Turqia, grushti i shtetit, Shqipëria

August 4, 2016 12:11

Turqia, grushti i shtetit, Shqipëria

 

Shumëkush edhe tani e quan turk. Pavarësisht se e mori shtetësinë shqiptare pas 25 vjetësh qëndrimi në këtë vend, ku ka krijuar edhe familjen e tij, Ahmet Dursun ndihet thellësisht shqiptar në gjithçka. Është gazetar i lirë dhe shkruan shumë mirë publicistikë dhe letërsi.

Sidoqoftë lidhjet me Turqinë nuk i ka ndërprerë dhe ai i ndjek me shumë vëmendje edhe zhvillimet e atjeshme. Shkak për këtë bashkëbisedim me Ahmetin u bënë ngjarjet e javëve të fundit me tentativën për një grusht shteti në Turqi.

Shmangia nga parimet e Mustafa Qemalit dhe si kanë rrjedhur ngjarjet deri te grushti i shtetit? Çfarë është Lëvizja Gylen? A ka gabuar Erdogani?

Çfarë do të ndodhte sikur të triumfonte grushti i shtetit dhe pasojat për Turqinë dhe Europën? Gylenistët në Shqipëri, Kosovë e Maqedoni, marrëdhëniet Shqipëri-Turqi dhe një këshillë për Kryeministrin Edi Rama…

 

 

Bisedoi Xhevdet Shehu

 

– I nderuar Ahmet, para pak kohësh, pas 25 vitesh qëndrimi në Shqipëri, më në fund t’u akordua shtetësia e origjinës tënde, pra ajo shqiptare. Si ndihesh tani?

– Nuk ndihem aspak më ndryshe me veten time, por ajo që më ka bërë përshtypje së tepërmi në tranzicionin shqiptar, ka qenë “lufta e ftohtë” që kanë bërë vendimmarrësit ndaj emigrantëve dhe diasporës për çerek shekulli. Trajtimi i tyre ka patur mendësinë e periudhës së Luftës së Ftohtë, pra me po të njëjtin sy me të cilin për 45 vite u pa “imperializmi”, pa asnjë ndryshim në thelb.

 

– A mendon se kjo do të ndryshojë tashmë?

– Unë jam përpjekur ndër vite ta arsyetoj se përse duhet të ndryshojë, dhe mbase dhënia e shtetësisë është një tregues që arrita diçka. Si emigrantët, ashtu edhe diaspora, janë asetet më të çmuar të një kombi. E keqja e Shqipërisë nuk ka ardhur kurrsesi prej tyre, por prej atyre udhëheqësve që me taksat e qytetarëve shëtisin të gjithë botën dhe kur kthehen janë po të njëjtë, sikurse u nisën…

 

– Tani të hyjmë në thelbin e intervistës. Në mbrëmjen e 15 korrikut, bota u trondit nga tentativa e një pjese të ushtrisë për grusht shteti në Turqi. Sa i vërtet ishte ky grusht shteti?

– Ishte më se i vërtetë. Ishte një tentativë për puç ushtarak e cila për fatin e gjithsecilit prej nesh dështoi në orët e para të nisjes.

 

– U fol dhe ende flitet -sidomos nga i akuzuari prej tij, pra Gylen-i- se Presidenti Erdogan mund ta ketë organizuar vetë këtë ngjarje?

– Unë e përjashtoj këtë mundësi dhe ky është mendim jo vetëm i imi, por edhe i shumë kundërshtarëve të tij, që edhe janë burgosur gjatë qeverisjes së tij. Po ashtu edhe tre partitë e tjera opozitare që ndodhen në parlamentin Turk nuk janë shprehur rreth Erdoganit si organizator të kësaj ngjarjeje. Në përvojat e mëparshme të grushteve ushtarake në Turqi bie në sy humbja e legjitimitetit të partive politike dhe mos gjetja e konsensusit mes tyre. Në këto raste ka ndërhyrë ushtria duke vendosur në vend rendin, qetësinë dhe kanë organizuar zgjedhje parlamentare. Këto ndërhyrje më shumë se shërimin e gjymtyrëve, kanë përfunduar me prerjen e tyre dhe e gjithë shoqëria turke ka humbur. Në rastin e Erdoganit dhe partisë së tij që është në pushtet me një mbështetje gati 50%, nuk është e logjikshme të ngulet këmbë duke thënë se vetë ai është organizatori i kësaj tragjedie. Por gjithashtu është krejt normale që të përpiqet të nxjerrë sa më shumë përfitime nga kjo situatë, si brenda ashtu edhe jashtë Turqisë.

 

erdogan-turchia-535x300– Atëherë pse dështoi ky grusht ushtarak, pasi në Republikën e Turqisë pas Luftës së Dytë Botërore, kanë ndodhur plot 4 të tilla dhe këto jo pa sukses?

– Është e vërtetë që ia kanë arritur qëllimit, por ushtarakët që i kanë organizuar kanë qenë me meritë në ato poste, e kanë njohur mirë realitetin socio-politik si dhe kanë vepruar në bashkëpunim me partnerët ndërkombëtarë. Ndërsa këta -të paktën ata që janë kapur deri tani- janë ngritur në ato detyra falë katapultimit, pra pa meritë. Arsyeja tjetër e dështimit është se lëvizjet e para të armatimeve, helikopterëve, avionëve dhe ushtarëve, u zbuluan pikërisht nga ushtarakët që me një besnikëri të pashembullt përqafojnë parimet e Ataturkut.

 

– Cili do të ishte realiteti sot në Turqi, nëse grushti i shtetit do kishte qenë i suksesshëm?

– Ashtu siç e thashë më sipër, do të kishte qenë një realitet tmerri, jo vetëm për Turqinë, por për tërë botën. Do të realizohej parashikimi i Kryeministrit hungarez i cili u shpreh se “do të dynden 10 milion refugjatë në dyert e Evropës” dhe më e tmerrshmja, bota do të bëhej gati për Luftën e Tretë Botërore me një shpejtësi marramendëse, pavarësisht se do ta emërtonte luftë fetare, luftë të qytetërimeve, apo të tregjeve të reja. Turqia, që prej vitit ‘52 është një prej anëtarëve më besnikë të NATO-s, dhe pjesëmarrëse direkte në konfliktet më të nxehta ku ka marrë pjesë NATO. Sot, në të gjithë kufijtë e jug-lindjes si dhe lindjes së saj ka mosmarrëveshje, apo luftë direkte me vlerat perëndimore, dhe ardhja në Turqi e një regjimi të ngjashëm me atë të Khomeinit do mund të sillte një numër të vrarësh, jo sa tani rreth 250 persona, por më e pakta rreth 250.000.

 

– Për grushtin e shtetit u akuzua Lëvizja Gylen? Çfarë është kjo lëvizje, si u krijua dhe si arriti të bëhet kaq e fuqishme?

– Sot, analiza e lëvizjeve të tilla po bëhet në mënyrë të cekët dhe kjo jo vetëm jashtë Turqisë, por edhe brenda saj. Ashtu si në shumë perandori të mëdha, edhe në atë otomane, që nga krijimi i saj ka patur përpjekje të grupeve të ndryshme, të cilat, duke përdorur doktrina fetare, pretendonin të ishin pjesë e pushtetit politik. Për 500 vite me radhë, çdo herë karshi këtyre grupeve është përdorur shpata dhe janë penguar t’i afrohen pushtetit. Perceptimi se këta abuzues të fesë, vetëm Ataturku i ka dënuar nëpërmjet Gjykatave të Shpëtimit Kombëtar është një propagandë dashakeqëse dhe e qëllimshme (ky perceptim është i përhapur edhe te një pjesë e shqiptarëve), dhe referimi pozitivist për kohën e Perandorisë Otomane është thjesht për të gjetur një strehë, larg kujtesës së masave të gjera. (Gjykatat Ushtarake të Shpëtimit në kohën e Ataturk-ut dënuan me vdekje drejtuesit e këtyre tarikateve, pasi ndikuan që në luftërat më vendimtare, të dezertojnë nga betejat 46% e ushtarëve. Një sëmundje kjo, në historinë otomane, por edhe në fillimet e Republikës së krijuar nga Ataturku).

Tani le të kthehemi konkretisht te personazhi Fettullah Gylen: pas grushtit ushtarak të vitit ’80 dhe qeverisë gati 2 vjeçare të ushtarakëve, u realizuan zgjedhje të lira të cilat i fitoi Partia Mëmëdheu e drejtuar nga Turgut Ozal. Pikërisht në vitin ’84, kjo parti u krijoi të gjitha hapësirat juridike dhe ekonomike që të përhapen me një shpejtësi marramendëse në të gjithë Turqinë me shkolla private, kurse si dhe konvikte duke seleksionuar kryesisht fëmijë të familjeve të varfra, dhe duke ia injektuar mendësinë se edhe pa u menduar mund të ecet në jetë, dhe duke e bazuar këtë te thëniet e deformuara të predikimit fetar. Nëse ju kujtohet, herën e fundit që Turgut Ozal vizitoi Tiranën (1992) hodhi themelet e shkollës me emrin e tij, dhe këtë gjë ai e bëri në shumë shtete të tjera duke ia mundësuar kësaj lëvizje të përhapet në shumë vende të globit.

 

– Po me Presidentin Erdogan, si mundën të bashkëpunojnë kaq vite?

– Erdogan që para viteve ‘80 ka një të kaluar konservatore dhe pjesëmarrës aktiv në Partinë e fetarit më të madh të politikës turke, pra të Erbakan-it dhe ambicia e tij për të kapur majat e politikës turke, e kishte të nevojshme bashkimin e elektoratit. Si shpërblim, ia lejoi njerëzve të Gylen-it të zenë vend në pikat me kyçe të shtetit, si prokuroria, policia, shërbimet sekrete, gjykata, biznese dhe pas 2007-ës edhe në ushtri. Pra i bashkoi interesi reciprok, ndarja e pushteteve.

 

feto_8– Si është e organizuar Lëvizja Gylen?

– Deri në tentativën për puç, mendimi i përgjithshëm ishte se kishte arritur një përsosmëri të pashembullt jo vetëm në Turqi, por edhe në vende të tjera me tradita organizimi. Përkrahja e anëtarëve mes tyre e kudo, respektimi i hierarkisë (ngjashëm me ushtritë më të rrepta) sakrifica, mos dekonspirimi, kamuflimi dhe e gjitha kjo e shitur për kultivimin e kulturës islamo-turke nëpër botë, ndërkohë qëllimi i vetëm ishte shtimi i pasurisë 150 miliard dollarë nëpërmjet pushtetit absolut mbi shtetin dhe shoqërinë turke e jo vetëm.

 

– Çfarë roli ka pasur ky bashkëpunim në qeverisjen e Erdoganit, dhe personalisht mbi të?

– Prej vitit 2002 kur erdhi në pushtet dhe deri në fundin e vitit 2011, në më shumë se 100 shtete (përfshirë këtu edhe Shqipërinë dhe pjesën tjetër të hapësirës shqiptare), pikërisht kjo Lëvizje e ka promovuar Erdogan-in, nëpërmjet lidhjeve me parinë e vendeve ku kishin krijuar shkolla dhe biznese. Pra këmba e Erdoganit jashtë Turqisë ishte kjo lëvizje, e cila si shpërblim mori shumë fonde si dhe pozicionet më të rëndësishme në shtet.

 

– Atëherë pse u krijua kjo plasaritje dhe tashmë konsiderohet prej Erdoganit si një organizatë terroriste?

– Është mëse e kuptueshme. Erdogani mendoi se kishte arritur influencën e mjaftueshme nëpër botë, dhe do të mund ta mbante pa nevojën e Gylen-it, ndërsa Gylen-i mendoi të kundërtën që nëpërmjet njerëzve në pikat kyçe, do të mund të merrte shtetin dhe të kthehej në një hero si Khomeini në kohën e tij në Iran.

 

– Ka shumë zëra që e kritikojnë Erdogan-in si një diktator, dhe aq më tepër trajtimin që po i bën organizatorëve të puçit?

– Erdogani ka një autoritarizëm të tepruar për një vend si Turqia që është partneri më strategjik i perëndimit në Azi, por nuk është diktator në kuptimin klasik të fjalës. Turqia ka një histori aspak të ngjashme me vendet që i flladiti pranvera arabe, dhe historia e saj falë parimeve dhe revolucioneve të Ataturkut nuk lejon askënd të vetë-ngrihet në nivelin e një diktatori. Nëse do të ishte aq lehtë, edhe gjeneralët e suksesshëm të grushteve të shtetit të mëparshëm do ta shpallnin veten si Mubaraku, Gedafi, apo Sadami, por duke e njohur realitetin, as nuk tentuan.

Sa i takon trajtimit të puçistëve ka shumë të dhëna që ky grup – me mbështetjen politike të Erdogan-it- në dekadën e fundit ka burgosur me qindra gazetarë, shkencëtarë, njerëz të dijes, gjeneralë. Nëse këto zëra do të kishin treguar të njëjtën ndjeshmëri dhe për ata, sot do të ishin të besueshëm. P.sh. Kur u burgos një prej ushtarakëve më të zotë që jeton sot në botë, dhe që ka bashkëpunuar gati 40 vite me strukturat e NATO-s, në mënyrën më të ndershme e profesionale, ish-shefi i shtabit të ushtrisë turke, Ilker Basbug -me origjinë shqiptare, por në këtë rast nuk ka aspak rëndësi-, a keni dëgjuar një interesim të tillë? Unë jo!

 

– Sa mendon se do të zgjasin efektet e kësaj tentative grushtshteti në Turqi?

– E ka në dorë Erdogan-i dhe qeveria e ish partisë së tij. Nëse do ta shfrytëzojnë këtë ngjarje për t’iu kthyer parimeve të lëna mënjanë të Ataturk-ut, për një shtet laik dhe bashkëkohor, me fytyrë të kthyer nga vlerat e kultivuara ndër dekada prej mësimeve të tij, polarizimet minimizohen dhe Turqia del shumë më e fortë nga kjo ngjarje dhe kjo së pari ul trazirat e Lindjes së Mesme dhe miliona njerëz do të nisin të kthehen për t’i rindërtuar shtëpitë e rrënuara. Nëse e rivendos në tekstet shkollore, në shkolla, në sheshe dhe në stadiume emrin e Ataturk-ut si një lider për t’u marrë shembull, dhe jo si një sfidë për t’ia kaluar, do të zerë një vend të veçantë në histori, megjithë gabimet e deri tanishme, pasi sot sondazhet, respektin dhe dashurinë për Ataturk-un e tregojnë mbi 80%, një përqindje që Erdogani, apo kush do, nuk do ti afrohej dot.

 

– Janë me dhjetëra institucione arsimore që ndodhen jo vetëm në Shqipëri, por në Kosovë dhe në Maqedoni të Lëvizjes Gylen. Çfarë mendon se mund të bëhet me to?

– Nuk më takon mua të them se ç’mund të bëhet me to, por jam i bindur që ka mësues që ndershmërisht kanë zbatuar rregullat dhe ligjet e këtyre shteteve dhe nuk kanë pasur dijeni mbi qëllimin e vërtetë të kësaj lëvizjeje. Shqiptarëve u takon që këta t’i respektojnë deri në fund, pasi i kanë mësuar fëmijët e tyre. Ndërsa për t’i dalluar se kush janë të tillë, ashtu si prej kohësh ua kërkojnë gjyqtarëve të ndershëm shqiptarë që të tregojnë emrat e gjyqtarëve të korruptuar, edhe këta duhet të zotohen t’i tregojnë kryesorët e kësaj të keqe, e cila mund të bëhej shkak për trazira të mëdha në Shqipëri, Kosovë e në Maqedoni.

 

– A do të mund t’i mbijetojnë presionit të Turqisë, këto shtete?

– Është hera e parë që e “admiroj” korrupsionin politik të Shqiptarëve me këtë rast, pasi partitë politike shqiptare nuk ngopen duke ua blerë dy-tre kryesorët e tyre, por edhe shoferi i nën-kryetarit kërkon shuma të majme! Ky grupim e njeh (mendoj mjaft mirë) realitetin politik shqiptar dhe do të synojë t’i mbajë me fjalë duke i treguar parajsën që të përfitojnë mbështetjen e tyre dhe kohë, por lëvizja Gylen nuk është mësuar kurrë të japë, por gjithnjë të marrë! Ky lloj “pazari” do të jetë një përvojë e re për të dy palët.

 

Ahmet Dursun

Ahmet Dursun

– Kryeministri Rama e ka shpallur partner strategjik Turqinë. Kjo ngjarje, çfarë zhvillimesh mund të sjellë për të dhe qeverinë?

– Kryeministri Rama dhe e gjithë politika mbarë shqiptare ka patur dhe duhet të vazhdojë të ketë lidhje veçse zyrtare me shtetin Turk dhe përfaqësuesit e tij legjitim. Për të qenë më i sigurt dhe i bindur në vendime, Rama mund të bashkëpunojë më shumë me partinë e majtë, CHP. Nëse grupi i Gylenit, nëpërmjet ish-studentëve të indoktrinuar, kanë zënë vende kyçe në sistemin e drejtësisë, reforma duhet t’i pastrojë edhe ata megjithë degëzimet e tyre kudo.

 

– Ç’farë përfitimi direkt do të kishte qeveria dhe shoqëria shqiptare?

– Ky nuk është një vullnet që i takon vetëm qeverisë shqiptare, por gjithë faktorit politik shqiptar e kudo. Rama, si njeriu më pak paragjykues mes politikëbërësve shqiptarë, mund ta bindë këdo sesa shumë e kanë mbajtur peng zhvillimin e vendit tonë, sëmundjet e fshehta në këto 25 vite. Zbulimi i sëmundjeve të fshehta sjell një rishikim të drejtë të historisë së afërt dhe të largët mes dy vendeve, e cila ndihmon çdo shqiptar të besojë te përpunimi vetjak i vlerave dhe jo i kopjimit të tyre.

 

– Ahmet, Shqipëria në më pak se një vit do të zhvillojë zgjedhje të reja. Pse qeveria shqiptare, konkretisht Z. Rama, duhet të shpenzojë kohë dhe energji për një çështje të dy ish-ortakëve, pra të Erdogan-it dhe Gylen-it?

– Jo për ata, aspak, unë ende kam mendimin se Z.Rama ka mundësi të ngrihet në lartësinë që unë mendoj se i takon. Kjo arrihet duke i shkuar deri në thelb, pse-ve. Nëse në bashkëpunim edhe me partnerë të tjerë strategjikë, vërtetohet se grupimi Gylen edhe në hapësirat shqiptare ka kultivuar kacavjerrëse që të mbërthejnë institucionet e rëndësishme të shtetit, atëherë kjo çështje nuk lidhet më tashmë me dy personazhet, por me çdo shqiptar. Mbase rilindja është e fshehur pikërisht mes gjetheve të kacavjerrësve…

Si çdo vit, në 17 prill Turgut Ozal, pra njeriu i parë që i krijoi çdo mundësi Lëvizjes Gylen të zhvillohet e të përhapet, kishte 23 vjetorin e vdekjes. Në këtë 17 prill, pjesëmarrësit në ceremoni nuk ishin më shumë se 30 veta, dhe kjo nuk është vetëm një mungesë respekti, por edhe një mosmirënjohje e Lëvizjes Gylen për të, e cila mbase tregon më shumë se e gjithë intervista…

 

– Le të kthehemi edhe një herë te fillimi i këtij bashkëbisedimi. Tani që je zyrtarisht qytetar shqiptar, a të shkon mendja që të merresh edhe me politikë?

– Ashtu si ti, besoj se edhe lexuesit e Gazetës “Dita”, i mbajnë mend intervistat e realizuara në Prill-Maj-Qershor të vitit 2013 me gratë kandidate në zgjedhjet parlamentare dhe nga ky bashkëpunim me Gazetën ‘Dita’, pjesa më e madhe tyre sot ndodhen në parlament. Kështu që përpjekja ime, për të pasur një përfaqësim gjinor si asnjëherë në Kuvendin e Shqipërisë, u realizua.

 

– Kjo është e vërtetë, por pyetja ime qe direkt për ty?

– Unë nuk besoj në një demokraci kur vendimet i merr një lider partiak, apo një grup i vogël pranë tij. Asnjë kërkesë të tyre, ashtu si deri tani, nuk e marr seriozisht. Por nëse kjo kërkesë vjen nga elektorati i një partie do ta vlerësoja me shumë respekt.

 

 

Kush është…?

Ahmet Dursun është një aktivist i njohur i të drejtave civile, publicist dhe shkrimtar. Lindur në Turqi, me origjinë të hershme shqiptare.

Në vitin 1991 ka ardhur në Shqipëri për të studiuar në Akademinë e Arteve. Prej vitit 2000, ka studiuar dhe ushtruar kulinaritë e hershme perandorake të Mesdheut. Në 2008 fillon të angazhohet në shtypin e shkruar dhe në vitin 2009 publikon romanin e tij të parë “Pena e gardianit”, roman i cili jo vetëm u vlerësua nga kritika letrare, por edhe u nominua si një ndër 7 romanet konkurrues për Çmimin “Petro Marko” për vitin 2010. Vitet e fundit ka realizuar një emision radiofonik mbi barazinë gjinore dhe përfaqësimin e grave në politikë dhe një seri intervistash të personaliteteve të ndryshme të publikuara nga ATSH dhe Gazeta Dita. Në vitin 2015 ka realizuar në TVSH emisionin e tij “Kush është…?!” si dhe dokumentarin “Arti i kulinarisë ilire” (në rrethin e Beratit).

August 4, 2016 12:11
Komento

13 Komente

  1. bayoneta August 4, 12:39

    Asgje dhe askush qe quhet apo vjen nga turqia nuk i vlen asgje shqiperise.Nuk eshte Turqia shembulli yne.I pame 500 vite se si na lane,me 50 km rruge me zhavorr dhe me asnje shkolle dhe me mijera xhami e analfabetizem.Ahmet ti je turk dhe i till do mbetesh.Shqiptar nuk behesh kurre,Shqiptar lind nga prinder shqiptare ,e Dime se si jane shitur shtetesite nga sali serbi dhe te tjeret tek turqit dhe tek arabet per leke..Sa me larg shiperise aq me miq do jemi hajde bravo.

    Reply to this comment
    • Claus August 4, 17:08

      Duke mos komentuar qendrimet e zoteri Ahmetit ,qe eshte nje shqiptaro-turk i mire,per ngjarjet ne Turqi,megjithate kam ca verejtje ne lidhje me qendrimin e tij ndaj Edi Rames.
      Nuk ka shqiptare,qe te mos e kete thene, menduar apo tek e fundit degjuar, ate shprehjen,tashme popullore se “Rama eshte vellai i vogel(igjate) i Erdoganit”.
      Rama vete eshte kujdesur qe te paraqitet si i tille.
      Arsyeja se pse ,ka te beje me parate qe shpreson se mund t’i jape vellami i madh turk,me te cilat mendon se mund te dale nga bataku rilindjot i ekonomise se rregjuar shqiptare.
      Gjithsesi,per te kuptuar pehlivanlleqet turke te Edi Rames,por edhe per t’ua bere me te qarte qorrave fanatike qe e mbeshtesin ate,po e kapim pak si ndryshe ceshtjen.
      Imagjinoni sikur ne vend te Rames te ishte Berisha,apo sic e therrasin socialistet me ate apelativin krahinor Saliu.
      O ju socialista,ju qe besoni tek sociopati Rama,a mund ta merrni pak me mend, se cmund te thoshit,nese Sali Berisha do te flirtonte keshtu me Erdoganin,sic po ben Edi Rama?!!
      Perpiquni!Vetem pak.Nuk do shume mund.Dhe jam mese i sigurte,se ato qe do te thoshit,do t’ua kalonin qindfish ketyre qe thoni tani per te.
      Gjithsesi,duke patur parasysh trusakatesine tuaj,po jua them une.
      Nese Sali Berisha do te flirtonte me Erdoganin,jo 100% sa Rama,por sa nje e qinda e tij ,te gjithe socialistat,te gjithe analistet,gazetaret,dhe koperat mavij te socialistave,do te cirreshin ne kor per “otomanin Sali”,per “islamikun Sali” …duke aluduar lidhjen mes emrit te tij me prejardhje muslimane,perkatesise se tij te presupozuar fetare ,dhe flirtit me islamikun turk Erdogan.
      I gjithe shtypi i majte do te mbushej me shkarrashkrime,ku do te beheshin aludime te tilla te poshtra,kurse kopete e komentusve socialista do t’u mbanin iso duke e share ate drejtperdrejt si islamik!
      Saliu – do te thonin – po kerkon ta ktheje Shqiperine nen varesine e Turqise neo-otomane…!!!
      Saliu – do te thonin – eshte nje neo-otoman …!!!
      Saliu – do te thonin – i thote vella Erdoganit ,sepse eshte islamik si ai…!!!
      E shume e shume gjera te tjera te ngjashme.
      Ne fakt,asnje nga keto nuk ka bere Sali Berisha,apo Saliu ,sic i thone socialistat e felliqur krahinore.
      Ne ceshtjen me te mprehte ne marredheniet me Turqine,ceshtjen e Palestines,Sali Berisha,Doktor Sali Berisha,si Kryeminister i Shqiperise,mbajti qendrim te prere ne anen e aleatit tone te vetem te madh,ShBA-se, qe do te thoshte qendrimi i prere kunder atij te Turqise.
      Erdogan ate kohe,thone se turfulloi.Doktor berisha as se pjerdhi fare.
      Krejt te kunderten beri Edi Rama.Per here te pare ne historine postkomuniste te Shqiperise,Edi Rama,dell kunder ShBA-se ,vetem e vetem qe t’i bente qejfin sulltanit turk,Erdoganit.
      Krahasimet e rastit behen vetvetiu,edhe po te mos donim t’i benim.
      Sali Berisha,apo Saliu(muslimani) mban anen e ShBA-se,dhe shperfill me perbuzje kerkesen e Turqise per problemin shum delikat te Palestines.
      Edi Rama,i krishteri medemek,orthodoksi medemek,katoliku medemek, mban anen e islamikut Erdogan…!!!
      Konstrasti flet vet.
      Gjithsesi,une dua te them edhe dicka ne lidhje me nje keqkuptim qe e kane shume shqiptare,ne lidhjen qe i bejne perkatesise se tyre religjioze me perendimorizmin apo antiperendimorizmin.
      Ka ca zuzare si Edi Rama,qe mendojne qe perkatesia,prejardhja e tyre fetare(ne te vertete keta skan fe,jane ateiste),i ben ata automatikisht europiane,perendimore!
      Keshtu mendon Rama,dhe cdo flirt qe mund te beje me islamiket,mendon qe zhvleresohet nga perkatesia apo prejardhja e tij fetare…!!!
      Edhe analistet e tij,gazetaret dhe opinionistet e majte,qe c’nuk thoshin per BErishen,qofte edhe kur bente nje takim apo vizite te detyrueshme diplomatike,me ndonje drejtues te ndonje vendi musliman,ne nje vend te tille , edhe keta analiste pra,me heshtjen e tyre per flirtet islamike te Rames,mendojne si Rama.
      Po hajt – thone – se Rama eshte i “krishtere”…s’ka gje se flirton me islamikun Erdogan!
      A thua se prejardhja fetare e psikopatit tone,e ben imune Shqiperine edhe sikur ajo t’u shitet islamikeve nga “i krishteri” Rama…!!!
      Edi Rama,ne fakt,nuk eshte as i krishtere as mysliman.
      Edi Rama,Kryeministri i Shqiperise,eshte nje edepses,nje sojsez.Pa din e iman.Pa fe e atdhe.Pa familje.
      Edi Rama ua ka bere naften te gjithave me radhe.Duke filluar qe nga familja e tij.

      Reply to this comment
  2. anticensurë 25642654 August 4, 12:41

    shkrim,intervistë me shumë ???????? të mëdha!!

    Reply to this comment
  3. Deshmuesi August 4, 13:13

    Marrja e nje shtetesie, shqiptare e c’fardo qofte, nuk te ben kurre ” thellesisht shqiptar ne gjithcka “, si thuhet ne krye te shkrimit! Kjo eshte nje utopi qe gjithe e dijne dhe pak e pranojne!
    Shtetas te nje vendi nuk te ben nje cope leter, as jetesa ne ate vend! Natyrisht shkreserisht po. por realisht kurre ky Dursuni e tjere si ky nuk behen shqiptare apo tjeter edhe sikur te vdesin ketu. Geni turk qe ka ky dhe geni kombetar qe ka kushdo nuk tjetersohet kurre!
    Eshte dicka e natyrshme qe propaganda globale nuk mund ta tjetersoje, vetem tenton deshperimisht ta fshehe.
    Fakti qe Dursun shkrimet e tij i ka me kryefjale Turqine tregon se shtetesite me letra dhe atdheu ku lind jane krejt te ndryshme.

    Reply to this comment
    • anticensurë 25642654 August 4, 15:37

      të isha në vënd të erdoganit do ta kisha pushu nga puna menjëherë ambasadorin e tij dhe do të kisha vënë dursumin!
      i mbron të drejtat e erdos si askush tjetër!!
      më parë ka shkruar shkrime të mira!!me një farë tolerancepor prapë se prapë të mira!!njëlloj si puna e andrea stefanit!!po në të njëjtin moment si stefani dhe ky i ka bërë mutin!!flet për gylen e erdogan shan të parin dhe ngrë të dytin por në fund të fundit nuk mendon aspak për turqinë!!bile shkon deri aty sa të mohojë që shteti osman kishte marrë rrolin e kalifatit!!pak a shumë e quan një perandori laaaaaaike!
      uaauuuuuu!!e fortë kjo!!a thu të kenë bërë të njëjtin kurs fillozofije me stefanin tek shelgjet në buzë të lumit??

      Reply to this comment
  4. nuk ka tym pa zjarr August 4, 14:32

    Cdo gje qe ndodhi apo po ndodh ne turqi nuk ka lidhje me gurgulenin por me kurdet. Sulmet kurde jane bere te reezikshme. Kurdet jane forcuar dhe perbejne rrezik pwr pavarsi. Perendimi po loz lodren sikur eshte kunder cpo ndodh me erdoganin per opinionin e vet ndersa nga prapa i jep viston erdoganit te nise shkaterrimin e kurdeve edhe pse duan te krijojne kurdistanin. Por nuk mund ta humbin dot aleatin e madh turk kunder rusise per kurdistanin.
    Te shohim cdo ndodh.
    Asnje gur ne bote nuk leviz pa aprovimin e perendimit. Harrojeni.
    Edhe kur turku qelloi avjonin rus bekimi ishte marre ne perendim. Me ane te atij sulmi perendimi i dha sinjal rusit qe jemi ne ata qe vendosim fatet e nje vendi. Jo ju. Kur e pane qe rusi ngrehu armet per tu pergjigjur, perendimi u zbyth ca por jo plotesisht sepse dolen zbuluar ne opinionin boteror se kush ishte prapa isis. Per ta lare mutin me shurre ja lane dopio gjashte sauditeve.
    Eeeehhh sa ka politika

    Reply to this comment
    • anticensurë 25642654 August 4, 16:13

      politika ka me të vërtetë shumë,por që ti ke bërë një çorbë që se ka shoqen!?nuk duhet shumë mënd!!
      kurdët nuk janë as më të mirë e as më të këqinj se shqiptarët e kosovës dhe të maqedonisë,të malit të zi e të greqisë!nuk janë më të këqinj se çeçenët,baskët,tamilët e kështu me rradhë mund të të rreshtoj shumë popuj që kërkojnë lirinë e tyre!ata nuk kanë mundësi të bëjnë një grusht shteti!ata me të vërtetë luftojnë ball për ballë por takat për grusht shteti nuk kanë!
      se kush është krijuesi i ISIS,nuk besoj se do të na bësh qorrë mor shpirt!!me të vërtetë që perëndimi furnizoi me armë kundërshtarët e asadit,por mos harro se ishte turku,erdogani drejtpërdrejt që keqpërdori lejen e dhënë nga perëndimi!!ky keqpërdorim bëri që perëndimi të tërhiqej!!u vërtetua që erdogani jo vetëm pati lidhje me ISIS,por dhe që ata i bënë punët që ai i kërkoi!!kundër kurdëve disa atentate!!
      nuk dua të them më turku,por po them erdogani nuk po “sulmohet”hapur nga perëndimi për një arsye të thjeshtë!!shumë nuk e dinë se çfar ndodhet në bazën e incirlik!kuptohet pronë e shba!!ata nuk kanë mundësi që ti mbrojnë ato mbushje bërthamore që ndodhen atje,nga një sulm i ushtrisë turke,por shumë shpejt kanë për ti hequr që andej!më pas kemi për të parë!!
      edhe sikur ta marrim për të vërtetë atë që thotë erdogani dhe me shumë dredhi e mbështet dursumi,se gyleni ka organizuar grushtin e shtetit(një idiotësi e organizuar nga një i prapambetur mendor),erdogani nuk ka të drejtë të bëjë tërë atë raprezalje!!në një shtet demokratik nuk mund të dënohet askush që nuk ka bërë një krim!që nuk ka shkelur ligjet!!nëse i kanë shkelur disa ushtarakë ata duhet të dënohen për shkeljen dhe jo për hakmarrjen e prijsit të vëndit!!
      nëse ka njeri që po shkel ligjet e turqisë është erdogani!!ai deri dje,kryeministër ishte i pari i turqisë,kurse sot ai duhej të ishte në të njëjtat kushte si paraardhësi i tij!!pasardhësi i tij në kryeministri,kryeministri i sotëm dhuhet të drejtonte shteti dhe jo presidenti!!por po ndodh e kundërta!!erdogani pa asnjë të drejtë ka marrë gjithë pushtetet!!gjëndja e jashtëzakonëshme duhet tijepte kryeministrit fuqi të jashtëzakonëshme dhe jo presidentit!!

      apo jo o ahmet dorsumi,avokati i sulltanit???

      Reply to this comment
  5. besi August 4, 14:44

    Mesazhi juaj.. pse kjo mbyllje e forte dere e me mllef te madh? Gjithkush ka te drejte te shprehe mendimet e veta lirisht, dhe s,ka pse pritet me kembet e para kot me kot.

    Reply to this comment
  6. Epiriiiii August 4, 15:10

    Behet api Jo Ahmeti Shqiptar eshte tjeter pune, nuk ishte kjo Tematika, Thelbi i ketij shkrimi, apo interviste. Ahmeti Thjesht na Informoi me hollesisht, me shume mbi ngjarjet dhe personazhet ne Turqi. Ai e tha troc e shqip. Si Turk i Origjines Shqiptare i keshilloj Shqiperis dhe Shqiptarve te mbajne kontakte me Shtetin Turk apo cilindo shtet tjeter por pa ju Jargavitur apo lajkatosur a Servilosur askujt.

    Reply to this comment
  7. gjermani i fundit August 4, 15:40

    Po grindej nje burre dhe nje grua ne bulevard, nuk munguan edhe sharjet dhe shpullat. Te indinjuar kalimtaret thirren policine dhe policia mberriti sepse u lajmerua se nje burre e nje grua po rriheshin. Kur u kthyen duarbosh ne rajon, shefi u thote se ku jane sherrxhinjte? Policet i thone se nuk po grindej nje burre me nje grua, por burri me gruan…Kjo puna e Turqise keshtu eshte ekzakt, por cuditem qe ushtria deshtoi. Per mua eshte barcalete “alla turka” qe ushtria u per-lesh(dmth shkuan per lesh do thoshte ish kryethara e parlamentit) me policine dhe fitoi policia. Ne Itali djalin e Ere-Doganes po e procedojne per afere pastrim parash. Ne shqiptaret kemi nje shprehje;” i bie dritares qe te degjoje dera”. Dmth cikli i Erdoganes mbaroi, aleatet e mbajten ne loje qe te dale me lezet me kembet e veta.

    Reply to this comment
    • Claus August 4, 19:34

      Koment me humor dhe njekohesisht i thelle, o i “fundmi i gjermaneve”. Me shume nuk ke c`thua.
      Duke te bere pozitivisht replike dua te bej nje paranteze
      me nje puc ndodhur ne gusht te vitit 1991 ne ish-Bashkimin Sovjetik. E bej kete se dua te dal ne nje perfundim duke mos synuar se kam te drejte.
      Nuk e di, as mediat dhe askush nuk heq paralele me ate puc ndodhur po ashtu ne ate pisk vape te muajit gusht te atij viti, kur disa drejtues te larte te udheheqjes sovjetike te asaj kohe moren ate vendim per te bere puc shteti, ne nje kohe kur bota dhe mbare Europa po perjetonte nje epoke te re te vendosjes se konsolidimit te pushteteve demokratike, pas renieve te regjimeve komuniste!!!!
      Ne Shqiperi ekzistonte nje qeveri stabiliteti, nje hale ne sy e paranojakut kardiolog Sali, qe me ate shqipe dhe anglishte te dalldisur cirrej dhe kelthiste andej-kendej, si ato hienat e lena te vuajne urie.
      Ne ate kohe ashtu si Erdogani edhe Gorbacovi ishin me leje. I pari ne brigjet e Marmarase dhe i dyti ne brigjet e Detit te Zi. Kohe lejesh ose gjysem-lejesh edhe per lideret europiane qe nuk donin me te degjonin lajme. Kriza e refugjateve kishte marre fund, Erdogani priste miliardat e premtuara, pra qeverisja kishte rene ne faza e nje letargjie verore.
      Ne ate kohe Gorbacovit i duhet te firmoste nje amendament per shkrirjen e tere Bashkimit Sovjetik, ndersa Erdogan i gjendur para nje presioni te brendshem dhe te jashtem per shume arsye qe dihen kerkonin te gjenin nje arsye me shume per te bere reforma te shpejta dhe te “argumentuara” per syte e mediave dhe qeverive euroatlantike.
      Pucet nuk besoj se i nxiten vete, sepse ka shume mundesi te te dalin jashte kontrollit. Pershtypja ime eshte se ata, si Erdogani dhe Gorbacovi ne ate kohe u krijuan “armiqve” dhe kundershtareve te tyre kushtet e favorshme te benin ate loje-puci.
      Pra ishte nje kurth i ngritur fare mire nga nje Sulltan, me metoda qe i kane aplikuar vetem ata. Listat ishin pergatitur me kohe, planet po ashtu se si do te veprohej dhe kush do te arrestohej.
      Si ne `91 ashtu dhe ne 15 korrik te vitit 2016 ato puce deshtuan. Te parin e shpetoi Jelzini dhe shperberja e BS ndodhi shpejt dhe pa probleme, pra ne favor te politikes amerikane dhe europiane, ndersa i dyti me nje smartphone ngriti popullin ne kembe!!!!
      Kurthi qe ngriti Sulltani nga Marmaraja funksionoi si nuk ka me mire. Aty rane brenda sherbime te huaja dhe nje pjese e ushtrise. Erdogani donte te dilte viktime ne keto kohe te veshtira per te dhe i hyri detit me kembe duke filluar persekutim masiv qe zor se ka ndodhur diku tjeter duke perjshtuar vetem dy vende.
      Armiku natyrisht qe do te ishte Fetullah Gylen, klerik radikal me ide “paqesore” qe ka hyre ne Shqiperi qe ne kohen e “myslimanit” Sali qe therte deshe dhe dele ne mes te rruges si kurban dhe hiqte bustet e Skendebeut nga presidenca e tij e shpifur ne ate kohe.
      Strukturat e Gylenit e kane kapur strukturen e shtetit shqiptar me kohe. Kete e ka pohuar dhe autori ne shkrimet etij te meparshme. I gjen ne polici, gjykata, arsim, fe, administrate kudo. Eshte nje sistem brenda nje kalaje te rrenuar te shtetit shqiptar. Mediat e tregojne fare mire kete. Pra kjo nje dite do te plaste.
      Puci ishte nje rrethane e krijuar nga Erdogani, i cili doli nje Sulltan me finok se Sulltani qe jeton ne USA.
      Ishte nje kundergoditje tipike aziatike.
      Ky eshte mendimi im. Ai tani po kap tere orgenet kushtetuese per tu bere nje Sulltan i vertete.
      Ishte vetem nje reagim qe nga stili dhe forma vjen nga stepat sllavo-aziatike.
      Kaq mund te them.
      Pasojat do ti kemi me vone. Situatat jane jo dhe aq te qeta. Ne nentor nga zgjedhjet ne USA do te kemi nje “qartesim”.
      Turqia eshte pjese e kontinentit euroaziatik me nje rol kyc ne kete hapesire. Cdo destabilizim merr me vete edhe disa vende te ish-Perandorise Osmane. Kete e ke pershkruar shume mire nje analist polako-amerikan me emrin Brezinski. Besoj se ke degjuar per te.
      Po nejse, me thelle nuk po hyj.

      Pershendetje per ty dhe per disa te tjere, por jo per nje “Claus” kopie, qe shkruan dhe shkruan pa thene asgje.
      Kopje eshte vetem alias “Claus” te tjerat jane nje supe me germa alfabeti.

      Reply to this comment
      • gjermani i fundit August 4, 23:59

        Claus, pershendetje! Ne fakt batuta ime desh te thote qe si sherri i bashkshorteve, ky puci qe ceshtje e brendshme. Jashte enes turke me presion (tenxheres) bota rrotullohet njesoj. Le ta zeme se puci do ia arrinte qellimit, konfiguracioni i politikave gjeostrategjike nuk lejon ndryshime balancash. Njesoj si tenxherja shqiptare, ku per boten qe na ka perfshire ne sferen e influences(me shqip do thosha sfere e kontrollit) nuk ka rendesi se ne krye eshte nje garip i majte apo i djathte, sepse te dyja rezultatet i kane ne xhep. Merr Erdoganin e beje kancelar, do sillet si Merkeli, beje Merkelin bej efendi ne Turqi do sillet si Erdogani, eshte amoku i pushtetit qe e tjeterson njeriun, semundje e vjeter sa bota. Ky tjetri me nick-un tend qenka renduar menderisht, prandaj varja, lere te fluturoje sa ti mbaroje keroseni, se llampa e rezerves me kot i pulson me alarm. Si thoshte dikush, “te uroj nje fundjave te kendshme, me diell po qe se bie shi, me fresk po qe se ben shume diell”.

        Reply to this comment
Shiko komentet

Komento

Your e-mail address will not be published.
Required fields are marked*