RUSI 2018/ Franca dhe Argjentina zbresin sot në fushë

June 16, 2018 11:17

RUSI 2018/ Franca dhe Argjentina zbresin sot në fushë

Dita e tretë e Kupës së Botës është paksa e veçantë pasi në të janë programuar për t’u luajtur 4 ndeshje. Sot do të luajnë ndeshjet e tyre të para Grupet C dhe D. Dy nga ekipet pretendente për të fituar këtë Kampionat Botëror, Franca e Argjentina luajnë sot ndeshjet e tyre të para në këtë kompeticion.

Në letër të dyja duket sikur kanë sfida të lehta, pasi francezët përballen me Australinë, ndërsa argjentinasit me Islandën, por historiku i Botërorëve është i mbushur plot surpriza të hidhura të favoritëve në ndeshjet e tyre të para.

Dy ndeshjet e tjera të ditës Peru-Danimarkë dhe Kroaci-Nigeri janë më të balancuara ndaj në to nuk mund të flitet për favoritë.

Argjentina e Messi-t përballë Islandës entuziaste

Kjo do të jetë hera e parë në historinë e Argjentinës dhe Islandës që do të luajnë kundër njëra-tjetrës. Argjentina e 44 milionë banorëve do përballet me Islandën me 350 mijë banorë. Argjentina i mbylli në vendin e tretë eliminatoret e zonës së Amerikës Latine, por iu desh të priste deri në raundin e fundit të ndeshjeve për të siguruar një vend në Botërorin e Rusisë falë të tre golave të shënuar nga Lionel Messi ndaj Ekuadordit.

Ndeshjet miqësore nuk shkuan edhe aq mirë për Argjentinën, që u turpërua 4-2 nga Nigeria dhe 6-1 nga Spanja, e mori pak ngushëllim me fitoren 2-0 ndaj Italisë. Argjentina është dy herë fituese e Kupës së Botës, pesë herë finaliste e Botëtorit. Me një superyll si Lionel Messi në përbërje dhe një mori yjesh të tjerë si Aguero, Higuain, Dybala, Di Maria etj padyshim që argjentinasit mbeten ndër favoritët për të fituar këtë Botëror edhe pse problemet e ditëve të fundit kanë ngritur disa pikëpyetje. Disa dëmtime titullarësh si dhe akuzat për ngacmim seksual ndaj trajnerit Jorge Sampaoli kanë trazuar klimën në ambientin e argjeninasve.

Gjithsesi ky Botëror është mundësia e fundit e Messit që të fitojë këtë trofe aq të dëshiruar që do ta barazonte atë me Maradonën mitik, ndaj edhe ky fiksim i “Pleshtit” do të jetë motori i Argjentinës. Islanda ka lënë një përshtypje shumë të mirë në eliminatoret, ku e doli e para në grup duke lënë pas Kroacinë. Ata bazohen te një mbrojtje e fortë, vetëm 7 gola të pësuar në 10 ndeshje eliminatore.

Gjithsesi në miqësore nuk kanë lënë një përshtypje të mirë duke pësuar 11 gola në 4 ndeshjet e fundit. Islanda ka pësuar 2+ gola në katër ndeshjet e fundit dhe pëson të paktën një gol në tetë ndeshjet e fundit. Në Kupën e Botës 2014, 5 nga 7 ndeshjet e fundit të Argjentinës, që u mposht në finale, kanë qenë poshtë 1.5 golave.

Franca e yjeve sfidohet nga Australia

Franca e Deschamps është padyshim një nga favoritet për të triumfuar në këtë kompeticion. Me yje si Pogba, Griezmann, Mbappe e shumë të tjerë duket sikur ndeshja e sotme ndaj Australisë do të jetë thjeshtë një stërvitje. Në Kazan Arena luhet që në orën 12.00 midis Francës e Australisë.

Dy ekipet janë ndeshur 5 herë gjithsej me ndeshjen e fundit në 11 tetor 2013, një miqësore të fituar 6-0 nga francezët. Didier Deschamps ka deklaruar para ndeshjes se është paksa skeptik për Australinë, pasi trajneri i ri i “kangurëve” Bert van Marwijk e ka ndryshuar mënyrën e tyre të lojës ndaj i ka kërkuar kujdes skuadrës.

o.j/dita

June 16, 2018 11:17
Komento

Ende pa komente

Ende pa komente!

Je i mirëpritur. Bëhu i pari që komenton këtë artikull. Kujdes etikën.

Komento
Shiko komentet

Komento

Your e-mail address will not be published.
Required fields are marked*