Turqia tronditet nga dy shpërthime. Katër të vdekur dhe 32 të plagosur

May 1, 2016 10:48

Turqia tronditet nga dy shpërthime. Katër të vdekur dhe 32 të plagosur

Tre ushtarë turq janë vrarë dhe 14 të tjerë janë plagosur pas një sulmi të kryer këtë 1 Maj nga Partia e jashtëligjshme e Punëtorëve të Kurdistanit (PKK), teksa ishin në krye të detyrës gjatë një operacioni ushtarak në periferinë e Nusaybinit, të provincës juglindore të Mardinit.

Lajmi publikohet nga një deklaratë e Forcave të Armatosura turke. Ndërkohë që sulmi vjen në të njëjtën kohë me atë të ndodhur në provincën tjetër juglindore të Gaziantepit, ku një autobombë shpërtheu pranë portës hyrëse të Komisariatit të Policisë, duke lënë të vdekur një oficer policie.

Sulmi i ndodhur në Mardin vjen vetëm një ditë pasi ushtria njoftoi vdekjen e një kapiteni të qëlluar nga një snajper i PKK-së, sërish në Nusaybin, periferi jo e vetme kjo që është nën shtetrrethim prej 14 marsit, duke qenë se ushtarët kanë qenë duke çmontuar një bombë të vendosur atje nga militantët kurdë.

Kapiteni Alper Kalem u plagos gjatë përplasjeve të lindura papritur, kur një grup ushtarësh po përpiqeshin të hiqnin një bombë nga rruga mëngjesin e 30 prillit. Kalem u transportua për në spital, por ndërroi jetë më vonë prej plagëve të marra. Në të njëjtin qark, dy oficerë policie dhe një ushtar u plagosën nga një sulm me raketë nga një automjet i blinduar. Më herët gjatë 30 prillit, ushtria bëri të ditur se avionët turq kishin shkatërruar objektivat e PKK-së në Irakun verior.

Sa i përket sulmit të sotëm në Gaziantep, një oficer policie ka mbetur i vdekur nga autobomba në portën hyrëse të Komisariatit të Policisë në provincën juglindore të Turqisë, një lajm i publikuar nga mediet turke dhe i konfirmuar nga guvernatori Ali Yerlikaya. Sulmi ka ndodhur mëngjesin e së dielës.

Të paktën 18 policë të tjerë dhe 4 civilë janë plagosur. Pamjet televizive të “CNN”-it turk raportuan që sulmi të ketë ndodhur pikërisht përpara hyrjes kryesore të komisariatit. Ndërkohë, pjesë të ndryshme të automjetit të hedhur në erë gjendeshin kudo.

Me dhjetëra ambulanca dhe automjete zjarrfikësish kanë mbërritur në vendngjarje, ndërsa shpërthimi mësohet të jetë dëgjuar kilometra larg. Agjenci të ndryshme lajmesh thonë se janë dëgjuar edhe të shtëna pas shpërthimit, por për këtë priten ende konfirmime.

May 1, 2016 10:48
Komento

1 Koment

  1. Mollosi May 1, 11:34

    Kurdet e meritojne shtetin. Turqia, heret apo vone do te duhet te pranoje realitetin e formimit te shtetit Kurd!

    Reply to this comment
Shiko komentet

Komento

Your e-mail address will not be published.
Required fields are marked*