Tatimi i pagës minimale, Luçi: Spekulim. Skema nuk ndryshon

Ministria e Financave ka sqaruar se nuk do të ketë asnjë ndryshim në skemën e tatimit mbi të ardhurat personale.

Në një konferencë për shtyp, zv.ministri i Financave, Erjon Luçi u shpreh se drafti për të cilin kanë shkruar mediet është diskutuar vetëm në nivel teknik dhe jo politik. “Duke marrë shkasë nga diskutimet e ditëve të fundit mbi tatimin mbi të ardhurat personale dëshirojmë të sqarojmë publikun:

1. Së pari: nuk ka ndryshim në skemën e tatimit e të ardhurave personale dhe nuk ka asnjë plan për ndonjë ndryshim të mundshëm në këtë drejtim;

2. Reforma përsa i përket politikës të taksave tashmë ka përfunduar në përputhje me premtimin elektoral dhe programin e qeverisë.

3.Tashmë fokusi kryesor për zgjerimin e të ardhurave buxhetore do të mbetet lufta kundër informalitetit dhe evazionit fiskal, përmirësimi i eficiencës dhe i administrimit tatimor dhe doganor”, u shpreh zv.ministri.

Duke folur për këto masa, Luçi shtoi se: “Në mes të korrikut janë mobilizuar në të gjitha qytetet 500 punonjës të rinj pranë Drejtorisë së Përgjithshme të Tatimeve me synim kryesor ndërgjegjësimin për parandalimin e evazionit fiskal dhe informalitetit. Kjo i paraprin një aksioni më të gjerë të luftës kundër informalitetit që përfshin një paketë të plotë masash që do të prezantohet shumë shpejt”, tha Luçi.