Pra, ka për të patur provokime dhe veprime?

Shpresoj që jo, por gjithçka mund të ndodhë!

 

Pra, deri diku, është mirë që komuniteti ndërkombëtar është i pranishëm me misione të mëdha monitorimi, me misione evropiane.

Kjo është absolutisht tejet e rëndësishme dhe është shumë mirë. Dhe unë kam një respekt të madh për atë që Ambasadori Amerikan dhe ai i BE-së po orvaten të bëjnë për të qetësuar sa më tepër atmosferën, për të nxitur njerëzit që të marrin pjesë, për t’u zgjatur dorën njerëzve duke u thënë se zgjedhjet janë tej mase të rëndësishme për Shqipërinë.

 

Pra, ju thoni se kjo ka ndikim tek udhëheqësit politikë dhe publiku në vend?

Po, ka ndikim.

 

Më lejoni t’i kthehemi tani fushatës. Kam disa pyetje. Kemi parë se ka pasur shkëmbime akuzash mes jush dhe Kryeministrit gjatë ditëve dhe javëve të fundit. A mendoni se mos kjo thjesht tëhuajëson votuesit, të cilët mund të bojkotojnë zgjedhjet dhe të cilët mendojnë se asnjëra nga partitë nuk i adreson çështjet e tyre kryesore, që janë standardi i jetesës, vendet e punës, kushtet ekonomike, etj… Këto janë çështjet kyçe për shqiptarët.

Po! Ne kemi një program mjaft të mirë në të maturit e pjesës së kohës që ne i kushtojmë këtyre çështjeve kyçe, dhe kjo kohë është 96 përqind, kurse 4 përqind janë vetëm ndoca fjalë të këndshme për Kryeministrin.

 

Por këto janë ato që përzgjedh media! Këto janë ato që të kap veshi!

Ky s’është problemi im apo i yni! Mendoj se transmetimet direkte janë mjaft të mira pikërisht për këtë gjë, sepse në këto zgjedhje njerëzit janë shumë më tepër të informuar mbi programet se sa më parë. Ata janë shumë më tepër të vetëdijshëm se më parë për atë çfarë është në lojë. Dhe ata janë shumë më tepër të qartë për vijat ndarëse midis dy palëve se sa më parë, sepse ata mund të konsumojnë shumë më tepër transmetime direkte, dhe ata s’janë thjesht të kushtëzuar nga ajo mënyra e ngushtë e të ofruarit të lajmeve të ditës nëpër ekranet e ndryshme mediatike.

 

A mendoni se do të ketë një pjesëmarrje të lartë në zgjedhje si pasojë e kësaj?

Them se po! Them se po!

 

Më lejoni t’u kthehemi çështjeve të programeve. Si do ta përkufizonit ju programin tuaj? Dhe ku dallon ai nga programi i qeverisë aktuale?

Dallon , le të themi, 90 përqind. Nuk dallon në atë që nuk duhet të dallojë. Pra, në bazamentet e politikës sonë të jashtme e në qëndrimin karshi rajonit. Megjithatë edhe këtu ne kemi një program krejt të ndryshëm, sepse ata nuk kanë një të tillë se si ne duhet të punojmë tok së bashku me vendet e rajonit për ta transformuar këtë situatë të re gjeo-politike mbas marrëveshjes Kosovë-Serbi në një shans për të ecur përpara në ekonomi. Këndvështrimi im është se marrëveshja Kosovë-Serbi shënoi fundin e historisë së Jugosllavisë dhe është çelja e një historie të re. Pra, ne nuk duhet të mendojmë më thjesht për të shkuarën, por duhet të mendojmë se si të ndërtojmë të ardhmen tonë. Dhe ka shumë gjëra që ne i bëjmë bashkarisht, duke filluar me Kosovën. Ne kemi nevojë, dhe ne do të bëjmë hapa para me një plan strategjik mbi energjinë dhe sigurinë, i cili mund të zgjerohet mandej me vendet e tjera. Unifikimi i sistemit arsimor. Unifikimi i ofertës turistike, ashtu që ne mund të zgjerojmë ofertat tona turistikë në më tepër se sa një sezon, për shkak të potencialeve që Kosova ka në këtë drejtim. Objektiva të përbashkëta në strategjinë e zhvillimit rural dhe bujqësor. Një gjë është e sigurt, ne mund të bëjmë shumë më tepër lidhur me tregtinë dhe asgjë nuk na pengon që të heqim doganat. Dhe mandej të orvatemi t’i përqasemi BE-së si rajon nëpërmjet projekteve me peshë rajonale, jo vetëm në energji, por edhe në infrastrukturë, hekurudha e kështu me radhë. Pra, ne do të përpiqemi të sendërtojmë një marrëdhënie të re me Brukselin si rajon, duke mos qenë thjesht ata që kanë nevojë të jenë të qetë, por dhe duke trokitur në portë duke sjellë propozime, duke paraqitur ide interesante dhe duke parashtruar në tryezë projekte tërheqëse për rajonin. Dhe kjo është e mundur! Dhe ne duam të propozojmë marrëveshje rajonale mbi mbrojtjen e pakicave për të tejkaluar këtë mbivendosje të hartës të bazuar në kufij dhe hartës së bazuar në pakicat e ndryshme, të cilat janë dy harta të ndryshme. Dhe kështu t’i kuptojmë e t’i shfrytëzojmë pakicat si ura, e jo si plagë dhe gropa të së shkuarës. Aktualisht ndoshta duket tej mase romantike apo idealiste, por them se ky është një idealizëm mjaft realist për të kuptuar dhe për të punuar dhe për të përfituar nga fakti se shqiptarët në Preshevë, serbët në veri të Kosovës, grekët në Shqipërinë jugore, e të tjerët gjetkë – për të mos dhënë gjithë hartën – janë ura të rëndësishme dhe janë asete të rëndësishme për një rajon të ndryshëm në të ardhmen.

 

Pra, kjo nënkupton se do t’ju duhet të punoni ngushtë me qeveritë fqinje të këtyre vendeve?

Patjetër!

 

A mendoni se keni marrëdhënie më të mira me këto qeveri në fjalë se sa administrata aktuale shqiptare?

Nuk është çështje e të paturit të një marrëdhënieje më të mirë, por e të paturit të një marrëdhënieje më të frytshme, sepse s’mendoj se në termat e politikës së jashtme s’ka gabime të bëra nga Kryeministri gjatë kremtimeve të 100 vjetorit të Pavarësisë, të cilat kanë krijuar njëfarë pakënaqësie me grekët. Por këto janë gabime, s’janë politika. Pra problemi është si t’i bëjmë të frytshme këto marrëdhënie dhe si t’i japim jetesës së përbashkët në këtë rajon një sens të zhvillimit ekonomik. Jo thjesht politikë dhe vetëm politikë, por ekonomi dhe mandej ekonomi, e sërish ekonomi.

 

 

I kthehemi tani ekonomisë dhe asaj që shqetëson shumicën e shqiptarëve me të cilët flas: standardi i jetesës, vendet e punës dhe ekonomia. Programi juaj është tejet ambicioz. Po mendoj sa realist mund të jetë! Programi i Rilindjes, më korrigjoni nëse jam gabim, flet për krijimin e 250.000 vende pune…

Jo, këtë e thotë qeveria. Programi ynë thotë 300.000.

 

-300.000?!

Është edhe më ambicioz. Ne konsiderojmë se 150.000 vende pune janë të mundura në sferën e zhvillimit rural. Pjesa tjetër është e mundur nëse ne ndryshojmë politikat, duke ia filluar nga kjo ndihmë pasive ekonomike dhe duke e shndërruar në një program të ndihmës sociale. Mandej duke vazhduar me nevojat absolute për të përfshirë detin në ekonominë tonë. Ne jemi i vetmi vend mesdhetar që nuk ka asnjë të ardhur nga deti…

 

E keni fjalën nga peshkimi?

Nga asgjë! Deti është krejtësisht jashtë ekonomisë sonë. Është jashtë ekonomisë së Mesdheut, sepse të gjitha itineraret detare të anijeve, ato turistike e ato tregtare, thjesht kalojnë në vijën detare të Shqipërisë. Pra, me investime në industrinë e peshkimit, me investime në portet turistike, me investime në këto itinerare, ne mund të krijojmë vende të reja pune. Mund të krijojmë më tepër vende duke investuar në një lloj tjetër të zhvillimit turistik. Këto janë të gjitha plane specifike. Dhe ne kemi absolutisht nevojë të ndryshojmë strukturën e ekonomisë sonë dhe të kemi prodhimin si linjë kryesore. Pra, të përpiqemi të kanalizojmë investimet e huaja direkte dhe investimet e brendshme tek prodhimi, pra gjithçka që mund të krijojë vende pune nëpërmjet prodhimit. Sepse ne kemi një ekonomi që praktikisht i ka shteruar mjetet e veta. Është e bazuar në ndërtim, i cili ka rënë në mënyrë dramatike. Është e bazuar në dërgesat e parave, që po ashtu kanë rënë në mënyrë dramatike. E bazuar në tregti, dhe kjo është e vetmja gjë që në po qëndron disi në këmbë. Pra ne duhet t’i drejtohemi zhvillimit rural, investimeve në prodhim dhe po ashtu edhe turizmit dhe shërbimeve, si palcë e ekonomisë.

 

Me sa kuptoj, qeveria juaj do të jetë më miqësore ndaj biznesit. Me fjalë të tjera, ju do të nxisni sipërmarrësit këtu të investojnë, të hapin vende pune…

Kjo është një domosdoshmëri! Ne kemi një situatë ku e gjithë pasuria ekonomike është e përqendruar në pak duar dhe s’ka konkurrencë të lirë. S’ka ndonjë vlerësim të bazuar në kritere objektive. S’ka hapësirë për zhvillimin normal të çfarëdolloj investimi, apo biznesi. Të duhet të kesh medoemos lidhje të forta. Dhe të duhet të paguash një shumë të madhe, nëse dëshiron të mbijetosh në këtë farë mjedisi. Nuk e themi ne këtë, por e thonë të gjitha organizatat e tregtisë, biznesmenët shqiptarë e të huaj, të cilët e theksojnë këtë frustrim.

 

Pra, çfarë janë këto pengesa? A është korrupsioni?

Është kapja e shtetit! Është një përbindësh më i madh se sa burokracia apo korrupsioni!

 

Ç’nënkuptoni me “kapje të shtetit”, për ta shpjeguar?

Me kapje të shtetit nënkuptoj një model që s’është i prodhuar në Shqipëri. Është i artikuluar si mos më mirë në ish-republikat sovjetike, me një lloj sulltani në krye dhe haremin e biznesit përreth.

 

Pra, një lloj shteti i kontrolluar nga oligarkia?

Një përzierje, më saktë!

 

Pra, ju thoni se kësodore Shqipëria po lëviz drejt modelit rus?

Nuk do të thoja rus, por do të thoja diçka më shqetësuese, në termat e çmontimit të shtetit fund e krye, dhe e të shndërruarit të të gjitha strukturave shtetërore në struktura të një kompanie biznesi, e cila bart emrin “Qeveria e Republikës së Shqipërisë”, por që në të vërtetë po punon vetëm për përfitime. Dhe shteti, ç’është e vërteta, s’po ia del më mbanë të përmbajë krimin në norma të arsyeshme. S’po ia del më mbanë të kryejë shumë prej detyrave elementare, siç është furnizimi me ujë, furnizimi me energji, apo shërbimet normale për qytetarët. S’po ia del aspak mbanë në çuarjen përpara të ekonomisë. Njerëzit…

 

Pra, ju po thoni se ka një lloj dështimi të shtetit?

Njerëzit vërtet po shtrydhen nën këtë trysni të shtetit të dështuar.

 

Besoj se ju e përshkruani qeverinë aktuale, me lejoni t’ju citoj, “një diktaturë e korrupsionit”. A është kjo qeveri në një gjendje më të keqe se pararendëset e saj?

Është më keq. Absolutisht më keq. Ajo erdhi në jetë me premtimin për të vendosur duart e pastra në dispozicion të njerëzve, dhe po gjallon me të dhënat më të këqija sa i përket korrupsionit dhe me të dhënat më të këqija sa i përket organizimit të shtetit. Sepse korrupsioni në këndvështrimin tim është i lidhur me mungesën e modernizimit dhe organizimit të shtetit. Korrupsioni është alternativa për një shërbim që nuk ofrohet. Pra për të luftuar korrupsionin, ti duhet të modernizosh shtetin. Dhe sa më tepër institucione dhe sa më tepër shtet të kesh sa i përket modernizimit, apo kontrollit dhe balancimit, sa i përket mekanizmave, aq më pak korrupsion ka. Sa më pak të kesh prej tyre, aq më tepër të duhet të mbarosh punët nëpërmjet të paguarit për gjithçka.

 

Këtë gjë e kam dëgjuar në të gjithë Evropën lindore. Është e lehtë të ankohesh për korrupsionin, por, gjegjësisht, ç’do të bëni ju nëse ngjiteni në detyrë? A do të pushoni nga puna një pjesë të gjykatësve, a do të arrestoni politikanë?

Nuk ia fillohet nga gjykatësit, ia fillohet nga qeverisja me drejtësi. Unë besoj fuqimisht se s’mund të kërkosh drejtësinë në dyert e sistemit të drejtësisë në një vend që qeveriset me padrejtësi. Dhe s’e kam fjalën tek politikat e padrejta. S’e kam fjalën tek e majta dhe e djathta. Por e kam fjalën tek drejtësia si e tillë. Pra, te hartimi i deritanishëm i ligjeve që thjesht përdhunojnë vendin, që thjesht i transformojnë një grup njerëzish në njerëzit më të pasur dhe lënë të gjithë të tjerët përtokë. Ja, pra, ku e kam fjalën.

 

Duke iu kthyer paksa programit tuaj ekonomik. Siç e dini, Evropa po kalon një recesion. Gjendja financiare dhe produktiviteti ekonomik s’janë aty ku duhet. Dhe Shqipëria është e varur nga tregu i Bashkimit Evropian e nga investimet nga BE-ja. A mendoni se është paksa jorealiste t’u thuhet votuesve se do të krijohen shumë vende pune kur ju nuk e dini se sa investime do të ketë.

Ne s’po flasim për… Unë nuk do të guxoja të krahasoja problemet e Shqipërisë me problemet evropiane. Ne kemi ende një dobësi e cila ka të bëjë me fuqinë tonë. Ne s’jemi ende aq të ndërlidhur. Ne jemi ende në një fazë dhe në një pozitë që ne mund t’ia arrijmë të kapërcejmë krizën, e cila është kriza e një modeli dhe kriza e qeverisjes, një krizë e një shteti që mungon. Pra, unë besoj fuqimisht se ne mund të bëjmë shumëçka me pak gjëra. Deri më tani problemi s’ka qenë te mungesa e parave, por tek qeverisja e munguar. Pra, qeverisje e mirë me reforma të vërteta, me një vullnet të mirë për të sendërtuar mekanizma dhe për të sjellë modernizim. Ne s’po flasim për gjëra të mëdha. Ne po flasim për ulje taksash për 90 përqind të njerëzve. Kalim nga një taksë e sheshtë në një taksë të drejtë, gjë që do të thotë se çdokush që ka një pagë prej 300.000 lekë të vjetra e deri në 1.5 milionë do të përfitojë prej saj – 40 mijë lekë të vjetra në muaj – mesatarja e një page në vit nuk është ndonjë gjë e madhe, është gjë normale, e mundshme dhe e bëshme. Dhe kjo i lehtëson për një copë herë njerëzit. Ne po flasim për heqjen e taksës së biznesit të vogël në formën që është tani, dhe thjesht të ulim 20 përqind taksën e të ardhurave për biznesin e vogël. Dhe kur themi biznes i vogël, nuk është aspak koncepti që keni ju në SHBA. Ne këtu po flasim për njerëzit e vetëpunësuar që thjesht mbijetojnë me dyqanin e tyre të vogël dhe janë 400.000 njerëz që kanë përfitim direkt prej kësaj. Kam parasysh njerëzit që punojnë, fëmijët e tyre apo të moshuarit në familjet e tyre. Pra, kjo nuk është ndonjë gjë e madhe, dhe është bëhet lehtësisht. Po flasim për uljen e kostove në prodhimin bujqësor. Po flasim për gjëra që s’janë çështje parash, siç është legalizimi i ndërtesave të paligjshme. Dhe ato janë kapital, një kapital i vdekur deri më tani, me miliarda në mbarë vendin. Dhe njerëzit me të vërtetë vuajnë  nga uria.

 

Pra, do t’u jepni të drejta pronësore.

Po, t’u japim atyre të drejta pronësore dhe t’i përfshijmë ata në ciklin ekonomik, e t’u japim një mundësi që t’i përdorin shtëpitë si kolateral për biznes, për të blerë dele e lopë, e për të zhvilluar ferma të vogla. Ne po flasim që fermerëve t’u jepet titulli i pronësisë për tokën. Po flasim që të pastrojmë vendin nga plehrat. Është e pabesueshme dhe totalisht e tmerrshme se sa i ndotur është ky vend. Si dhe të ndalim importin e plehrave. Ne po flasim për ujin. Shikoni, ne jemi vendi i dytë me i pasur me ujë në Evropë. Dikush më tha se ne jemi mbas Norvegjisë dhe Finlandës. Por ne jemi të dytët, pavarësisht Finlandës e Norvegjisë.

 

Pra, energji hidrike.

Pra, ne kemi ujë ngado, dhe njerëzit s’mund të pinë ujë 24 orë në ditë, njerëzit s’kanë ujë në shtëpi dhe njerëzit s’mund të vadisin tokat e tyre. E pra, ç’është kjo? Kjo s’ka të bëjë aspak me rishpikjen e Eurozonës. Kjo ka të bëjë me gjëra elementare që janë të gjitha të lidhura me një gjë fare të thjeshtë: Na mungon shteti. Ne po flasim për ulje të kriminalitetit. Tani është katër herë më i lartë sa i përket plagosjes dhe vrasjes së njerëzve me armë zjarri se sa kur Berisha erdhi në pushtet. Ka tri herë më tepër grabitje me dhunë të njerëzve dhe të pronës se sa kur Berisha erdhi në pushtet. Ka të bëjë me ndërtimin e një policie normale dhe të hairit. Dhe ne po flasim për një kujdes shëndetësor. Vendi ynë po vuan si dreqi nga papunësia. A mund t’u themi dot njerëzve “Nëse s’keni para, ju lutemi mos u sëmurni, sepse nëse jeni sëmurë ju duhet të keni para, përndryshe mjeku s’të prek me dorë”? Dhe kujtdo që është paksa skeptik, siç jeni ju, unë i them shikoni Kosovën. Shikoni Kosovën! Është një shtet pesë vjeçar! Ata janë shqiptarë, nuk janë as gjermanë, as francezë, as britanikë. Janë shqiptarë si ne, me të mirat e me të… Shkoni në Prishtinë dhe korruptoni një polic, dhe shikojeni çfarë ndodh. Do ta pranojë ai ryshfetin apo do të dërgojë në komisariat? Në këtë vend përdoren 300 milionë dollarë për kujdesin shëndetësor, kurse në Kosovë 70 milionë. Thjesht shkoni dhe shikoni dallimin! Është krejtësisht ndryshe! Po shihja ndeshjen e ekipit kombëtar kundër Norvegjisë në një hapësirë publike, dhe ndodhi që afër kisha një shqiptar nga Presheva. Ishim në Berat dhe ai më tha: Kam ngelur i tronditur. Më ftoi këtu një mik, tha, thjesht për të hedhur një sy dhe vajta nëpër fshatra, dhe kam ngelur i tronditur sepse nuk arrija të imagjinoja që në këtë shekull do të shihja njerëz të punonin tokën me duar, me një instrument primitiv si kosa, pa traktorë.

 

Pra, me kosë!

Po. Dhe këtë e thoshte një njeri nga Presheva e jo nga Gjermani, edhe pse Kryeministri thotë se ne jemi të dytët pas Gjermanisë sa i përket fuqisë ekonomike.

 

Po flisni për një riorganizim elementar këtu me një rol të përgjegjshëm të shtetit…

Tepër themelor.

 

…për t’ju bërë më tërheqës për investimet e huaja.

Tepër elementar dhe nga këndvështrimi im, do thoja i mundur. Unë e kam një përvojë. U emërova kryebashkiak i Tiranës në një kohë kur Tirana ishte një çështje e humbur. Askush nuk e besonte që Tirana do e merrte veten. E mori veten. Nuk ka të bëjë me gjërat e mëdha. Puna që bëmë me Tiranën nuk bazohej në shuma të mëdha parash, por në ide të mira, vullnet të mirë dhe në mbështetjen e njerëzve.

 

Po krizën financiare me të cilën duket se po përballet Shqipëria? Nga të dhënat dhe raportet e FMN-së kam parë që mund të ketë vështirësi ekonomike bazuar në problemet financiare?

Eshtë e vërtetë. Eshtë e vërtetë dhe vjen si rrjedhojë e një qeverisjeje katastrofike dhe politikave katastrofike financiare dhe ne duhet padyshim të përqasemi me shifrat e FMN-së dhe së pari duhet të bëjmë një ekzaminim të situatës, sepse ne nuk dimë gjithçka. Të dhënat dhe parashikimet këtu manipulohen. Por unë kam një shpresë tepër të madhe që ky vend jo vetëm që meriton më mirë, por mund të arrijë gjëra më të mira.

 

Doja t’ju pyesja pak për programet elektorale. Më duket sikur ka, më korrigjoni nëse gabohem, një mospërputhje mes programit të Partisë Socialiste dhe atij të aleates suaj kryesore në Koalicion, Lëvizjes Socialiste për Integrim në disa çështje. Për shembull, në çështjen e taksave. Taksa progresive kundrejt taksës së sheshtë.

Jo, nuk ka mospërputhje. Së pari, tani ndodhemi në një fushatë elektorale. Ata kanë programin e tyre, kanë fushatën e tyre, kanë ambiciet e tyre për të fituar sa më shumë mbështetje dhe kjo është diçka krejt e ligjshme. Ne jemi një forcë e madhe, por dy parti të ndryshme. Për mua nuk është aspak problematike dhe ajo çka është më e rëndësishme, kemi të njëjtin thelb parimesh dhe vlerash si dy parti të qendrës së majtë, ndaj këto janë hollësi që nuk do paraqesin kurrfarë problemi pas fitores. Fitorja do i bëjë të qarta gjërat për ne dhe me fitore, ne do qeverisim shumë mirë.

 

Atëherë, do pajtoheni për disa nga këto dallime?

Nuk janë dallime të mëdha. Janë thjesht hollësi.

 

Si e shikoni Partinë Socialiste, parti ideologjike apo më pragmatike?

Jo, Partinë Socialiste e shikoj si të bazuar në trashëgiminë më të mirë të Laburistëve të Rinj.

 

Me Laburistë të Rinj e keni fjalën për…

Politikat e ndjekura nga Toni Bler.

 

Mund të na e shpjegoni pak ndryshimin mes “Laburistëve të Vjetër” dhe “Laburistëve të Rinj”?

Do thoja se politikat e “Laburistëve të Rinj” kanë të bëjnë me kryerjen e gjërave pa i vënë një pengesë ideologjike diçkaje që funksionon. Nëse funksionon, është politikë e “Laburistëve të Rinj”, në aspektin që duhet t’i bëjmë gjërat të funksionojnë, që s’duhet të themi se diçka e tillë mund të funksionojë, por nuk është tepër majtiste. Kjo s’funksionon, por është politikë majtiste. Le ta bëjmë, atëherë. Jo. Nuk duhet të veprohet kështu. Mendoj se është e qartë.

 

Atëherë, mund të hartoni disa politika që në disa vende mund të konsiderohen të djathta, ose të qendrës së djathtë?

Jo, besoj se çka e ndan sot të majtën nga e djathta nuk është më ideologjia, por idealet dhe idetë. Nuk është më korniza ideologjike jashtë së cilës s’mund të veprojë njeri.

 

Nuk është më e majtë apo e djathtë, por janë politikat më të mira që ndiqen?

Ka të bëjë me funksionimin e gjërave, ka të bëjë me vlerat, sigurisht. Për shembull, është pikëpamje e djathtë të thuash “Nëse nuk ke para, mos u sëmur”. Pikëpamja e majtë është të thuash, “Nëse sëmuresh, shoqëria nuk duhet të të lërë pa shërbim mjekësor”. Pikëpamja e djathtë është të thuash, “Nëse nuk ke para, na vjen keq, por fëmijët e tu s’mund të vazhdojnë shkollën”. Kurse pikëpamja e majtë është të thuash, “Nëse fëmija yt ka talent, do kujdesemi ne për të”, për sa i përket universitetit.

 

Disa mund të thonë që pikëpamja e djathtë është të thuash “Lejojeni biznesin të lulëzojë, të funksionojë, se kështu ndihmon ekonominë” dhe disa pikëpamje të vjetra të majta në veçanti, do thoshin, “Jo, duhet ta taksojmë biznesin, të vendosim rregulla”.

Jam plotësisht dakord dhe politika e “Laburistëve të Rinj” ka të bëjë me krijimin e ambientit më të mirë për biznesin, por në të njëjtën kohë, të mos lejojë tregun të vendosë fatin e njerëzve.

 

Dua të kalojmë në disa çështje ndërkombëtare. Më në fund, Parlamenti i votoi tre ligjet që ishin të nevojshme për Shqipërinë që të ecte para përsa i përket statusit të vendit kandidat, por nuk do flas për sfondin e çështjes, se është folur gjatë për këtë. Do ju bëj një pyetje të drejtpërdrejtë. Nëse zgjidheni, cila do jetë faza e radhës në procesin e integrimit në BE? Çfarë axhende do mbështesni ju?

Kam vizionin dhe idenë time për këtë çështje. Nuk mendoj se procesi i integrimit është proces DHL-je, duke i shkruar dokumentet këtu, duke i emërtuar ligje, t’i dërgosh në Bruksel dhe pastaj të presësh të bëhesh pjesë e Evropës. Eshtë ta bësh Evropën këtu një realitet. Ta ndërtosh Evropën këtu në aspektin e mënyrës së organizimit të shtetit, e organizimit të marrëdhënieve me shoqërinë, e organizimit të marrëdhënieve me median, si do e zgjidhim çështjen e titujve të pronësisë dhe si t’i respektojmë ata, si ndërtojmë dhe respektojmë rrugën e konkurrencës së lirë dhe bazën e meritës në administratën publike, në mjedisin e biznesit, etj. Si do organizojmë gjithçka. Kjo është Evropa. Nuk ka të bëjë me atë që miraton më shumë ligje, se nëse shkojmë në bibliotekën e Parlamentit, jo vetëm që kemi hyrë në BE, por ndoshta jemi nga shtetet më progresive në BE, se kemi miratuar ligje që të tjerët s’kanë arritur ende t’i miratojnë.

 

Dyshoni apo mendon se kjo BE…..E kam fjalën nga ana revolucionare.

Po.

 

Në aspektin e këtij kushtëzimit të BE-së, miratoni këtë ligj, miratoni atë ligj, a është kjo një mënyrë për ta mbajtur Shqipërinë larg?

Jo, nuk e besoj. Nuk e besoj. Por siç do e kishte thënë edhe Shumani, duhet t’i japim shpirt procesit të integrimit në BE. Deri më tani është një proces pa shpirt.

 

Por ende besoni, pavarësisht problemeve brenda BE-së, që BE-ja është destinacioni i Shqipërisë?

Nuk ka destinacion tjetër.

 

S’e kam fjalën për vetë destinacionin, por për faktin që duhet të arrini tek ai destinacion.

S’është çështja të arrijmë ne atje, por ta sjellim Evropën këtu. Eshtë çështje e ndërtimit të Evropës këtu, e të bërit të Shqipërisë evropiane, të kemi një shtet evropian, të kemi një mënyrë evropiane për t’u marrë me njëri-tjetrin.

 

Pjesa tjetër e ekuacionit ndërkombëtar janë Shtetet e Bashkuara të Amerikës, marrëdhëniet e Shqipërisë me SHBA-në, që kanë qenë përherë shumë të mira, vetëm se ka pasur disa mosmarrëveshje kohët e fundit mes kësaj qeverie dhe Uashingtonit. Disa çështje specifike. Ju përmendët njërën, ngritja e çështjes së pan-shqiptarizmit, etj. Ku do ndryshojë administrata juaj nga kjo e tanishmja në aspektin e marrëdhënieve me Uashingtonin?

E kam thënë më parë dhe jam i bindur se asnjë kryeministër, asnjë qeveri në Shqipëri s’do tërhiqej nga angazhimet e Shqipërisë përkrah SHBA-së, kur bëhet fjalë të qëndrosh krah SHBA-së në çdo fushë ku nevojitemi. Nuk ka dallime partiake në këtë çështje. Ndryshimi ynë është se sa prej vlerave dhe parimeve të SHBA-së do ndjekim kur të qeverisim Shqipërinë. Dhe fatkeqësisht, gatishmëria për të mbështetur çdo mision, çdo operacion, çdo betejë të SHBA-së si vendi udhëheqës në botën demokratike për një botë më të mirë, nuk është përdorur asnjë herë të vetme nga ky kryeministër si largpamësi me probabilitet të ulët për t’i vënë njerëzit këtu nën kushte aspak të mira për sa u përket kushteve demokratike. Kjo s’duhet të ndodhë. Nuk duhet të ndodhë kështu. Eshtë diçka e keqe se nëse çdo politikan dhe çdo qeveri do ishte përherë, siç do jemi ne, krah SHBA-së, ndodh se janë shqiptarët krah Amerikës. SHBA-ja ka qenë dhe mbetet një figurë udhëheqëse në imagjinatën e popullit shqiptar për botën dhe jetën demokratike. Kjo figurë udhëheqëse është padyshim figura qendrore në politikën tonë të jashtme, por në anën tjetër kemi edhe sfidat e të qenit pro-amerikan, kur kemi të bëjmë me njerëzit tanë, të jesh pro çdo parimi dhe vlere që e ka bërë Amerikën Shtetet e Bashkuara të Amerikës.

 

Një nga çështjet që është ngritur gjatë muajve të fundit është roli i disa grupeve amerikane të lobimit. Di që opozita është ankuar për disa grupe lobimi që janë punësuar nga qeveria e tanishme. Cila është pikëpamja juaj për këtë çështje? A keni edhe ju një grup lobimi në Uashington?

Për mendimin tim është e tmerrshme. Doni ta dini arsyen? Jo për faktin që qeveria ka punësuar një firmë lobuese, një firmë lobuese tepër të madhe, të rëndësishme dhe me ndikim, por se kjo firmë lobimi po paguhet me paratë e çdo taksapaguesi shqiptar, me paratë e të gjithëve, e të gjithë personave që paguajnë taksa këtu dhe ajo që e bën krejtësisht të papranueshme, imorale, të padrejtë dhe të përçmueshme është se paguhen nga të gjithë shqiptarët dhe punojnë kundër opozitës shqiptare. Bëjnë të pamundurën për ta përshkruar opozitën shqiptare si një rrezik, si një problem, si një rrezik për vendin. Të mos flasim për të tjerat, për të mbuluar gjithçka që bën qeveria, nuk e kam problem atë, por nuk mund të pranoj që punojnë kundër opozitës shqiptare, me pak fjalë, kundër interesave të këtij vendi, se nëse ky vend ka arritur diçka, që bën ndryshimin me të shkuarën, është e drejta të ketë opozitë. Dhe duke bërë diçka të tillë, mendoj se po i bëjnë shumë dëme këtij vendi.

 

Si arrijnë ta bëjnë diçka të tillë? Nëpërmjet medias? Nëpërmjet deklaratave publike? Nëpërmjet deklaratave të politikave?

Mendoj se janë tepër të zotët në realizimin e diçkaje të tillë, shumë herë më mirë se unë në organizimin e diçkaje të tillë, ndaj mos më pyesni mua. Mund t’ju them vetëm që janë efikasë.

 

Po ju, Partia Socialiste, a keni punësuar një kompani lobimi?

Jo, kemi përdorur… kemi bërë operacione krejt të vogla vetëm për të na ndihmuar, por vetëm për zgjedhje të drejta e të ndershme. Asgjë më shumë se kaq.

 

Nëse vini në pushtet, s’do tentoni të punësoni një grup lobimi?

Mendoj se mjafton të qeverisësh mirë, të kesh marrëdhënie të mira me SHBA-në, si qeveri, por s’do pranoja kurrë, që unë si person, madje as vlerat e mia etike s’më lejojnë të harxhoja paratë e qeverisë kundër opozitës së këtij vendi. Betimi më i rëndësishëm imi është se pas 23 qershorit s’do ketë më asnjë person që paguhet nga qeveria shqiptare që të sulmohet nëse merr pjesë në aktivitetet e opozitës dhe s’do ketë më auditore universitetesh të mbyllura për përfaqësuesit e opozitës, s’do ketë më mësues që pushohen nga puna se marrin pjesë në takimin e liderit të opozitës me disa mësues. S’do ketë më njerëz që detyrohen të vijnë në mitingjet e qeverisë. S’do mbyllen më shkolla se po kalon kryeministri dhe duhet të brohorasim për të. Këto do marrin fund të gjitha. Kjo do bëjë ndryshimin e madh, se është turp, është e padurueshme, është e papranueshme që në një vend që ka vuajtur gjysmë shekulli nga një regjim frike, frika është kthyer sërish në shpirtrat e njerëzve, frika është pjesëmarrës në zgjedhje. Frika duhet të zhduket një herë e përgjithmonë nga ky vend kur bëhet fjalë për pikëpamjet e njerëzve.

 

Këto fjalë më çojnë në pyetjen time të fundit. Kisha një pyetje të përgjithshme për polarizimin negativ në shoqërinë shqiptare. Ç’do bënte qeveria juaj për t’i bashkuar shqiptarët në interesin kombëtar? Disa prej hapave i përmendët. Mund ta përmblidhni në disa fjali?

Ne do ta trajtojmë opozitën ashtu siç nuk është trajtuar opozita në këtë vend për 20-22 vite. Do i krijojmë hapësira opozitës t’i shërbejë vendit. Nuk do u themi njerëzve që i vetmi problem i shoqërisë është opozita.

 

Kështu do i bashkoni të dyja palët?

Sigurisht që këto çështje duhet të artikulohen, por do e ndryshojmë rrënjësisht qasjen ndaj opozitës. S’e kam fjalën vetëm për opozitën politike, por për median, njerëzit, shoqërinë civile, këdo.

 

Ndoshta median do e bëni më pak partiake.

Eshtë një tjetër zotim tepër solemn, që më në fund, shqiptarët do kenë një televizion publik. Ju mund ta gjykoni diçka të tillë dhe unë ju autorizoj që pas një viti, nëse jeni ende drejtues i këtij emisioni dhe unë i ftuar, si sot, të flasim për gjykimin tuaj mbi televizionin publik shqiptar, pas një viti.

 

Do ishte kënaqësi.

Edi Rama, kryetari i Partisë Socialiste, faleminderit që ishit i pranishëm në emision. Ju uroj zgjedhje të qeta dhe legjitime, kushdoqoftë fituesi.

INTERVISTE June 15, 2013 22:19
Komento

22 Komente

  1. XANI June 15, 22:24

    shqiptaret duhet te investohen vet per veten e tyre dhe jo te presin qe te huajt te bejne magjira! shqiptaret duhet te ndergjegjesohen qe e ardhmja i takon vetem atyre dhe askujt tjeter! duhet te bashkohen me NJE VOTE PLEBISHITARE KUNDER SALIUT! COHUNI, VOTONI, MERRNI CDO NJERI QE NJIHNI TE VOTOJE BASHKE ME JU! ESHTE E JONA SHQIPERIA!

    Reply to this comment
    • gjyshja June 16, 08:29

      Populli duhet te marre pjese masivisht ne zgjedhje.Ti japim goditjen finale Saliut qe po e çon kete vend drejt humneres.Nuk mund te vazhdohet me keshtu,te gjithe te votojme kunder Saliut,te flakim tej kete regjim mbytes te tijin.

      Reply to this comment
    • gertjan June 16, 08:32

      Duhet ti japim fund njehre e mire qeverisjes se Saliut u lodh ky popull se keqqeverisuri per 8 vjet.Vendi po kalon nje situate kolapsi po azhduam keshtu riskojme falimentin si shtet,ndaj me 23 qershor kemi te vetmen mundesi per te hedhur pas kraheve kete qeveri e cila e ka humbur me kohe misionin e saj.

      Reply to this comment
    • hazbiu June 16, 08:41

      shqipetaret jane ngopur sa po pelcasin nga genjeshtrat e saliu dhe pas 7 ditesh eshte koha ti japim nje shuplake fytyres e ta shpiejm jashte nga politika nje here e mire
      vendi ka kaluar ne nje gjendje rrenimi te tmerrshme
      DUAM RILINDJE! DUAM EDI RAMEN!

      Reply to this comment
    • sh.taras June 16, 08:51

      Ky popull ka nevoje te mire-qeveriset,ky popull duhet te dale nga kjo prapambetje nga ky batak qe e ka futur Saliu.E vetmja rruge per popullin per te dale nga bataku eshte Rilindja,udheheqesi i se ciles z.Rama,me argumente bindës,zotohet se do e nxjerre kete vend nga kjo situate e nderë.

      Reply to this comment
  2. Hermes June 15, 22:39

    Po te bashkohemi te gjthe te socialiste dhe demokrate te zhgenyer nga berisha te cilet ne fakt po rriten ne numer cdo dite duke ju bashkuar Rilindjes,24 qershori do te jete nje fillim i ri dhe ndryshe per shqiperine.
    Votoni nr 29.ky eshte numer is shperses

    Reply to this comment
    • buffon June 16, 08:36

      Pa shporrur tej Saliun ta harrojme se mund te zhvillohemi e mund te progresojme. Popull duhet te largojme urgjentisht Saliun,e vetmja shprese e jona eshte z.Rama e programi Rilindje.

      Reply to this comment
    • fino alla fine June 16, 08:40

      Zgjedhjet riskohen te vidhen serish nga Saliu.Marrja e KQZ nga ai deshmon qarte per nje skenar te parapregatitur per rimanipulimin e zgjedhjeve.Te gjithe ne votime diten e zgjedhjeve me qellim qe humbja e Saliut te jete sa me e thelle e qe ai te mos kete mundesi vjedhjeje.

      Reply to this comment
  3. analfabeti June 15, 22:43

    Rilindje per femijet tane!
    Ato duhet te rriten te ditur duke ndjekur mesimin ne nje shkolle bashkohore sa i perket cilesise se shkollimt dhe ambjenteve.Kjo arrihet duke rritur rendesine e mesuesve sepse jane ato qe kane impakt direkt ne edukimin e brezit te ri
    Stop analfabetizmit funksional dhe analfabeteve me diplome

    Reply to this comment
  4. Votuesi June 15, 22:46

    Mosbalancimi i Kqz eshte nje shenje e keqe qe qeveria do te tentoje te ndryshoje vullnetin e sovranit.
    Kjo nuk do te ndodhe sepse ne zgjedhje do te dalim te gjithe me te aferm miq e shoke per ti dhene nje grusht te fuqishem korrupsionit qe pershkon deri ne embrion qeverine ne ikje .

    Reply to this comment
  5. Merita June 15, 22:49

    Berisha njihet nga te gjithe organizmat nderkombetare te zgjedhjeve si prishes i tyre.
    Duke filluar ne te gjitha vitet e qeverisjes se tije ne te gjitha raportet e nderkombetareve nuk e permenden kurr fjalen ZGJEDHJE TE LIRA E TE NDERSHME.
    Kjo fjale do te mungoje per sa kohe do te jete ne pushtet ky njeri

    Reply to this comment
  6. Kaptrer Ramiu June 15, 22:53

    Si cdo gje tjeter qe beri ne kete vend kjo qeveri mjerane nuk mund te linte pa shkaterruar edhe ushtrine shqiptare/
    Kam parasysh ketu jo vetem infrastrukturen dhe logjistikene e saje ,por edhe burimet njerezore duke i zevendesuar me miltante ose vegla te bindura te drejtuesve te shtetit/
    Turp pwr nje vend anetar te Nato-s

    Reply to this comment
  7. Alban June 15, 22:56

    Kemi nevoje kaq shume nevoje per nje lider si Rama sepse ai eshte shume i qarte ne programin dhe ne ato qe i ka paraqitur popullit. Shqiperia eshte nje vend ne zhvillim dhe i duhet me patjeter nje qeveri qe te punoje per popullin.

    Reply to this comment
  8. lorenc June 15, 23:12

    Mendo planin B o Z.Rama. Plani i rrezimit me vote i Sales nuk funksionon, se bazohet ne ligjet qe jane ne dore te Berishes.

    Reply to this comment
  9. LULI June 15, 23:32

    Progrmi i rilindjes do te zbatohet se shpejti ne qevrrisjen e re do te mundesojen hapjend e vendjeve te reja te punes,
    Mjafton te kesh vullnetin dhe deshiren per te punuarm,sigurish ketu nuk kemi parasysh te rrish rrugeve me gershere ne dore,
    Por Bersha nuk e pati ketet vulllnet

    Reply to this comment
  10. klara June 16, 01:26

    Situata zgjedhore eshte e tensionuar frika e humbjes se Berishes ie shtyne ate dhe militantet e tij te provokojne incidente te ulta, shtyre kjo edhe nga retorikat fyese te Berihses, Retorikave plot mllef e urrejtje per te nxitur tek shqiptaret ndasi mes tyre….Por pas shume peripecishe e majta do t’ia dale te triunfoi bindshem e 23 Qershore.

    Reply to this comment
  11. andresa June 16, 01:28

    Berisha ku thurur dhjetra skenare per te vjedhur votat e per te manipuluar zgjedhjet, por asgje nu do te coi ujin ne varken e Berishes,.Fitoren e Paris Socialiste nuk ka burre nane qe e moheon apo e tjeterson…Rilindje

    Reply to this comment
  12. deni June 16, 01:38

    Se pari doja te thosha se kjo ishte vertet nje interviste e jashtezakonshme per kedo qe do te mesoje se cfare eshte politika ne nivelin Europian. Edi Rama ka treguar dhe po e tregon perdite se e meriton te gjithe besimin e shqiptareve. Me idete e modelin e tij per ekonomine, punesimin dhe rolin e Shqiperise ne rajon, ai personifikon te gjitha ato qe mund te kerkojme nga nje lider e kryeminister. Per kete do ta votojme ne 23 qershor!!!

    Reply to this comment
  13. raviku June 16, 01:40

    Me pelqen qe Edi Rama e ve gishtin tamam aty ku dhemb.
    Dhe zgjedhjet e lira jane nje plage e vertete per Shqiperine.
    Po ashtu edhe ekonomia apo punesimiShume mire qe me ne fund kemi nje politikan qe mendon me te vertete per problemet tona dhe jo per interesat e Argites apo Shkelzen Berishes, dy maskarenjve qe e kane cuar vendin ne skajin e varferise

    Reply to this comment
  14. Gava June 16, 02:24

    …”Vezhguesit, te huajt, kane qene spektatore ne ..nje mort…!”

    Ke thene o Edi Rama, ne menyren me filozofike, nje te vertete aqe te madhe sa sot e plot vite e di i madh e i vogel ne kete vend dhe tere Evropen e Ameriken!

    Reply to this comment
  15. antoneta June 16, 05:58

    nuk arrita ta lexoja te gjithe intervisten,,por per dicka jam e sigurte qe kesaj rradhe kandidati yne e ka marre me shume sportivitet fushaten,,,eshte bere 1 me stafin e ps-s, bbravo i qofte.

    Reply to this comment
  16. ardian June 16, 09:24

    Vezhguesit spektatore ne mort ????? Bravo, vleresim i mire per te huajt !
    Hajde se ta tregojne prape te huajt me cilin jane………
    Je i biri i PPSH, nuk i doni dhe i tallni te huajt ju dhe shiko se ku jeni, opozite 23 vjet…..

    Reply to this comment
Shiko komentet

Komento

Your e-mail address will not be published.
Required fields are marked*

Njoftim

Njoftim