Tani s’ka më fillime të reja…(Baladë)  

September 19, 2018 12:10

Tani s’ka më fillime të reja…(Baladë)  

Ka pasur dhe ditë që ndritën nga hareja,

ditë që me pikëllim i kujtojmë,

tani s’ka më fillime të reja,

disa ikin-por të tjerë vazhdojnë!

 

Tani ka vetëm burra të mërzitur,

që kthejnë kokën nga rrugët ku kanë shkuar,

po koha e trishtimit nuk erdhi papritur,

shenja pa fund na kanë lajmëruar!

 

Tani fundi i fundit po vjen për çdo gjë,

pa zhurmë e bujë mbyllen llogaritë,

kitara e shpirtit s’nxjerr më asnjë zë,

një rutinë vrastare tani është çdo ditë!

 

Zjarri i jetës po djeg dhe drurët e fundit,

në anë të vatrës s’ka më dru të tjera,

njeriu i kërrusur prej lodhjes dhe mundit,

kupton hatanë që lë pas pranvera!

 

Nuk ka më për të-ditë me yrysh,

në këtë stinë dimri të acartë,

me mijëra nga ne janë në finish,

e mijëra të tjerë janë ende në start!

 

Nuk ka pas finishit fillime të reja,

neve ikim-po të tjerë vazhdojnë,

ndaj nuk mbaron asnjëherë beteja,

e jetës së pasosur që jetojmë!

 

Kur shkon dikush-ti mendon në heshtje,

dhe ndihesh mirë që s’ishe ti ai,

po vdekja pa mëshirë na mbyt me rreshje,

dhe kthehet-edhe kthehet përsëri!

 

Po njeriu kurrë nuk e ndal përpjekjen,

don t’i vidhet gjithnjë asaj ore,

ndaj gjer më sot e ka mundur vdekjen,

e gjithë jeta. Jeta njerëzore!

 

Rilindja është vërtet një mrekulli,

një mrekulli e jetës njerëzore,

vërtetë vdekja kthehet përsëri,

po prapë jeta është triumfatore!

 

Unë jam një natyrë entuziaste,

dhe pse sot shkruaj vargje pikëllimi,

dhe pse jetoj fiks në ato çaste,

ditë të ftohta dhe të zeza dimri!

 

Para syve jetën shoh të shembur,

shoh si ka sosur gjithë epopeja,

veç për një gjë vdekja më ka trembur,

se s’ka mbrapa saj fillime të reja!

 

Kjo bie ndesh me të gjithë besimin,

dhe Zotin që shpesh nuk e kuptojmë,

po unë e shoh në ecje njerëzimin,

se ikin shumë-po dhe më shumë vazhdojnë!

 

A.DUKA

September 19, 2018 12:10
Komento

Ende pa komente

Ende pa komente!

Je i mirëpritur. Bëhu i pari që komenton këtë artikull. Kujdes etikën.

Komento
Shiko komentet

Komento

Your e-mail address will not be published.
Required fields are marked*

Njoftim

Njoftim

Njoftim