Vargje të trishta nga koha e kurbetit të detyruar

Arben Duka September 23, 2015 10:54

Vargje të trishta nga koha e kurbetit të detyruar

Pashë një ëndërr…

 

Nur’ i vdekjes të kish rënë,

në mes lulesh shtrirë,

ike ti dhe gjithë Bota,

u bë shkretëtirë!

 

Hidhërim i drithëruar,

oh-ç’m’i more mënd,

derdhej lot’ i syrit tim,

përmbi syrin tënd.

 

Po qerpik’ i syrit zi,

s’lëvizte një fije,

eh-se ç’kohë të vështira,

gjete që të flije!

 

Më le në botën e marrë,

vetëm-fillikat,

këtë lule të florinjtë,

mos ma merr-moj baltë!

 

Po papritur ja-u zgjova,

kisha parë ëndërr,

ti në gjirin tim të ngrohtë,

flije si një engjëll.

 

Zgjohu, jetën ta gëzojmë,

me mish e me zemër,

se një ditë-e vërtetë,

do të jetë kjo ëndërr!

 

Nuk do rrojmë njëmijë vjet,

o njerëz të gjorë,

jeta vjen e shkon papritur,

si një meteor!

 

Fundi i rrugës ku do vemi,

është i shkurtër shumë,

sa të rrojmë-sa të jemi,

të mos flemë gjumë!

 

Athinë, 1993

 

Duart e mia

 

Duart e mia-duart e mia,

o-ç’fat të keq që patën,

se ka ca kohë-në vend të lapsit,

përdorin veç lopatën!

 

Duart e mia-që nga llaçi,

u bëtë copa-copa,

oh-ç’thithi gjak nga trupi im,

sa mundi-Europa!

 

Duart e mia-duart e mia,

u bëtë për elegji,

se kini kohë që s’ngrini këngë,

po mure në Greqi!

 

Duart e mia-duart e mia,

më mirë më bëni gropën,

në djall të vejë demokracia,

së bashku me Europën!

 

Shkruar në Mistra-Sparta, 1993

 

Ju shpirtra demoni

 

Ma nxitë jetën-ju shpirtra demoni,

na hodhët vello turpi-si të huaj,

ndaj do jetoj dhe ju po të mos doni,

që të këndoj me gaz në vdekjen tuaj.

 

Sparta, 1993

 

Pse pi?!

 

Po pse pi-more Arben,

edhe prishesh në fytyrë?

Pi-që të më duket ndryshe,

Bota jonë-kaq e ndyrë!

 

Fier, 1992

 

Dallga e jetës

 

U sakatuam ditë e net me radhë,

edhe për të ardhmen s’gjetëm dot një shteg,

dhe dallgë e jetës, kob e zi gatuar,

na flaku pa mëshirë breg më breg.

 

Fati ynë, ç’qenka farmakosur,

lumturinë kurrë s’e kemi prekur,

nëpër brigje detesh të marrosur,

ecim-as të gjallë-as të vdekur!

 

Mistra-Sparta, 1992

Arben Duka September 23, 2015 10:54
Komento

Ende pa komente

Ende pa komente!

Je i mirëpritur. Bëhu i pari që komenton këtë artikull. Kujdes etikën.

Komento
Shiko komentet

Komento

Your e-mail address will not be published.
Required fields are marked*