SOCIALE / Për gjyshen 79-vjeçare, gjithçka që ndodh rreth e rrotull është turp

August 28, 2018 23:16

SOCIALE / Për gjyshen 79-vjeçare, gjithçka që ndodh rreth e rrotull është turp

Burime nga njerëzit e afërt të gjyshes Meropi Tabakaja, pohojnë se rreth 80% e gjithçkaje që ajo sheh, provon, përjeton, dëgjon lidhur me të rejat nga Tirana dhe rrethet, etj, etiketohet si “turp”.

Shqetësimin e pohoi për Gojët e Liga djali i madh i 79 vjeçares, 58 vjeçari Androkli Tabakaja: “Për çfarëdo që ndodh, përgjigja e saj është e njëjtë: Turp”.

Mësohet se edhe më parë kanë ndodhur gjëra që ajo i ka cilësuar si turpe, por shpeshtësia e përdorimit të kësaj fjale kohët e fundit është bërë shqetësuese.

Kështu, dëshmitarët familjarë thonë se gjatë 48 orëve të fundit, gjyshja ka quajtur turp faktin që Nikoll Lesi e quan garën e ardhshme për bashkinë e Tiranës si “beteja e Stalingradit”; që letra e saj dërguar një shoqeje mbërriti me vonesë; që nipi i saj i vogël, Spiridhoni, nuk doli mirë me mësime; që Nard Ndoka ka harruar shumë pjesë të spanjishtes që dikur e njihte majë gishtave; që mbesa e saj, Lorida, bleu rrobabanje të reja për plazh, që llamba e korridorit ishte djegur, etj.

Disa herë në ditë, kur dëgjon lajmet në televizor apo të rejat nga komshinjtë, Meropi Tabakaja tund kokën, i hedh një vështrim të mençur bashkëfolësit, psherëtin dhe thotë: “Jo, jo, këto janë turpe”.  

Sigurisht, shpesh Meropi e pasuron etiketimin e saj, duke shtuar ngjyrime si “turp i madh”, “turp e faqe e zezë”, “turp i padëgjuar” etj, duke i lëshuar edhe pa adresë.

“Mamaja më vë në siklet”, pohoi biri i saj Androkliu, “nganjëherë nuk e di kujt i adresohet. Kujt duhet t’i vijë turp? Mua që e dëgjoj? Sheh fëmijët e mi dhe ja lëshon kot: Këta fëmijët e sotëm, turp i madh! E ka me nipat e saj apo me fëmijët në përgjithësi? I fajëson për diçka, apo thjesht ngaqë ekzistojnë? Nuk e di, për zotin nuk e di”.

Androkli Tabakaja sot kujton me nostalgji të jatin e ndjerë, Mihalin, që si të vetmen kryefjalë misterioze dykuptimëshe, përdorte një shprehje evasive ndaj femrave në përgjithësi: “Di unë ç’do ajo, por ç’të bëj që jam burrë me namuz!”

Shënim: Gojët e Liga është rubrikë satirike pro-ndokë dhe pro-les

August 28, 2018 23:16
Komento

1 Koment

  1. Niko August 29, 17:00

    Me shaka, me shaka, faktikisht gjyshja del se ka te drejte me cfare po ndodh sot ne realitet dhe ne rrjet. Esht bere kurvlleku dhe pushtlleku normalitet

    Reply to this comment
Shiko komentet

Komento

Click here to cancel reply.

Your e-mail address will not be published.
Required fields are marked*